سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
کورد و ئەنفال و ئیجە
کورد و ئەنفال و ئیجە
ئەی کورد تۆ لە چ توخمێکی؟ لەگەڵ خودی خۆت لاسار و بۆ ئەوانی دی دەستەمۆ، لەگەڵ ژیان سەرکێش و بۆمەرگیش نەرم وەک قوربانی بوونت بەرەو بەهەشت بێت ئاوا دەچیتە بەردەستی جەلادەکانت، ئەنفال و ئیجە، لم و بیابان، پڕن لە جەستەی ساردەوە بووی ئێمە، پڕن لە گۆشت و ئێسک و خوێن و چیرۆکی مەرگی بەکۆمەڵی کورد.
لەمێژە تۆ هەر خۆت بەدەست مەرگەوە دەدەیت و ئامادە نیت بۆ ژیانێکی شایان، نیشتمان بەجێدێڵیت و بەناو کێڵگەی ئەڵغام و شەپۆلی ئاودا، کۆچ دەکەیت بۆ نیشتمانی ئەو قژ زەرد و چاو شینانەی (سەرڕەش) بەشایانی پەناهندەیش نازانن و بوون و نەبوونمان لەلایان بەهای سەگێکی تیسکنی نییە. ئەوە هەر قاچاغچییەکان نین بیر لە دادۆشین و ڕووتکردنەوەمان دەکەنەوەو ئامادە نین بۆ سەلامەتی کۆچبەرەکان یەختە خراپەکانیان چاک بکەن، بەڵکو ئێمەش ئامادە نین یەختە خراپەکەی نیشتمان و شۆفێرە ناشی و دڵرەقەکانی چاک بکەین. وەک چۆن کۆچەرەکان ژیان و چارەنووسی خۆیان دەدەنە دەست قاچاغچییە قۆڵبڕ و دڵڕەقەکان، ئێمەش ژیان و چارەنووسی خۆمان و منداڵەکانمان داوەتە دەست سیاسییە نەوتفرۆش و دڵڕەقەکان، بەختی خۆمان داوەتە دەست سەرکردە قۆڵبڕەکانی باشوور.ژیان و مەرگی بە کۆمەڵ و تراژیدیاکان چەندە بە دەست جەلادەکانی ئەنفال و شەنگال و قاچاغچیەکانی دەریایە، دوو هێندەش بەدەست بێباکی و نەزانی خۆمان.
ئێمە میللەتێکین، چەکمان کردووەتە مەحەک و عەقڵمان لە مەنگەنەداوە، هەر بۆیە نە ئەنفال و نە راپەڕین، نە کۆمەڵکوژی و نە یادەوەری… ڕاینەچڵەکاندووین، بەهیوام مەرگی قوربانییەکانی دەریای ئیجە بەس بێت و ڕامانبچڵەکێنێت و بمانهێنێتەوە سەرخۆ.
ئێمە میللەتێکین، هێندە ساویلکەین بەحیلەی قسەزانەکانی سیاسەت فریو دەخۆین کە دەڵێن هەتا ڕووبەری گۆڕستانەکانمان فراونتربن بەختی بەدەوڵەتبوونمان زیاترە. ئەو حیلە بازانەی نیشانەشکێنیان لە بیریار و هونەرمەند و تەکنۆکراتەکان لەلا بە نرخترە!.
هەربۆیە پەندمان لە ستەمکاری بەعس وەرنەگرت و فەرماندەی جەنگاوەرەکانمان کردە خاوەن باخ و ڤێللا و کۆمپانیا، ئەوانەمان بە ئەدیداس و پۆستاڵەوە لە بەرەکانی جەنگەوە هێنایەوە و کردمانن بە سەرکردە و فەرماندەی شار و ئاوەدانی! لە کاتێکدا ئەوان بۆ خۆیان دانیان بەو ڕاستییەدا نابوو کە دەزانن پردەکان بڕوخێنن و شارەکان وێران بکەن، وەلێ نازانن دروستیان بکەن! کەچی ئێمە هەر چەپڵەمان لێدا و وتمان ئێوە مەزنن، مەزنتر لەوەی ژیان پێویستیەتی، ئێوە فریشتەی ئازادی و داهێنەری هەموو جوانییەکن، لە کاتێکدا ئەوان مەزن نەبوون، گرگن بوون، فریشتەی ئازادی نەبوون، شەیتانی ١٢ عیلم و داهێنەری هەموو ناشرینییەک و دوژمنی هەموو جوانییەک بوون.
ئێمە، هێندە خۆمان گچکە بینی، بڕیاری مەرگ و ژیان و شەڕ و ئاشتیمان بە کەسانێک بەخشی، کە هەرگیز دانوویان لەگەڵ ئاشتی نەکوڵاوە و لە داهاتووشدا ناکوڵێت، لەبەرئەوەی ئەوان هەر لە شەڕدا هەست بە بوونی خۆیان دەکەن، ئەوان کاتێک مەزاری شەهیدانی هەڵەبجەیان لەبەردی مەڕمەڕ دروست دەکرد، کە هەڵبجەییەکان ژیانیان لەناو داروپەردوی ڕووخاودا بوو، سەرشەقامەکانی قوڕ و لیتە داپۆشیبوون.
لەکاتێکدا زانست فڕۆکەی بێ فڕۆکەوان و ئۆتۆمبێلی بێ شۆفێر دروست دەکەن و سیاسەتمەدار و حەکیمەکانی ئێمەش مووچەخۆری بێ مووچە دروست دەکەن! ئەی کورد تۆ چیت و کەی بیر لەژیان وشکۆمەندی دەکەیتەوە؟
