ڕاستی چیرۆکی ئەم وێنەیە
ڕاستی چیرۆکی ئەم وێنەیە
عومەر محەمەد
ئەم وێنەیەی تاوانبار لیوارکنی هێزی تایبەت (لیوارکن – قوات الخاصة) “بارق عەبدولا حاج حنطە” لەگەڵ ئەم منداڵەدا چەند ساڵێکە هەواڵی ناراستی لەبارەوە بڵاو دەکرێتەوە.
ئەگەرچی چەندین جار لە ژێر نوسینی چەندین هاوڕێ وکەسانی تردا کۆمێنتم نوسیوەو بۆم رون کردووەنەتەوە، کە ئەم منداڵەی لەباوەشی تاوانباری ئەنفال (بارق)دایە منداڵێکی ئەنفالکراونیە، بەڵام بەداخەوە سودێکی ئەوتۆی نەبووە.
ئەو منداڵە کورێکی خەڵکی گوندی هەرمۆتەی مەسیحی نشینی نزیک شاری کۆیەیە. ناوی (ویسام پۆلس یەڵدایە) ئەوسا منداڵێکی ٢ ساڵان بووە کە بارق بە هێلی کۆپتەرێک لە گوندی هەرمۆتە دابەزیووەو لەماڵی دلێر شەمعون لەسەر کورسییەکی ئەلەمنیوم وبەلاستیکی لوولەیی تەندراو دانیشتووە، دلێر شەمعون سەرباز بووە لە لیوای ٦٦ کەبارق حاج حنتە فەرماندەی بوو ئەو کارەباچی بووە، لە بارەگای لیوا لە شاری کەلار، ئەوسا بارق سەرقاڵی ئەنفالی سێ بووە، بەهۆی بەرتیلدانەوە (کە کرینی تاپڕێکی ڕاوبووە) لەمانگی نیسانی ساڵی ١٩٨٨ گواستراوەتەوە بۆ ئامریەی یەکی کۆیە، کە سەربازگەیەک بوو لەهەرمۆتەی نزیک شاری کۆیە. تەنها کیلۆمەترێک لەماڵی دلێرەوە دوربووە، دلێر ئێستاش هەر لەگوندی هەرمۆتە دەژی .
ئەو منداڵەی لەباوەشی (بارق)دایە خەڵکی گوندی هەرمۆتەیەو دراوسێی ماڵی دلێر شەمعون بوون، لە ڕۆژی(١٨)ی ئایاردا ئەو شاری کۆیە گەمارۆ درابوو، سەربازەکانی بارق مالەوماڵ بەدوای خەلکی گوندەکاندا دەگەران کە لەتاریکی شەودا خۆیان گەیاندبووە ماڵی خزمەکانیان لەناوشاری کۆیە، ئەو رۆژە بارق لەو گوندە دادەبەزێ پاسەوانەکانی ئاگاداری دەکەن کە ماڵی دلێر شەمعون لەم گوندەیە، ئەویش دەچێتە ماڵیان ولە بەردەرگاکەیان دادەنیشێ و ئەو منداڵە دێتەلایان ئەویش دەیگرێتە باوەش و وێنەیەک دەگرن، دوای هەفتەیەک دەچنەوە بۆ شاری کەرکوک لەوێ سێ رۆژ مۆلەت دەداتە دلێر شەمعون ئەم وێنەیەو هەندێک وێنەی تر کەلەگەڵ جاشەکان گرتبووی دەداتەوە بە دلێرو پێی دەڵێت ئەم وێنانە بدەرەوە بە خاوەنەکانیان .
رێکارێ مزوری یەکێکە لەکەسە چالاکەکانی بواری جینۆساید، رۆژی ٢١/١/٢٠١٤ دەچێتە گوندی هەرمۆتەو دیدارێک لەگەڵ دلێر شەمعون ساز دەکات و دەینێری بۆگۆڤاری ئەنفالستان. هەر ئەو رۆژە رێکاری مزوری دەچێتە ماڵی ئەو مندالەی وا وێنەکەی لەگەل بارقدا گرتووە، تەماشا دەکات ئەو وێنەیە هەر بەدیواری ماڵەکەیانەوەیە، کاتێک رێکارێ مزوری دەپرسێ ئایا نازانن ئەم ئەفسەرە تاوانبارە بەئەنفالکردنی خەلکی کوردستان، دایکی منداڵەکە شلێر سولاقە یوسف دەڵێت : بەڵێ دەزانین بەڵام لەبەرخاتری کورەکەمان کە لەتەمەنی ١١ ساڵیدا بەهۆی نەخۆشی شیرپەنجەوە گیانی لەدەستداوە وێنەکەمان بەدیواری ماڵمانەوە هێشتووەتەوە.
بەهیوام بەس بێت و هیچی تر ئەم وێنەیە وەک منداڵێکی ئەنفالکراو بڵاونەکرێتەوە، بەبروای من چیرۆکەکان لە تەموو مژدا بمێننەوە، باشترە لەوەی قسەی ناراستییان بۆ داتاشین، چونکە یەک درۆی گەورە کۆی دۆسێکە دەخاتە ژێر پرسیارەوە .
تکایە بۆ زانیاری زیاتر بروانە رێکاری مزوری – دیدار لەگەڵ دلێر شەمعون – گۆڤاری ئەنفالستان (١١- ١٢) لاپەرە ٢٢٩ یان براوانە ماڵپەری ئەنفالستان ٢٠ی نیسانی ٢٠١٦ http://www.anfalistan.com/?p=2564
