من و حەیران و رێكەوتێكی جوان . عومەر محەمەد
من و حەیران و رێكەوتێكی جوان
عومەر محەمەد
رۆژی ١٣ی نیسانی ٢٠١٠ لەكاتی هێنانەوەی ڕوفاتی منداڵە ئەنفالكراوەكانی كەمپی دوبز لە بانی مەقانی شاری چەمچەماڵ كە ئێستا مۆنۆمێنتی ئەنفالی لێ بنیاتنراوە، لەو كاتەدا كە سەرقاڵی وێنە گرتن بووم ئەم ژنەی وا ئێستا لە وێنەكەدا دەبینن چومەتە بن باڵی، بورایەوەو لە هۆش خۆی چوو، لەبەر باری تەندروستی و شڵەژانی ئەوانەش كە لەگەڵیدا بوون نەمتوانی بزانم ئەم ژنە كێیەو خەڵكی كوێیەو چەند كەس لە خانەوادەكەی ئەنفالكراون، پاش ماوەیەكیش سیروان قەشقەیی هاتەلام، ووتی وێنەیەكی تۆم گرتووە لە بن باڵی ژنێكدایت لە چەمچەماڵ بەلێنی پێدام بۆمبنێرێتەوە بە سوپاسەوە بەڵێنەكەی بردە سەر.
دوای تێپەرینی چوار ساڵ بەسەر ئەو روداوەدا
رۆژی ٢٩ی حوزەیرانی ٢٠١٤ لە شاری سلێمانی بەرێكەوت كچێكم بینی بەبێ ئەوەی بیناسم، لەیەكەم نیگاوە كە ئەو كچە بەرێزەم بینی یەكسەر ئەو رۆژەی بانی مەقان و لە هۆش خۆچوونی ئەو ژنەم بیركەوتەوە، دیمەنی بورانەوەو لە هۆشخۆچونی ئەو ژنە وەك شریتێكی سینەمایی راگوزەر بە بەرچاومدا تێپەڕی، رێكەوت وابوو لە یەكێك لە بەشەكانی بەرێوەبەرایەتی گشتی كاروباری شەهیدان وئەنفالكراوان هەمان رۆژ جارێكی تر لە گەڵ ئەوكچە توشمان بوو بەیەكەوە، یەكترمان بینیەوە من دانیشتبووم كە كڤەكە هاتەوە ئەوەو دانیشت چاوەروانی تەواو بوونی مامەڵەكەی بوو، پاش ماوەیەك چاوەڕوانی روی تێكردم و بە رێزەوە پرسی :
– دەكرێت ناوی بەرێزتان بزانم ؟
– بەڵی بەخۆشحاڵییەوە من ناوم عومەر محەمەدە .
– ئەو بەروخۆشییەوە وتی پێموایە من وتۆ جارێك بەتەلەفۆن قسەمان كردووە.
– راستی زۆر كەس لە رێكخراوەكان و دەزگاكانی راگەیاندنەوە بەتەلەفۆن قسەیان لەگەڵدا كردووم ببورە بیرم نەماوەو بەرێزتان ناناسم .
– ئەویش خۆی ناساند من ناوم سروشت محمەد رەشیدەو لە رێكخراوێك كاردەكەم بەناوی یادەوەری ئەنفال، لە بنەرەتەوە خەڵكی سەنگاوین من تەمەنم حەوت ساڵان بووە كە لە دوبز زیندانی بووین، خوشكیكم بەناوی پەیمان لە دایكبووی ساڵی 1987 واتە تەمەنی یەك ساڵان بوو، كە لەوێ گیانی لە دەستداوە .
سروشت تەمەنی حەوت ساڵان بووە كە ئەنفالكراون، لە دایكبووی ساڵی ١٩٨٠ كچێكی بالا پۆشی دامەزراو وریایە، خوێندنی لە بواری ( یاسای بازركانی و دارایی نیودەولەتی نەوت و گاز) لەبەریتانیا تەواو كردووە، چەند پرۆژەیەكی خزمەتگوزراری لە خەیاڵدا بوو بۆ جێبەجێكردن، ئەوان خەڵكی گوندی (زیندانە گوندەكەی عاصی مستەفان) لە ناحێی سەنگاو ساڵی١٩٨٨ بەرپەلاماری ئەنفال كەوتوون و رەوانەی تۆپزاواو دواتریش رەوانەی كەمپی دوبز كراون، كاتێك لەبارەی ئەنفالەوە دەدواین من ئەوەم بۆ باسكرد كە یەكەمجار چاوم پێت كەوتووە، بەبێ ئەوەی بزانم ئەو خەڵكی كوێیە كێی ئەنفالكراوە، یان هیچ لە بارەی ئەنفالەوە دەزانێ، یەكسەر دیمەنی بورانەوەو لە هۆشخۆ چوونی ژنێكم هاتووەتە بەرچاو لە مۆنۆمێنتی ئەنفال لە بانی مەقامی چەمچەماڵ، سروشت بەبێ ئەوەی بزانێ من باسی كێ و چ دیمەنێك دەكەم ووتی : لە یادێكدا بوو دایكی منیش بورایەوە، بەڵام ئەو هەرگیز باوەڕی نەدەكرد كە ئەمرۆ ئەو فۆتۆیانەی بورانەوەی دایكی و ئەوانەش كە بە دەورییەوە بوون دەست بكەوێتەوە. رێكەوتێكی تەواو سەیر بوو كاتێك وێنەكانم پیشاندا یەكسەر ووتی ئۆی ئەوە دایكمە (حەیران ئەحمەد عەبدوالكەریم ) لەهەمان كاتدا وێنەی خۆشی بینییەوەو وتی ئەوەش خۆمم .
