سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
بۆتان دەگێڕمەوە : بەسەرهاتی بریندارێکی گازی ژەهراوی
بۆتان دەگێڕمەوە
سەید ئەحمەد حمەلاو
بیرەوەریی : پێشمەرگایەتی و رۆژانی سەخت گازبارانی شاناخسێ.
ئەم بیرەوەریانە لە ژمارە (١٠) گۆڤاری ئەنفالستاندا بڵاوکراوەتەوە .
ڕۆژی 23/3/1988 كە بوو بەڕۆژانێكی بزر نەبووی مێژوو، دیمەنی ڕەنگین و دڵگیری شاناخسە، ئاسمانی ساف و بێگەردی، لەو ڕۆژەدا بەدەست مرۆڤ گەلە شەڕەنگێز كەللە ڕەقەكانەوە پۆخڵ بوو.
ژینگە لە دوكەڵی باروتدا بۆر دەینواند، گوڵ و چرۆو گژوگیای ئەو بناری كوێستانە بە گازی ژەهراوی بۆزۆ بوو، باڵندەكان تەڕببوون و دەنگی تەقینەوەی گوللە تۆپ و ڕۆكێت و قریشكەی لە ناكاوی فڕۆكە تیژڕەوە جەنگیەكان، شوێنی ئاوازی بەسۆزی ئەوانیان گرتبۆوە ئێمە لەوێندەرێ، ڕەنگ و بۆنی شەڕمان گرتبوو، یەك پارچە ببوینە شەڕو خۆشیی واخۆشیەكانمان تێكەڵ كرابوو، بارەگاكانمان ، لە ساباقی جەنگدا هەڵنابوو، منداڵمان لە پەنا پەسێرو شگێران پەستاوتتبو، كە ڕۆژنەبوو، ئازیزێكمان ، بەرەو كۆچێكی بێگەڕانەوە، هەگبەی خۆی لە كۆڵنەنێ .
ئەو دەمەی كە جگە لەمەرگ هیچیی دیكە لەوێندەرێ، نەدەجماو نەدەگوزرا لەئەنجامی وەرگرتنی ژەهری بونەوەر كوژەوە كە لەلایەن ژیریاری بیرنەخۆشە شەڕێنگێزەكانەوە وەبەرهەم هاتبوو، وا پەناو پەسێرو شكێڕو كەلەبەرەكان ترسناكتر ببوون و ساباق و بڵندی و ترۆپكان، ببوونە پەناگای دژە ژەهراوی بوون.
هەربۆیەش، كە بۆنێكی نامۆ، خۆی لەكەپومان هەڵبكردایە، ڕاستەڕێ لەناو پەسێران وەدەردەهاتین و بەناو فڕكو هوڕی پارچە تۆپ و رۆكێتاندا، بەرەو بەرزایی و ترۆپكان خۆمان دەكوتا .
گابەردێكی زەبەلاح، لەدەمێكدا، لەشێوەی ئێڵێكدا لایەكی كەرتببوو لە دامێنی بەراوەكانی شاناخسەدا، قاچی قووڵ بەزویدا ڕۆچاندبوون و نەدەبزوا، لەوگۆرە مەرگ بارێنەدا، هەرای لەدوژمن دەكردو دەیگوت:(نەك لێرە نابزوێم، بەڵكو سنگیشم والاكردووە، تاخۆجێیەكانمی تێدا پەنادەم).
منیش ئەوێم كردبووە پەناگاو هاوسەرم و زاڕۆڵەكانم تێدا پەنادابوون.
وەكی ئێستاكێم لەبیرە، نیوەڕۆكەی مامۆستا شێركۆم میوان بوو، ئەو كە لەتەك دەیان پێشمەرگەو سەدان خێزانەوە، لەمەرگەو دۆڵی جافایەتیەوە، بەناو بەفرو وەیشومەو بەستەڵەكی كوێستانی دۆڵی شێخ محەمەدو ئاسۆس و شینكایەتیدا، شەكەتو كەسیرە گەیشتبوونە ئەوێ و ئەویش لەبەر سەرماو دووری ڕێگا نەخۆش كەوتبوو لەلای من و حەمە ماوەتی گیرسابووەوە.ئەوڕۆژە لەگەڵ كاك بەكر فەتاح و كاك ئاسۆی شێخ عارف وامان بڕیار دابوو، كە نانی نیوەڕۆمان خوارد، بەزوویی بچینە بانەو بچینە سەردانی بەرزانی حاجی قادری چوارتایی و سەرخۆشیی محەمەدی خاجی سەعیدی كوڕی مامی لێ بكەین، سەرخۆشیی ئەو بەورە كوێستانیە مەرگ بەزێنەی كەچەند ڕۆژێك لەوەوبەر لە (هاوار) شەهید ببوو. ئەو یەكێك بوو، لەفەرمكاندە بوێرو نەترسەكانی تیپی (37)ی شارباژێڕ.
چوینە سەر ڕێی گشتی، بڕیاربوو، گەڕێنەكەمان بێتەوێ، وەلێ بەهۆی تێكچونیەوە دواكەوتبوو، بۆیە بڕیارماندا تا ساز دەبێ و دەگاتە جێ، واچاكە بچینە بارەگای پەیوەندیەكەمان، هەروا چەند مەترێك لەسەرو ڕێگاكەوەبوو، كەئەوێ، لەودەمەیدا، جمەی دەهات لەو پێشمەرگانەی لەشوێنی خۆیان پەڕەوازە ببوون و سەرقاڵی خۆسازدان بوون بەمەبەستی گەڕانەوە بۆ شوێنەكانی خۆیان.
چوینە بارەگای پەیوەندیەكان، ئەو دەمی كاك سالاری حاجی دەروێش بەرپرسی بوو، لەبەردەمی چادرەكەدا دانیشتین، ئەوانەی كەلەو كۆری دانیشتنەدا بەیەكەوە بووین و لەبیرم مابن، بریتی بوون لە: (كاك بەكر فەتاح، كاك ئاسۆی شێخ عارف، كاك حەمە ئەمینی خەجێ، كاك دانا ئەحمەد مەجید، كاك عومەر چاوشین دڕەیی، مامۆستا حەمە ڕەووف و چەند كەسێكی دیكەو خۆم).
كات دوو و نیو دەبوو، لەقساندا گەرم ببوین، لەناكاو شەش فڕۆكەی جەنگی بەدوای یەكدا هاتن و لەچەند دەقیقەیكدا، دوانزە ڕۆكێتی گازی ژەهراویان هاویژتوو تیژگەڕانەوە.
فڕۆكەی یەكەم نزم بۆوە، دوو ساروخی هاویشت، ساروخەكان هێندەی تاپرێكیان دەنگ دەهات، خۆمان بەزەویەكەوە نوساند، لەسەرەتاوە مەزەندەكان كرد، كەساروخی هێشویی هاویژتبێ و نهۆیە زەوی دەكۆڵێ.
فرۆكەی دووهەمیش هات، ئێمە هەر بەو زەویەوە نوسابوین، بۆنی سێوی گەیومان هەڵمژی، كاك بەكر فەتاح گوتی: (كوڕینە ساروخەكان گازی ژەهراوین و تا دەكرێ بابەرەو بەرزایی هەڵبێین) ئیدی هەریەكەمان بەلایەكدا هەڵاتین. من بەلایەكدا هەڵاتم، بەرزاییەكەی نزیكی ئەوێم بەباش زانی، هەربۆیە ملم لەوێنا، ئاسۆی شێخ عارف و مامۆستا حەمە رەووف و عومەر چاوشین و چەند پێشمەرگەیەكی دیكەم لەپێشەوە بینین كە بۆ هەمان جێ دەچوون، هەموو ڕامان دەكرد، من گەیشتمە تارمەیەك، ئەوان لە تارمەكیە سەركەوتبوون، لەو دەمەیدا فرۆكەیەكی دیكە نزم بۆوە، ئەوان لەتارمەكە سەركەوتبوون، لەو دەمەیدا ڕۆكەیەكی دیكە نزم بۆوە، كەنەمزانی چەندەمین فڕۆكەبوو، بەباشم زانی لەپەنا تارمەدا خۆم درێژكەم، هەروام كرد ساروخێك كەگازەكەی بۆنی گیایی تەڕی لێ دەهات، لەدووری دە مەترێكی پێشمەوە تەقیەوە، وردە گڵی ساروخەكەم بەسەردا وەری، بۆنێكی خەست لەسیەكانم خزا كە ڕێگەی نەدەدا كە هەناسەی پاك هەڵمژم، سەرم گێژی خواردەوە، دڵم تێكەڵ هات، چاوم تەمیان لەسەرنیشت و بەزەویەكەوە شل بووم، چەند جار هەوڵمدا هەڵسم و لەناو ئەو ژەهراویەدا خۆم دەربازكەم ، بەڵام بەزەویدا دەكەوتمەوە، لەدڵی خۆمدا گوتم:(تازە مردم، ئیدی ئەم خۆماندوكردنەوی بۆ چییە) دواتر پەشیمان بوومەوەو سەركۆنەی خۆم كرد (هەی نەتڕەژم، بۆ وابەزویی خۆت بۆ مردن شلكرد. گوڕو تەوژم بدەرە بەرو خۆ دەربازكە، خۆ هەر كە بشمری، لێرە دوركەوەرەوە، تا ئەوانەی كە دێن هەڵت دەگرنەوە، بابە سۆنگەی تۆوە ژەهراوی نەبن) لەژێرەوە، بەمست لەسنگی خۆمدا، هەستمكرد ئاسودە دەبم، خێراو توندتر لەسنگی خۆمدا، ئاسودەتربووم، دەمتوانی هەناسە هەڵمژم و هەڵسم، هەڵسام و بەدەمی خۆم ڕوانی، مامۆستا حەمە رەووفم ناسیەوە لەگەڵ چەند پێشمەرگەیەكی دیكەدا، لەنزیك جێ ساروخەكەوە كەوتبون و نەدەبزوان زانیم ئەوانە شەهید بوون، ئاسۆی شێخ عارفم بینی سەرەوژێر ڕایدەكردو دەستێكی خوێنی پێدا دەهات چاوم گێڕا كەسی دیكەم نەبینی. دەوروبەر چۆڵ و ترسناك دەینواند. لەكاتێكدا چاوو دەم و لوت و گوێم و دەكزانەوەو زوو زووش هێڵنجم دەدا، بەلارە ملەو قاچ تێكئاڵدرانەوە، رێمكرد، دەبوایە خێرا خێراش بەسنگی خۆم كێشم، دەنا هەناسەم بۆ نەدەدراو بەزەویدا دەكەوتم، تا دور دەكەوتمەوە باشتر دەبووم، كە گەیشتمە ماڵێ، شلوشێواو بووم، شاقەلم لەدواوە هاتبونە دەرێ و با دەیشەكاندەوە، كڵاوەكەم بەشلی لەژێر باخەڵم خزابوو، پشتێنەكەم بەدەستم شۆڕببۆوەو جاروبار لەقاچم دەئاڵا،
مەلیحەی هاوسەرم كەبەو دیمەنەوە منی بینی، دایە بانگی گریانێ، منداڵیش لەژوور هاتنە دەرێ و بۆ بابیان دەگریان، من وامدەزانی مردووم، مەلیحەش وایدەزانی كە ئێستانا، ئێستاكێ دەمرم، نارەوای نەبوو، هەرمانگێك دەبوو كە لەیاخسەمەر بەكیمیایی بریندار بووم و بۆ چارەسەر رەوانەی تەورێز كرابووم و چەند رۆژێك بوو گەرابوومەوە كە دەرمانی برینداریەكەم تەواو نەكرد بوو، وا ئەمجارەش بریندار بومەوەو بەشڕوپڕی بۆی هاتومەتەوە ماڵێ. لەپەنا گابەردە زەبەلاحە كەرتبۆكەدا، كۆنە چاڵە سامسۆنێككم هەڵدابۆوە، بەگونیە قوڕو گڵ دیوارەكانم هەڵچنیبوو، دەرگایەكی مووبڕم تێخسبوو، پەنجەرەیەكی بچوكم لە كەلێنێكەوە بۆ هێشتبوەوە كە زێتر لە كڵاوڕۆژنەی دەكرد بڕ دارم هاویشتبونێ و دوو چین نایلۆنم تێوەپێچابوو، گەر دەرگات گاڵە كردایە، هەوای دەرێ وەژوور نەدەكەوت، هەرچەندە فرەتر لە كونە گورگێكی پوخنە دەچوو، وەلێ بۆ ماڵی مەمانان و خۆ پەنادان لەگازی ژەهراویو گوزەرانی ڕۆژانە لەدیوەخانی ئاغاو بەگ و خواپێداوان، دڵگیرترو لەبەرچاوان فراوانتر بوو.. منداڵ لەژوور خزابوون و لەناوەوەڕا، دەرگایان لەسەر خۆیان كڵۆم كردبوو، بەهاتنەوەی من،لەژوور دەركەوتن و بەچاوی پڕ فرمێسكەوە پێمدا هەڵروسكان. بەبتونی بەرگەكەم لەگازی ژەهراویدا شڵال ببوو، بۆ ئەوەی ئەوانیش ئالودە نەبن، هەرزوو جل و بەرگم داكەندنو ئاورم دان، هەرچەند ئەوانیش ئالودە بوون و دواتر هەموو لەشیان ڕەش هەڵاتبوو سیەكانیان هەوی كردبوو.
هەر كە برادەران بەبرینداری منیان زانیبوو، خۆیان گەیاندە من، وابزانم ئاسۆی شێخ عارف كە ڕۆژی دواتر شەهید بوو، پێیگوتبوون.
یەك دوو یەك كەلەوێ بوون، ئێسترێكیان بەچوار ناڵە هێنا، تا سواری ئێسترەكەم بكەن و بۆسەر ڕێگای گشتیم ببەن، كەلەوێندەرێ، بەگەڕێنان، بریندارەكانیان دەناردنە بانەو لەوێشەوە، بۆ شارەكانی دیكەیان دەناردن. دكتۆر كاوە كوێخا صاڵحی گوڵێش، كە لەگەڵ دكتۆر ابراهیمی حاجی فەتاح دا، دكتۆری تیپەكەمان بوون. كە بەبرینداری من دەزانێ، بەپەلە دەرزی و دەرمان هەڵدەگرێ و دێتەلام، لەڕێگایە بەلای جێ ساروخێكدا دێ كەبۆنی هەویری ترشاوی لێهاتبوو، پڕ بەسیەكانی بۆ ترشاوی هەڵمژیبوو، كە ئەو هات، من لەسەر شۆركێكدا خۆم بەئاوێك دەشت، كەپێشتر بۆ ئەم جۆرە ڕووداوانە لەتانكیەكی سەرگیراودا هەڵمان گرتبوو، ڕۆژناڕۆژ ئاوەكەیمان دەگۆڕی.كە لەخۆشتن هاتمە دەرێ، دیمەنێكی سەیرو ترس ئامێزم لەڕوخسارو هەڵسوكەوتی دكتۆر كاوەدا بینی، خێرا خێرا پێدەكەنی؟ ئەمپولێكی ئەنترۆپین و سرنجێكی بەدەستەوە بوو، دەستەكانی دەلەرزین، بەدەم پێكەنینەوە لرفە لرفی دەهاتوو كەفی لەلالێوانەوە دەردەدا، لەتەك پێكەنینێكی بێ پچڕانەوەی لرفاوی خۆنەویستانەدا، خێرا خێرا دەیگوت:(مامە سەید پەژارەت نەبێ، ئاها، ئێستا چاك چاكت دەكەمەوە) .
لە ئەمپولەكە دەنوسا بیشكێنێ، وەلێ برشتی پێ نەدەشكا، منیش لێم دەڕوانی و سڵم دەكردەوە، هەندێك دواكشیم، ملی درێژ دەبوو، من لەمل درێژبونەكەی سڵم دەكردەوە، دەگوت ئێستا نا ئێستا ملی دەپسێ، ئەوەی بەبیرم داهات ئەوەبوو كەمن دەرزیەكە لەئەو بدەم، هەروامكرد، سرنج و ئەمپولەكەم لێوەرگرتو لێمدا، تەندروستی زۆر ناجۆر بوو، هەر بۆیە ئەو ئێسترەی كە هێنابویان منی سواركەن، ئەویان سواركرد، هەر كەسواریانكرد، وەكی ماشێن بئاوژێ، ئاوا هۆڕنی لێ دەداو ، ئیستۆپی دەگرتوو سوكانی بادەدا. ئیدی ئەویان بەرەو نەخۆشخانەیەك كە لەتەنیشت كۆنە گوندی شاناخسەوە بوو، برد…
دكتۆر كاوە هێندە دوورنەكەوتبۆوە، منیش دڵم تەپەتەپی كرد، لەشم دەستی كرد بەكزانەوە، ئاو بەچاومدا دەهاتە خوارێ و نەدەگیرسایەوە، هێڵنجدان و ڕشانەوە، نەدەگیرسایەوە، تەندروستیم دژوارو دژوارتر دەبوو،منداڵ گریانیان نەدەپساندەوە، دیمەنێكی ناخۆش بوو، حەمە ماوەتی و مامۆستا شێركۆو مام ڕەحمان و ابراهیمی خوالێخۆشبووی مام رەحمان ، تێمنوسان چواردەستە هەڵمگرن و تا نەخۆشخانە نەمگیرسێننەوە، وەلێ ڕێگام نەدا هەڵمگرن، بۆخۆم وردە وردە ڕۆیشتم، دەمویست، ئەوەندەی برشتم هەیە، بەپێی خۆم بڕۆم، وابزانم ژیان ململانێی لەگەڵ مەرگدا دەكردو ڕێگای نەدەدا لاواز ببینرێ، وردە وردە وەكی سەرخۆشێك كەزۆر مەستبێ، دەرۆیشتم، ئەوانیش لەملاولامەوە بەئاگاییەوە دەڕۆیشتن و لەدواوەشەوە گریانی مەلیحەی هاوسەرم و هەر حەوت زاڕۆڵەكانم دەبیست، دەیانگوت بێ هاوسەرو بێ باوك خۆمان، ئیدی ئاگام لەهیچ نەما، هێند نەبێ كەدواتر مامۆستا شێركۆ و حەمە ماوەتی و ئامۆزا ڕزگارو مامۆستا ئەكرەم دەینگوت:[كە بەكۆڵی بردمانیتە سەرێ‌و لەوێ چاوەڕوانی بەڕێكردنت بووین، لەوێ پێشمەرگەی برینداری زۆری لێ بوون كە پەیتا پەیتا بۆ چارەسەركردن بەرەو ئێران بەڕێدەكران، تۆ ، خۆت بەدەستمانەوە قینج كردەوە بەدەنگی بەرز قسەت دەكردو دەتگوت :(پێشمەرگە نەبەزن، سەنگەر چۆڵ نەكەن و بەورە بن، ئێمە چۆك بەم چەكانەش دادەدەین و سەركەوتن بەدەست دێنین)، بەزەیمان پێتدا دەهاتەوە، دەمانگوت:(سەید ئەحمەد تێكچوە)] .
بێ ئاگاو بێ هەست لەناو پاسێكی پڕ لەپێشمەرگەی برینداردا بەڕێكراین، ئاگام لەهیچ نەبوو، شتێك كە هەستم پێدەكرد، ئەو جوڵانەوەیە بوو كە بەبێ ویستی خۆم لەكاتی لەنگینی پاسەكەدا پێمدەكرا، هێند نەبێ، گەر هەڵەم نەكردبێ، وابزانم لەپێچەكانی (بڵەسەند) بوو، هەندێك وەئاگا هاتمەوە، لیك و كڵم لەدەم و لوتم چۆڕابووەوەو لەسەر سنگ و لاملمدا دەهاتە خوارێ، چاوم بەپاسەكەدا گێڕا، پاسێكی بێ كورسی، هەموو لەسەر ئاسنەڵاوی ساردو ڕەقی پاسەكەدا، وەكی لیژنەدار، بەپاڵ یەكەوە درێژبووین، هەریەكەی لەئاوازێك دەمانخوێندو وەكی شێتخانەیەكی گەڕۆكم هاتە بەرچاو، چاوم ڕەشكەو پێشكەی دەكردوو دەكزایەوەو ئاوی لێ دەچۆڕا،دكتۆر كاوەم لەپەناوە بوو، دەستی بەسەرمدا دێناو ماچی دەكرد، دەیگوت:(توخوا مامە سەید گیان ئەوە تۆشمان لەگەڵی، بەخوا چاكە، بۆ بەیەكەوە هەڵنەیەیەن، لەوانەیە بۆ شوێنێكی خراپمان بەرن) . ئەو هەروایكردبوو، لەنەخۆشخانەی بانە بە تەبەڵەو دژداشەی نەخۆشخانەكەوە هەڵاتبوو.
چاوم برشتیان كزببوو، یەكێكم لەپاسەكەدا بینی، بەپێوە بەسەر بریندارەكاندا دەگەڕا، شتێكی دزێوی لەسەر بوو، كەسەیرم كرد لێی دەترسام، گوتم (تۆ كێی ئەوە چی یە لەسەرت؟) پێدەچوو توشی لەبیرچونەوە بوبم، هەرواش بوو پێمگوت (ئەوە لابە، یان لێرە لاچۆ) سەیرم كرد ابرای شۆفێریش شتێكی وای لەسەربوو، كەئەوان قیناعی دژە ژەریان پۆشیبوو.. ئەوەی بەپێوە بوو گوتی (بەسەر چاو) قیناعەكەی داكەند، كەسەیرم كرد دكتۆر ابراهیمی حاجی فەتاحە، ئەو بەئارەزوی خۆی، بۆ سەرپەرشتییمان لەگەڵ ئێمە هاتبوو، كە نیشانەی بەرزترین ڕەوشت و بەوەفاترین و دڵسۆزترین پیچشمەرگەی دەنواند. بەسەر هەمواندا دەگەڕاو دڵنەوای یەك بەیەكی دەكردین. گوتم (دكتۆر قناعەكەت بپۆشەوە) ئیدی بێ ئاگا بومەوە.. كاتێك بەهۆش خۆم هاتومەتەوە، نازانم چەند ڕۆژم پێچووبوو، لەنەخۆشخانەوەی خورشیدی ئەسفەهان كەوتوم.. روتوقوتم، تەنها سەرچەفێكم پێوەیە، لەشم وەكی ئاوی كوڵاوی پێداكرابێ، هەمووی سوتابوو، پێستەكەی پاقتیلە ببوو، چاوم كوێر ببوون، دەكۆكیم، دەم و لوتم ئاوولیكی لێ نەدەبڕا، بەبتونی لەشم ژانی دەكرد، ئارەزووی چۆڵگەیەكی هێمنم دەكرد كە نەقسە بكەم و نەگوێم لەدەنگی كەس بێ.. كاك حەمە ئەمینی خەجێش برینداربوو، ئەویش لەژورەكەی ئێمە بو، كاریگەری گازەكە ژیری تێكدابوو، هەمیشە دەیگوت: (بالێرە هەڵێین، ئەمانە چەكدارن و نیازی كوشتنی ئێمەیان هەیە) . تاشەوێك لە پەنجەرەكەوە كە لەقاتی سێ بووین، خۆی فرێدایە خوارێ و شەهید بوو.. پێشمەرگەیەكی دیكەش تێكچوبوو، ئەو لەژورێكی دیكە بوو، عاشقی خوێنەكەی خۆی بوو، هەر وابزانم بەوەوە گرتبووی، سۆندەی مغەزیەكەی دەپساندو لەخوێنەكەی خۆی ڕادەماو بەسەر بریندارەكاندا دەگەڕاو فیچقەی خوێنەكەی خۆی بەشانازیەوە پیشان دەدان . دەیگوت:(بزانن، خوێنی من چەند سورو گەشو جوانە). بەزۆر دەیانگرتەوەو دەرزی خەویان لێ دەدا، تا شەوێك سۆندەی مغەزیەكەی دەپچرێنێ و لەژێر بەتانیەكەوە هێندەی سەیر كردبوو، تا خوێنی تێدا نەمابوو، مردبوو. ئەو نەخۆشخانەیە جمەی لەبریندار دەهات، بریندارەكان هەمووی برینداری گازی ژەهراوی هەڵەبجەو شاناخسە بوون، ژن و منداڵ و بەتەمەن و پێشمەرگە، سەرلەبەری نەخۆشخانەكەیان سیخناخ كردبوو، هەر لەوێ، بەدەم ئازارەوە هەڵبەستێكم بۆ شەهید بوونی هەڵەبجە لەژێر ناوی (شاڵاوە مەرگ) دا نوسی.
