چیرۆكی عاسی مستەفا پەڵەیەكی ڕەشە بەتەوێڵی شۆڤێنیزمەوە

مارس 19, 2016 Omer وتار لێدوان نووسین ناچالاککراوە لە چیرۆكی عاسی مستەفا پەڵەیەكی ڕەشە بەتەوێڵی شۆڤێنیزمەوە

---

چیرۆكی عاسی مستەفا

پەڵەیەكی ڕەشە بەتەوێڵی شۆڤێنیزمی عەرەبیەوە

عومەر محەمەد

ئەوەی بەسەر عاصی مستەفا‌و ئەنفالكردنی خێزانەكەی هاتووە، نەك بە چەمچەماڵ و كوردستان بەڵكو بەجیهانیش نامۆنیە، وەلێ کۆی دەزگا بەناو گرنگەکانی مرۆڤایەتی لەبەرانبەر ئەم تاوانەدا پوچ وهیچ لەباردا نەبووە. عاصی لە دایکبووی ساڵی (١٩٥٥)ە، جوتیارێکی هەژاری گوندی زینانەیی ناحێی سەنگاو سەر بەقەزای چەمچەماڵ بوو، ئەو پێشتر خزمەتی سەربازی تەواو كردبوو، كە جەنگی ئێران عێراق هەڵگیرسا لەگوندەكەی خۆیاندا (زینانە) خەریكی كشتوكاڵ‌و ئاژەڵداری بوو، بۆیە بەبیریدا نەدەهات جارێكی تربەرگی سەربازی لە بەربكاتەوە‌و بچێتە بەرەی جەنگەوەو چارەنوسی بەو رۆژە بگات. ساڵی ١٩٨٢ وەک سەربازێكی یەدەگ رەوانەی ریزی سوپای عێراق کرا، لەجەنگی ئێران عێراقدا کە بەعسیەکان بە جەنگی قادسیەی سەدام ناویان دەبرد، لە شكستێكی سوپای عێراقدا کە رۆژی ٢٧ی شوباتی ساڵی ١٩٨٢ سوپای پاسداران کردیانە سەر عێراقیەکان لەبەرەی شوش عاصی بەدیل گیراو پاش (٩) ساڵی تەواو دیلکردنی لە ئیران، لە پرۆسەیەکی گۆرینەوەی دیلدا ئازاد دەكرێ‌و دەگەڕێتەوە بۆ كوردستان.

بەلام كاتێك دێتەوە‌و دەیەوێت بڕواتەوە بۆ ماڵەكەی خۆی،بەسەر هەواری خاڵیدا دەگەڕێتەوە‌و دەزانێ‌ خێزانەكەی هەموویان لەلایەن بەعسەوە گیراون، سەرەتا وەك سەربازێكی عێراقی بۆ سۆراخیان دەچێتە لای دام‌و دەزگا ئەمنیەكانی بەعس لە چەمچەماڵ، بەڵام كە دەزانێ‌ پیاوانی بەعس وەك ڕەوشتی هەمیشەییان دەستی دەستی‌و درۆی لەگەڵدا دەكەن، ئیتر پەتی تەحەمولی دەپچڕێ‌‌ و بەسكاڵایەكی پاڕانەوە ئامێزەوە، دەچێتە بەغداو خۆی دەگەیەنێتە دیوانی سەرۆکایەتی کۆمار ! سەرۆكێكی بێڕەحم ‌و دڵڕەق، جەنابی سەدام حوسێن، ئەو سەرۆكەی ناوی فریشتەو باوكی نەتەوەی لە خۆی نابوو، کۆیلەکانی چواردەوریشی دنیایەک ناوی رەمزیان بۆ داتاشی بوو، تەنانەت لەگەڵ سەربازێکی دیلیشدا دڵنەرم نەبوو، پاش ٢٥ رۆژ لە پێشکەش کردنی سکاڵاکەی و چاوەڕوانیەکی پڕ لە ئومێدو ترس و دودڵی سەرەئەنجام لەلایەن سەرۆكی دیوانی کۆمارەوە بە ئیمزای ( سعدون علوان مصلح ) زۆر بەكورتی وەڵامی دەدەنەوە‌و لە نوسراوی ژمارە (ش.ع . ب. /٤/١٦٥٦٥ لە ١٠ی ربیع الثانی ١٤١١هیجری بەرانبەر ٢٩/١٠/١٩٩٠ تەنها بە دوودێڕو هیچی ترنا بۆی دەنوسن : داواکاریت لە ٤/١٠/١٩٩٠  ژنەكەت‌و منداڵەكانت لە کاتی پرۆسەکانی ئەنفالدا کە لەناوچەی باكوردا ساڵی ١٩٨٨ دابوو، ونبوون، لەگەڵ رێزدا ئەمە چیرۆکێکە تەواو شایانی ئەوەیە مرۆڤ پەندوعیبرەتی لێوەربگرێت، کە لێوان لێوە لەدڵرەقی و پێشاندەری بیرێکی وێرانكارە، ڕەوشتی سەركردەیەكی ناسیونالستی عەرەبە كە هیچ بەهایەكی بۆ مرۆڤ‌و مرۆڤایەتی نەهێشتۆتەوە، بە سەربازو شوێنکەوتووانی خۆشیەوە، سكاڵای عاصی مستەفا بەدەیان زمان بڵاوكرایەوە‌و رۆژنامەكانی جیهان شكستی سەربازێكی پەشیمانی عێراقیان گەیاندە ئەوسەری جیهان، ئەو سكاڵایەی دەبوو نەک هەر کوردو عەرەب بەڵکو دەبوو دنیا بگۆڕێ، وەلێ کۆتایی بە توندرەفتاری نەهێنا، دڵنیام بەقەد ژمارەی پیت‌و ووشەكانی سکاڵاکەی عاصی مستەفا فرمێسكیان بەو مرۆڤانە رشتووە، كە پەتای دەمارگیری كوێری نەكردوون‌و مرۆڤانە بیر لە ژیان دەكەنەوە، كەچی ئەوەی گوێی خۆی لێخەواند ئەعلامی عەرەبی بوو، ئەوەی شەرعیەتی دەدایە سەدام‌ و بەعسیەكان لەبەرانبەر وەها كردەوەیەكی نامرۆڤانە بیری شۆڤینی عەرەبی بوو، ئەوەی پاش ئەنفال‌و جینۆساید كردنی كوردیش، سەدامی بەسەرۆكێكی لێوەشاوە ناوزەد دەكرد دەمارگیری نەتەوەیی عەرەب بوو. ئیدی بۆ مافی ئەوەمان نەبێت دەمارگیری ناسیونالستی ریسوا بكەین، بۆ نەتوانین بەوپەڕی جورئەتەوە بڵێین، نەفرەت لە بیری شۆڤێنی جا لە هەر دەقێكی پیرۆزەوە سەرچاوەی گرتبێ‌. نەفرەت لەو ناسیونالیزمەی لەژێر پەردەی پیرۆزی نیشتماندا هاونیشتمانیان دەكاتە کۆیلەو بوونەوەرێكی چەواشەو سەركوێر بۆئەوەی هەموو ببنەوە غوڵامی سەرۆک و ڕیگاكان بەرەو فاشیەت هەموار بكاتەوە.

عاصی مستەفا پێشتر خزمەتی سەربازی تەواو كردبوو، كە جەنگی ئێران عێراق هەڵگیرسا لەگوندەكەی خۆیاندا (زینانە) خەریكی كشتوكاڵ‌و ئاژەڵداری بوو، بۆیە بەبیریدا نەدەهات جارێكی تربەرگی سەربازی لە بەربكاتەوە‌و بچێتە بەرەی جەنگەوەو چارەنوسی بەو رۆژە بگات.

عاسی قوربانیەكی دوسەرەی دەستی رژێمی بەعسە، لەلایەكەوە بۆخۆی سەربازێكی یەدەگی بەرەكانی جەنگی قادسیە بوو. کە لە ڕێکەوتی 27ی شوباتی 1982 لە بەرەی شوش سوپای عێراق لە بەرانبەر هێرشێكی توندی سوپای پاسداران خۆیان نەگرت و تێكشكان ئەویش لەگەڵ سەدان سەربازی تری عێراقی دیلكرا و لەو ساتەوە بووە زیندان‌و 9 ساڵی تەمەنی بە دیلی بردە سەرو بووە قوربانیەكی نامۆی جەنگی قادسیە. لەلایەکی تریشەوە لێرە ژن‌و منداڵەكانی لەچاوەروانیدا بوون‌و هەمیشە چاویان لەدەرگا بوو باوكیان بگەرێتەوە ناویان‌و بەدیداری شاد بن. بەڵام چاوەروانیەكەیان بێهودە بوو، چونكە هەرگیز یەكتریان نە بینییەوە .

سه‌رنجه‌كان

---