یەکەم رۆژی دیداری (چەمچەماڵ بۆ فیلمی جینۆساید) بەرێوەچوو
یەکەم رۆژی دیداری (چەمچەماڵ بۆ فیلمی جینۆساید) بەرێوەچوو
ئەنفالستان :
دیداری (چەمچەماڵ بۆ فیلمی جینۆساید) ئەمرۆ ١١ی نیسانی ٢٠١٧ بەئامادەب
وونی ژمارەیەك لە هونەرمەندان‌و وەزیری رۆشنبیری و لاوان خالید دۆسكی‌و ئازاد حەمەئەمین سەرۆكی ئەنجومەنی پارێزگای سلێمانی و بابەكر دڕەیی بەڕێوەبەری گشتی رۆشنبیری‌و هونەری سلێمانی و ئامانج محەمەد کەساس قائیمقامی قەزای چەمچەماڵ و ژمارەیەك ئەندامی پەرلەمانی كوردستان و نوێنەرایەتی فەرمانگە حكومییەكان ، بە سپۆنسەری رێکخراوی (رێباز فاوندەیشن) سازکراو هەر ئەمرۆ دەستی بەیەکەمین برگەی کارەکانی کرد.
سەرەتای دیدارەكە بە چەند وتەیەك دەستی پێکرد، دواتر لەلایەن تیپی مۆزیکی كۆمەڵەی هونەرەجوانەكانی كورد لقی چەمچەماڵەوە پارچەیەك میوزیك و مەقامێك پێشكەشكرا.
دواتر فیلمی دۆكۆمێنتاری (وێنە نەبینراوەكانی ئەنفال) لەدەرهێنانی هونەرمەند (هەوراز مەحەمەد) نمایشكرا، دواتر فیلمی دووەمی نمایشکرا کە بریتی بوو لە فیلمی (74) لە دەرهێنانی (ستار چەمەنی گوڵ).
دوا بڕگەی رۆژی یەكەمی دیدارەكە بریتی بوو لە دابەشكردنی سێ رێزلێنان: لەلایەن وەزارەتی رۆشنبیری و لاوان بەرێوەبەرایەتی هونەری سینەمای سلێمانی و بەرێوەبەرایەتی مۆنۆمێنتی ئەنفال بەخسران بەم شێوەیە
١ – رێزلێنانی وەزارەتی رۆشنبیری و لاوان بۆ رێباز فاوندەیشن لەبەرامبەر سپۆنسەریكردنی دیداری چەمچەماڵ بۆ فیلمی جینۆساید.
٢- رێزلێنانی بەڕێوەبەرایەتی هونەری سینەمای سلێمانی بۆ نوسەرو لێکۆڵەری بواری ئەنفال (عومەر محەمەد) سەرنوسەری گۆڤاری ئەنفالستان.
٣- رێزلێنانی بەڕێوەبەرایەتی مۆنۆمێنتی ئەنفال بۆ هونەرمەند محەمەد سەید.
بڕیارە دیدارەكە سبەینێش بە پێشکەشکردنی چەند فیلمێک و دیبەتیک بەردەوامی هەبێت.
