چیرۆکی منداڵێک – ئاری كاكە برا حەمە عەلی
چیرۆکی منداڵێک – ئاری كاكە برا حەمە عەلی
ئامادەکردنی ئەنفالستان .
ساڵی 1984 لە گوندی سێوسێنان لەدایك بووە.
ئاستی خوێندەواری تەنها دووی ناوەندی تەواوکردووە. لەئێستادا شۆڤێری تەکسی وبەوکارە بژیوی ژیانی دابین دەکات .
بەر لەوەی تاوانی ئەنفال وكیمیابارانی سێوسێنان بكرێت تەمەنی هەروا ساڵ ونیوێك بووە كە منداڵی لێی قەوماو دایكی بەناوی ( نزار محەمەد) بە نەخۆشی كۆچی دوایی كرد، ئیتر هەر لە منداڵییەوە كەوتووەتە لای عەتیە ئەحمەد مەحمودی نەنكی هەر ئەو بەخێوی كردووە.
لەپەلاماری ئەنفالی دووی قەرەداغدا پاشئەوەی گوندەكەیان كیمیاباران كرا (كاكە برا حەمە عەلی) ماڵ‌و حاڵی خۆی بەجێهێشت، بە نیازی خۆ دەربازكردن ئاژەڵەكانی پێشخۆیدا بەرەو سلێمانی، بەڵام بە رێگایەکی سەخت ومەترسیداردا رۆیشت و لە چیای گڵەزەردەی بەرامبەر شاری سلێمانی كەوتە بۆسەیەكی سوپاو هێزەكانی ئەمنی سلێمانیەوەو دەستگیركراو ئیدی لەو ساتەوەختەوە بێ سۆراخ مایەوەو وەك هەر ئەنفالكراوێكی تر چارەنوسی نادیارە .ئاری كە پێشتر هەر بێ دایك بوو، ئەوا ئیتر باوكیشی لەدەستدا .
كاكە برا حەمەعەلی بژێوی ژیانی لەسەر كشتوكاڵ و ئاژەڵداری بوو، لەهەمانكاتدا پێشمەرگەی (ی.ن.ك) بوو، لەگەڵ (د. فایەق گوڵپی) لە خەستەخانەكەی شۆڕش بوون كە بارەگاكەی لە بەلەكجاری ئەوبەری گوندی سێوسێنان دامەزرابوو، بەڵام ئەوە تارادەیەكی زۆر بۆ ئاری تاقانە بەجێماوی خانەوادەكەیان بووە مایەی سەر ئێشە، لەبەرئەوەی لەو سەروەختەدا نەیانوێراوە (تەسكەرە) پێناسی باری شارستانی بەناوی باوكییەوە بۆ دەربهێنن، بەناچاری لەسەر مامێكی بەناوی (عوسمان حمە علی) مامەڵەی یاسایی بۆكراوە، كاتێك لەساڵی 1998 هەوڵیدا ناوەكەی بخاتەوە سەر بنەرەتی خۆی و بەناوی باوكی خۆیەوە ناوی لە فەرمانگەی باری شارستانی تۆمار بكات، توشی كێشەی یاسایی و بێنەوبەرەیەكی زۆر بووە بەتایبەتی لەبەرئەوەی ئەومامەشی لە ژیاندا نەمابوو چوارساڵ پێشتر ساڵی (1994) كۆچی دوایی كردبوو، بەڵام هەرچۆنێك بوو دوای ماوەی ساڵێك ئەمسەر و ئەوسەرو بێنەوبەرە توانی مامەڵەی راستكردنەوەی ناوی بنەرەتی خۆی راستبكاتەوە .
ئاری تاقانە هەتا نەنكی ( عطیە ئەحمد محمود) لە ژیاندا مابوو هەرپێكەوە لەگەڵ ئەودا دەژیان، بەڵام ساڵی (2009) نەنكیشی كۆچی دوایی كردو دیسانەوە بە تەنیامایەوە . خۆشبەختانە ئێستا لەگەڵ ئامۆزایەكی خۆیدا هاوسەرگیرییان كردووەو باوكی دوو كچە .
سەبارەت بەسۆراخی باوکی ئاری دەڵێت هیچ سۆراخیمان نەزانی هێندەنەبێ کەوا کەسێک لەگەلیدا گیراوە، کەهێنابوویانن بۆ سلێمانی ئەو لەناو شاری سلێمانی لە سەیارە سەربازییەکەدا خۆی فرێدابووە خوارەوەو دەربازی ببوو.
