ڕۆیشتم بۆماڵی ئاغاكە و پێمگوت كوا کوڕەكانم ؟ لەتاوی کوڕەكانم سنگیم كرت و راموەشاند، وتم چۆن تۆ من ناناسی؟ ئێستاش واسكاڵام لەسەر تۆماركردووە
فاتمە عومەر عیزەت لەگوندی هۆمەر قەوم :
ڕۆیشتم بۆماڵی ئاغاكە و پێمگوت كوا کوڕەكانم ؟ لەتاوی کوڕەكانم سنگیم كرت و راموەشاند، وتم چۆن تۆ من ناناسی؟ ئێستاش واسكاڵام لەسەر تۆماركردووە
دیمانە : عومەر محەمەد
دیمانە لەگەڵ کراو: فاتمە عومەر عێزەت .
رێکەوتی ٢/١٢/ ٢٠١٤ .
شوێن : هۆمەر قەوم ماڵیی دیمانە لەگەڵکراو .
فۆتۆ : فەرەیدون چاوشین
لەرۆژێکی هەتاوی سەرەتای مانگی کۆتایی ساڵی ٢٠١٤ لەگەڵ برای خۆشەویست كاك فەرەیدون چاوشین بە پیكابە دەبڵ كابینەكەی ئەو بە نیازی دیداری خانەوادەیەكی ئەنفالكراو چوین بۆگوندی قۆمەرقەوم لەبن چیای سەركەشی دابان و چیای چەرماوەند.
هۆمەرقەوم گوندێكی خنجیلانەی دڵگیرە بەتەنیشت ناحێی سورداش و رۆژئاوای گوندی شەدەڵەوە، لە کۆتایی دۆڵی گەشتیاری مێرگەپان و بەرانبەر کلکەی چیای سەرکەشی پیرەمەگرون رووەوڕۆژ لەنگەری گرتووە.
ئەم گوندە هەژارنشینە لەپەلامارەكانی ئەنفالی قۆناغی یەكەمدا خەڵكەكەی ئاوارەی ئێران بوون، بەڵام بە پروپاگەندەی لێبوردنی گشتی گەراونەتەوە بۆ نیشتمان و سەرئەنجام ١٨ کوڕی گەنجیان خۆیان رادەستی جاشەكانی برایماغا[1] دەكەن و ئەویش رادەستی ئیستخباراتی تیپی ٢٤ی چوارقورنەیان دەكات و هەموویان ئەنفال دەكرێن.[2]
دەمێك بوو بەڵێنم دابوو سەردانی خانەوادەی ئەنفالكراوانی گوندی هۆمەرقەوم بكەم، سەرئەنجام پاشئەوەی گەیشتینە گوندمامۆستا شۆخان بەئۆتۆمبیلێكی ئۆپڵ هاتە پێشوازیمان و پێشمان كەوت بۆ بەردەم حەوشەو مالێكی دڵگیر .. ماڵی حەمە ئەمین حەمە سەعید و فاتمە عومەری هاوسەری لەوێ پێشوازییەكی زۆر گەرمیان لێكردین، دیاربوو پێشوەخت مامۆستا شۆخانی كچیان كورتەیەكی لەسەر گۆڤاری ئەنفالستان بۆ باسكردبوو، بۆیە پێویستی بەو پێشەكیە نەكرد كە پێیان بڵێین ئێمە كێین و ئامانجمان لەم دیدارە چیە . هەر زوو کامێرامان دابەست و چونینە ناو دیدارەکەمانەوە ئەوەی لێرە دەیخوێنیتەوە دیدارە لەگەڵ ژنێکی تەمەن هەڵکشاوی بەرەحم وپرلە سۆزی دایکایەتی کە ئەنفال لەناوەوەڕا هەڵیتەکاندووە. درێژەی دیدارەکە
[1] برایماغا ئێستا لەهەولێر لە شاری هەولێر دادەنیشیت و لایەن پارتی دیموکراتی کوردستانەوە داڵدەدراوە .
[2] تیپی ٢٤ ئەوسا سەربە فەیلەقی پێنجی سوپا بوو فەرماندەییەکەی لە چوارقورنە بوو لەسەر رێگای گشتی رانیە چوارقورنە فەرماندەی تیپەکە ناوی عەبد عون بوو پیاوێکی بەعسی توندرەفتارو دڵرەق بوو، لەپەلامارەکانی ئەنفالدا رۆڵێکی درندانەی بینی وزۆربەی ئەوکەسانەی ئەنفالکران لەم فیرقەیەوە ئاراستەی بەرێوەبەرایەتی ئەمنی هەولێرو لەوێشەوە رەوانەی تۆپزاوا کران .
