ئەمرۆ یادی کۆچی مامۆستا نەجیب گەرمیانی یە.
ئەمرۆ ١٤ی ئاب یادی کۆچی مامۆستا نەجیب گەرمیانی یە.
عومەر محەمەد
گەلێك هاورێی خۆشەویستم هەیەو بەداخەوە زۆریشم لەدەست داون، بەڵام بێ زیادەرۆیی هیچ كەسێكم نەبینیوە هێندەی مامۆستا نەجیب گەرمیانی خەمخۆری مرۆڤ‌و بەتایبەتی هاورێكانی بێت، هاورێ لای ئەو واتایەكی قوڵی ئینسانی هەبوو، وەفا لای ئەو بەشێک بوو لە کەسایەتی هەربۆیە كوڕە ناوەندیەكەی ناوناوە ( هاورێ).مامۆستا نەجیب لە ماڵدا هەژارو لە واقعدا رۆشنبیرێكی گەورەو كەسایەتیەكی كۆمەڵایەتی ناسراو بوو، هەمیشە خەمی گەرمیان‌و كۆستی ئەنفال لە کۆڵیدابوو، هەرچەندە لە ڕۆژانی پرسەیدا مرۆڤ توشی شۆک دەبوو ئاخر زۆر دەگمەنە هەژارێک پرسەکەی هێندە قەرەباڵغ بێ و بە ئەندازەی گەورەیی خۆی بێت، بەڵام دەزگاکانی ڕاگەیاندنی كوردی لە ئاست مەرگیدا خەمساردوو كەمتەرخەم بوون.
مامۆستا چیرۆكنوسێكی باش‌و ئەندامی یەكیتی نوسەران لقی كەركوكیش بوو، كەچی قەڵەمەكانی ئەو یەكێتییە هیچیان لەبارەیەوە نەنوسی، مامۆستا نەجیب گەرمیانی یەكێك بوو لە خەمخۆرە هەرە چالاكەكانی ساڵنامەی ئەنفالستان، ئەولە گەشتێكی تاقەت پروكێندا بە دوای نوسینەوەی برینی ئەنفالەدا بە نەخۆشی‌و تەمەنی هەڵكشاوییەوە ورەی دەدایە بەرئێمەو دەیگوت نەك هەرماندوو نیم واهەست دەكەم بەرەوگەنجێتی‌و چاكبوونەوەی نەخۆشییەكەم دەچم، لەگەڵ هەر پیرەمێردێكدا دەكەوتینە دوان بە شێوە زمانی گەرمیانیی پەردەی نامۆیی لە نێوان ئێمەو كەس‌وكاری ئەنفالكراوەكان هەڵدەماڵی‌وحوزنی هەموومانی ئاوێتەی تاوانی ئەنفال دەكرد.
هەتا لە ژیاندا بوو بەردەوام لەسەرخەت بوو، كۆمەكی مادی بۆ ئەنفالستان كۆدەكردەوەو تا دواستوونی نەخشە سازی ساڵنامەكە بەتەلەفۆن ناوی ئەو كەسە خەمخۆرانەی پێرادەگەیاندین كە كۆمەكی دارایی ساڵنامەكەیان دەكرد.
لە سەرقاڵییەماندا لە سێهەم ژمارەی ساڵنامەکەدا ناوی چەند بەرێزێك کە کۆمەکی مادییان کردبوو ناویانمان لەیاد چوو بووهەتا بڵاویانبكەینەوە، هەرچەندە دواتر لەهەفتەنامەی (كەركوكی ئەمرۆدا) ناوی ئەو بەرێزانەمان بڵاوكردەوەو داوای لێبوردنمان لێكردن، بەڵام مامۆستا نەجیب ئەم هەڵەیەی منی لەیاد نەدەچوو، هەر دەیووت‌ودەیوتەوە (ژمارەی داهاتوو دەبێت لە جیگەیەكی تایبەتی ناویان بنوسی ئەوانە خەمخۆری ئەنفالن) ئەوانە مەردن.
مامۆستا نەجیب ئەندامێكی چالاكی ( ناوەندی هەڵەبجە -چاك) بوو، بەداخەوە هەموو تەمەنی ئەندامێتی لە ناوەندی چاك مانگێكی تەواو نەبوو، بەڵام كارەكانی بۆ رێكخراوی چاك گەلێك چاک و گەورە بوون، گرنگترین كاری مامۆستا دەرهێنانەوەی سورەت قەیدی ئەو هەژدە پاكیزەیەی گەرمیان بوو كە لەگەڵ مامۆستا یوسفی گەرمیان گرتبویانە ئەستۆ، بە داخەوە مەرگ مەودای نەدا ژمارە (٤) و ئەوانی داهاتوو لەگەڵماندابمێنێتەوە، دلنیام لەمەرگی مامۆستادا هەموومان زەرەرمەندبووین،لەپێش هەموومانەوە گەرمیان‌و ناوەندی چاك‌و ساڵنامەی ئەنفالستان.
