عومەر خورشید مەحمود: ژیان بۆ ئێمە زۆر ناخۆشە، پڕە لە ئازارونەهامەتی
عومەر خورشید مەحمود:
ژیان بۆ ئێمە زۆر ناخۆشە، پڕە لە ئازارونەهامەتی
ئاماددەكردنی : شادی غازی عبدالكریم
پرۆسەی ئەنفال جگە لەكوشتنی هەزاران مرۆڤی بێتاوانی كورد، هەموو كەسوكاری ئەنفالكراوانی توشی لێكترازان كردودەیان گرفتی كۆمەڵایەتی و ئابووری و دەروونی بەدوای خۆیدا هێنا, لە ناوچەی گەرمیاندا كە زۆرترین پشكی بەركەوت ژمارەیەكی زۆر لە بنەماڵەكان بە تەواوی لە ناوبران و ئەوانەشیان كە ڕزگاریان بووە ئاوارەو دەربەدەری ناوچەكانی دیكە بوون و ژیانیان بەكەم دەرامەتی بەڕێخستووە.
عومەر خورشید مەحمودی تەمەن ( 58 ) ساڵ چیرۆكی خۆی بۆ ئەنفالستان دەگێرێتەوەو دەلێت : ئێمە خەلكی گوندی عەزیزبەگی سەربە قەزای دووز خورماتووین خەلًكێكی زۆر لە گوندەكەمان ئەنفالكراوە خێزانەكانمان زۆریان ئەنفال كراون و هەندێكمان هیچ كەسێكی رزگاری نەبووە. من بۆخۆم ( 10 ) دە منداڵ وخێزانەكەم ئەنفالكراون واتە ( 11 ) یازدە ئەندامی خێزانەكەم لە نیسانی ساڵی 1988 ەوە گیراون و ئەنفالكراون و هەتاوەكو ئێستا چارەنوسیان نادیارە, لەناویاندا (4 ) چوار كوڕم بە ناوەكانی ( عەلی و سەروەر و كارزان و سیروان ) كچەكانیشم بە ناوەكانی ( خەدیجە و نەزیرەو سەوزە و جەیران و پەیمان وبەناز) لە هەمان كاتدا خێزانم دووگیان (حامیلە) بووەو لە كاتی منداڵ بوونیدا بووە كە ئەنفالكراوە, عەلی كوڕم پێشمەرگە بوو لە شەڕی عەزیزبەگ و تازەشارو تاڵاودا بەشداری كردووە. لە پاش ئەنفال تەنها لە گەڵ دوو كوڕمدا ڕزگارمان بوو. ساڵی 1992 دووبارە ژیانی هاوسەرگیریم پێك هێنایەوە لەم خێزانەی دیكەم (2) دوو كوڕو (2) دووكچم هەیە بە ناوەكانی ( چیا و ئامانج و سارا و ئالان ).
برایەكی دیكەم بەناوی( محمد خورشید) هەموو ئەندامانی خێزانەكەی كە ژمارەیان ( 10 ) دە كەسن ئەنفالكراون وچارەنوسیان نادیارە و خۆشی بە دەستی ڕەشی جەلادەكانی بەعس و بە هۆی تەیارەوە شەهیدبوو، تەنانەت هیچ یەكێك لە ئەندامانی خێزانەكەی ڕزگاریان نەبووە. برایەكی دیكەم بەناوی ( عوسمان خورشید ) لە پاش پرۆسەی ئەنفال تەنها خۆی و كوڕێك و كچێكی بە ناوەكانی ( ئەحمەد و نەزیرە ) ڕزگاریان بوو ( 16) شازدە كەس لە ئەندامانی خێزانەكەی ئەنفالكراوەو زیندەبەچاڵ كراون, ئەویش وەكو من بەردەوام لە ئازاری ئەنفالكراوانیدا ژیان دەباتە سەر, ژیانی تەنیایی ناچاری كرد دووبارە ژیانی هاوسەرگیری پێك بهێنێتەوەو لەم ژنەی دووەمیدا كچێكی بوو, بەڵام زۆری نەبرد كە ژنی دووەمیشی كۆچی دوایی كردو خۆشی لە گەڵ كچە ڕزگاربووەكەیدا لە ئەنفال بەهۆی ڕووداوی ئۆتۆمبیلەوە برینداربوون. بۆیە ژیان لە ئێستادا بۆ ئێمە زۆر ناخۆشەو پڕە لە ئازارو نەهامەتی.
سەبارەت بە باری ژیان و بژێوی ئەوساو ئێستای عومەر خورشید دەڵێت : ئێمە پێش ئەنفال لە گوندەكەی خۆماندا بەكشتوكاڵ و ئاژەڵداری ژیانی خۆمان دابین دەكرد، مەڕوو ماڵاتم هەبوو پێیانەوە خەریك بووم بەڵام ئەنفال سەروماڵی بەتاڵان بردین و گوندەكەمانی لەگەڵ زەوی تەختكرد، پاش ڕاپەڕینی ساڵی 1991 ئاوارە بووین بۆ ئێران ، كە لە ووڵاتی ئێران گەڕاینەوە نەچوینەوە بۆ گوندەكەی خۆمان لەبەرئەوەی هیچمان نەمابوو بۆیە لە هەڵەبجە نیشتەجێ بووین هەتاوەكو چەند ساڵێك لەمەوبەریش بە ئیشوكارەوە خەریك بووم، ڕۆژانە بۆ بژێوی ژیانمان بە كۆڵانەكانی هەڵەبجەدا دەگەڕام وكاسبیم دەكرد بەكڕین وفرۆشتنی نانە ووردەو شت كڕینی ماڵانەوە خەریك بووم بەڵام ئێستا پەكم كەوتووە و ناتوانم ئەوكارەش بكەم.
هەتا رۆژێكم لە ژیاندا مابێت منداڵە ئەنفالكراوەكانم لەیاد ناچن و بە بەردەوامی ئەگرێم بۆیان تەنانەت ناتوانم گوێم لە وشەی ئەنفال بێت, هەركات ناوی ئەنفال ئەهێنرێت من ژیانم بە گریان و ئازارەوە دەبەمە سەر.
