نازانم ..!
نازانم !
بەردەوام پرسیاری دەرچوونی ژمارەی نوێی گۆڤاری ئەنفالستان لەمن وهاوکارانم دەکرێ، ئێمە تەنها یەک وەڵاممان هەیە (نازانم) . هەر بەراستیش نازانین دەردەچێ یان نا..! ئەنفالستان بابەتی ئامادەکراوی لە وتارو دیدارو ئامارو دۆکۆمێنت هەیە، بەڵام هێشتا نازانین دەچێتە چاپخانەو بڵاودەبێتەوە یان نا، ئەوەیان پەیوەندی بە ئێمەوە نیە پەیوەندی بەگیرفان و ئاستی بەرپرسیارێتی خەڵکەوە هەیە، خەڵک بەگشتی تەنها داعش و کۆنە بەعسیەکانی لێبەدەر، ئەوان نەدەتوانن پارەبدەن و نەدەتوانن بابەتی خۆیانی تێدا بڵاوبکەنەوە، تەنها لەوکاتەدا نەبێ کە پەشیمانی و داوای لێبوردن بنوسن یاخود ئەنفالستان دیداری لەگەڵدا سازکردبن و وەڵامی پرسیارەکانی ئەنفالستان دەدەنەوە .
ئەوانەشی کۆمەکی ئەنفالستان دەکەن دەبێت دوو خاڵیان لەلا ڕون بێت :
١- ئەگەر قەرزدارو ملکەچ بین ئەوا هی خوێنەرەکانما دەبین نەک ملکەچ و قەرزداری حزب و حکومەت، بەڵام خوێنەرانیش نابێت چاوەروانی ئەوەنەبن زەنگی تەلەفۆن یان لەدەرگای ماڵیان بدرێت و داوای کۆمەکیان لێ بکرێت .
٢- بەدەر لە کۆنەبەعسی و داعش، هەموو کەس دەتوانێ کۆمەکی ئەنفالستان بکات، تەنها مەرجیشمان ئەوەیە کۆمەک بەخشین بە برێکی زۆرکەم بێت، تەنها ئەوەندەبێت ویژدانی خۆی ئاسودە بکات لە نوسینەوەی مێژووی خۆیدا . بۆیە رێگە نادەین کەس پارەی زۆر ببەخشێت بۆئەوەی ئەم گۆڤارە نەبێتە مەیدانی خۆنمایش کردنی کەسانێکی پارەداروخۆخستنە سەروی ئەوانی دی .
تیبینی : کەسانێک هەن دەخوازن هەموو چاپەکە بگرنە ئەستۆ، بەڵام ئێمە ئەوە رەت دەکەینەوە، چونکە لەبنەرەتەوە ئەرکەکە دەستەجەمعیە نەک شەخصی .
ئیدی ئەنفالستان دەردەچێ یان نا ؟ نازانم … بەلام هەتا موچەی شەهیدان بەردەوام بێت ماڵپەرەکەمان بەردەوامە چونکە لەموچەی شەهیدانەی باوکمان (حەمەد قادر) دابین کراوە.
سەرنوسەر
١٩ی نیسانی ٢٠١٦
