بەفراو ڕەشید : هەتا ئەو رۆژەی بەردی ئەلحەد ئەنێنە بان لاشەم هەرچاوەڕوانیانم .

کانونی یەکەم 30, 2016 Omer ئه‌نفال لێدوان نووسین ناچالاککراوە لە بەفراو ڕەشید : هەتا ئەو رۆژەی بەردی ئەلحەد ئەنێنە بان لاشەم هەرچاوەڕوانیانم .

---

بەفراو ڕەشید :

هەتا ئەو رۆژەی بەردی ئەلحەد ئەنێنە بان لاشەم هەرچاوەروانیانم . 

عومەر محەمەد

بەروار: 16/1/2012 كاتژمێر 11ی سەرلەبەیانی

شوێن : ئۆردگای رزگاری (صمود )

ساڵی 1945 لەگوندی عەزیز قادر لە دایكبووەو هەرلەوێش لەگەڵ محمود عەزیز هاوسەرگیری كردووە.

دایكی شەهیدێكی سەنگەر‌و (4) كوڕ و كچی ئەنفالكراوە، كوڕە شەهیدەكەی ناوی عەدالەت بووەو ئەنفالكراوەكەیشی كە كوڕە گەورەکەیەتی ناوی  (كەرەم ) بوو، كچەكانی ( ئاوات‌و گوڵەو محسومە ) لە تۆپزاوا لێی جیاكرانەوەو ئیتر ئەوە دواجاری پێکەوە بوون و جارێکی تر چاوی پێیان نەكەوتەوە .

هێشتا ئەنفالنەگەیشبووە گەرمیان، بەڵام دەنگ‌و باسی ناخۆش لە دیوی قەرەداغەوە دەگەیشە گەرمیان، رژێم بە تۆپی دورهاوێژ لەسەرقەڵای كفرییەوە گوندەكانی تۆپباران دەكردو بێبەزەییانە بەسەرگوندەكاندا دەرۆیشتن‌و لەناكاو لە ئاوەدانییەك دەتەقییەوە لە بۆمبارانێكدا بەفراو بە تۆپی دورهاوێژ برینداربوو، هێشتا برینەكەی تەربوو كە ئەنفال گەیشتە سەریان‌و دەستگیركران‌و جەیش‌و جاش پێشخۆیانیانداو بردیانن .

ژنە بەبرینداری گیراو هەتا ئێستاش كاریگەری ئەو برینەی پێوە دیارە، كە بەزبری هێز بردیانن بۆ قەلای قۆرەتوو، لەوێشەوە بۆ تۆپزاواو پاش شەش یان حەوت رۆژ ئینجا رەوانەكران بۆ نوگرەسەلمان‌و ماوەی شەش مانگ ‌و چەند رۆژێك لەمەینەتیدا بووەو داوتر لەگەڵ  كۆی  پیروپەككەوتەكان كە لەوانە دایك‌وباوكی بەفراویشیان تێدابوو ئازادكران‌و ئینجا هاتووەتەوە بۆ گەرمیان، لە ئۆردوگای صمود نیشتەجێ‌ بوون . بەڵام هەرگیز ئەو دیمەنەی لەبیرناچێتەوە كە حەجاج بە كیبڵ داوییەتی لەپیاوكی گوندی بەكرباسام‌و كوشتوویەتی . لەوبارەی دلرەقی حەجاجەوە بەفراو دەلێت : هەرچەندە لەبەر بریندارییەكەم بەزەیی بەمندا دەهاتەوەو قەت لێی نەداوم بەڵام بەبەرچاوی خۆمەوە پیاوێكی بەیەك كیبَڵ كوشت پیرەمێردێكی تەمەن هەڵكشاوبوو ناوی ” مامە عەبدی ” بوو خەلكی گوندی بەكرباسام بوو، مام عەبدی گوێی گران بوو حەجاجیش هەربانگی كردبوو ئەو گوێی لێنەبوو، ئیتر دووسێ‌ كێبڵی پیاكێشا كوشتی ئێستا تەرمەكەی هەروا لەوێ‌ بەجیماوەو سەگەرەش گۆشتەكەی خوارد . ئەوەی لەم دیمەنەدا زۆر مایەی نیگەرانی‌و دلتەنگییە لەوكاتەدا بووە كە خەریكی ناوخوێندنەوە بوون بۆ ئەوەی پۆلێنیان بكەن‌و سەرەیان بۆ بنوسن‌و ئازادیان بكەن. كەچی مامە عەبدی دواپۆلینكردنی ئازادبوونیش بەفریای نەكەوت‌و بووە هۆی  كوژرانی.  بەفراو مەرگی پیرەمێردێكی تری گوندی سماقیشی بینیووە بەسەر ئەو عەرەبانەیەوە كە تەرمی مردووەكانی نوگرەسەلمانیان پێ‌ دەبردە دەرەوە، كە پرسیاری كردووە وتوویانە ئەوە حەجاج لێی داوەو كوشتوویەتی‌و فەرمانی كردووە ببیبەنە دەرەوەو فرێی بدەن. سوێند بەخوا ئەویش فریدراو وەكو ئەوانەی تر سەگ خواردی .

بەفراو دوای ماوەیەك بێدەنگی هەناسەیەكی ساردی هەڵكێشاو ئینجا ووتی : جاكێ‌ لەوێ‌ نەبوو ؟ گەرمیان گشتی لەوێ‌ بوو، خەڵكێكی زۆری مردو هەرنەگەرایەوە، حمە خولە خەڵكی گوندی عەزیز قادر لەوێ‌ مرد زۆر مردن بیرم نەماوە ماڵی حەمەی ئەحمەد سەمین سەرپاك گشتیان تیاچوون‌و یەك كەسیان نەماوە پیرەژنێكیان ماوە لەبەر كەنەفتی موچەكەشیان وەرناگرێت.

بەفراو هەمیشە لەبیری كوروكەنیشكەكانیدایە،دوای ئەوەی بە قوڵی چاوەكانی بڕییە ناواوم‌و ماوەیەك بەبێدەنگی وەستا ئینجا ووتی :  هیچ كاتێك لەبیریان ناكەم زرجاریش كە دەخەوم دێنە خەوم، هەتا ئێستا چاوەروانی مێردەكەم‌و كورو كچە ئەنفالكراوەكانم دەكەم، تا ئەو رۆژەی بەردی ئەلحەد ئەنێنە بان لاشەم هەرچاوەروانیانم.ئەمە دوای قسەی بەفراوبوو.

سه‌رنجه‌كان

---