سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
كچە ئەنفالكراوەكانمان ناتوانن ببنە سەماكار.
كچە ئەنفالكراوەكانمان ناتوانن ببنە سەماكار.
عومەر محەمەد
٢٢/٦/٢٠٠٦ سلێمانی
ئەم وتارە لەرۆژگارێکدا نوسراوە کە خوێندنەوەی پێویست بوو لەوەش پێویستتر دەبوو حکومەتی هەرێم لەبری بێباکی و بەهەند نەگرتن ئەو رۆژنامەنوسەی لەو رۆژگارەدا بگرتایە کە ئەمرۆ بەنیازی دادگایی کردنێتی . بۆیە من ئێستاش خوێندنەوەی ئەم وتارەو چاودێری ئەوجۆرەکەسانە بەپێویست دەزانم بەهیوام کاتی خوێندنەوەیتان هەبێت .
ژمارە( 267 )ی[1] رۆژی ٢٨/٥/٢٠٠٦ میدیا چیرۆكە هەواڵێكی دڵشكێنەری بڵاوكردووەتەوە، كەمانشێتەكەی هیچ هەست‌وسۆزیكی كەسوكاری ئەنفالكراوانی لەبەرچاونەگرتووە، بەتایبەتی ئەوانەی كچانیان ئەنفالكراوە‌و ناوییان لە بەڵگەنامەكەی موخابەراتی كەركوكدایە، بێگومان ئەمجۆرە دەربرینانە ناوی كەسوكاری ئەنفالەكراوەكان هەلاهەلا دەكات، بەڵام راگەیاندنی كوردی بەگشتی گوێ ناداتە ئەوحاڵەتە سایكۆلۆژییە‌و هەموو رۆژێ برینیان دەكولێننەوە. بەداخەوە بڵاوكراوەی میدیا دەبوایە پێش هەرلایەك ئەمەی بەهەند بگرتایە‌ومانشێتی ئەو چیرۆكە هەواڵەی بە جۆرێكی وادابرشتایە، كە بەدوربێت لەبرینداركردنەوەی هەستی ئەومرۆڤانەی هەژدە سالە دلیاندەشكێت، لەبەرئەوەی (میدیا )خۆی یەكێكە لەوبڵاوكراوانەی گرنگی بەپرسی ئەنفال دەدات‌و بۆخۆشی نمونەیەكی لەو ئازارە هێناوەتەوەو لە هەمان ژمارەدا پێماندەڵێت : كە “ژنێك ئاواتی خواستووە براژنەكەی كیمیایی بیكوشتایە بەلام ئەنفالنەكرایە، تا بەدەردی ئەوكارەكتەرە نە چوایە كەلە فلمێكی دیكۆمینتی (مانۆخەلیل )دا بینێوێتی”. هەڵبەت خوێندنەوەی سایكۆلۆژییەتی كەسوكاری ئەنفالكراوەكان ئەركی هەموو لایەكمانە. وەلێ ئەفسوس… ئێمە بەئەركی خۆمان هەڵناستین. [2]
لێرەدا ئەوەی لەسەری دەوەستین، ئەوچیرۆكە هەواڵەی رۆژنامەنوسەكەی تەلەفزیونی زاگرۆسە، ئەو هەواڵەی كەوا كارەكتەرەكانی كەموو زۆر پەیوەندییان بەئەنفالەوە نیە‌و جارێكی تر هەموومرۆڤێكی تەندروستی ڕاچڵەكاندەوە، ئەگەرچی بەش بەحاڵی خۆم، هەواڵەكەم پێقوت نەچوو، ڕاستە ئەم هەواڵەش بێبناغە نیە، بەڵام ناتوانم ئەو قەناعەتەشم بگۆرم، بۆیە هەر زووبەنیاز بووم بیروڕاكانمی لەبارەوە بڵاوبكەمەوە، بەلام نەبوونی كارەبا، كارەكەی دواخستم. بەهیوام لەم بارەیەوە تیشكیك بخەمە سەرلایەنە تەموو مژاوییەكانی ئەوهەواڵەی من بە وردی خوێندومەتەوە‌و میدیا بەدیقەتیەكی رۆژنامەنوسی كەمەوە بڵاویكردوەتەوە. هەڵبەت حیكایەتەكانی ئەنفال زۆر لەوە تراژیدی ترو كاریگەرترن كە بیستوومان‌وبینیومانن، بەڵام ئەوهەوالەی ئێستا قسەی لەسەر دەكەین پێم وایە زەرەری بڵاوكردنەوەی گەلێك لە قازانجی زیاتربووە.
نوسەرەكە هەرلەسەرەتاوە لەدەرگایەكی تەنگەبەرەوە چووەتە ناوباسەكەوە‌و لە دەلاقەیەكی گچكەوە شارستانیەتی وڵاتی میسر‌وحەوشەوبانی ماڵی كوردو تراژیدیای ئەنفال تەماشادەكات، باسەرنج بدەین ” ئەو هێشتا كوردستانی بەجێنەهێشتووە” كە چەترێكی بۆخەیاڵاتەكانی خۆی لەبارەی كچانی فرۆشراوەوە هەڵداوەوبریاری دۆزینەوەیاندەدات؟!
هەژاری ئەوبرایە لەوەدا دیارە كاتێك پێمان دەڵێت: ( رۆژێك بەرلەرۆیشتنی بەرێكەوت ئەو ژمارەیەی میدیای بەرچاوكەوتووە كەباس لەوبەڵگەنامەیەی موخابەراتی كەركوك دەكات !) ئەمە ڕاستە؟ كەس هەیە هەواڵی ئەو بەڵگەنامەی فرۆشتنی هەژدە مرۆڤە ئەنفالكراوەكەی نەبیستبێت؟ ئایا لە پاش 3 ساڵ بڵاوبوونەوەی هەواڵەكە، بەتایبەتی بۆ رۆژنامەنوسێكی! كورد كاری رێكەوتە؟ خۆ برای رۆژنامەنوسم كاك عەبدوڵاكەریم لە سالی(2003)وە، زۆر لەپیش میدیاوە بۆیەكەمجار لە رۆژنامەی كوردستانی نوێی ژمارە(3100) دا ئەم بەڵگەنامەیەی بڵاوكردەوە، ئەو سەروەختە هەواڵەكە نەك هەرلە كوردستان بەڵكو لەسەرئاستی دنیاش دەنگدانەوەیەكی زۆری هەبوو! پێم سەیرە خوێنەرێك چ جای رۆژنامەنوسێك ! هەبووبێت، تامانگی 5ی سالی 2006 ئەو هەواڵەی نەبیستبێت !؟([3])
با ئەمەشی بەكەمتەرخەمی بۆدابنێین. بەڵام خۆ هەر لە 14/4/2006وە بۆ دیاری كردنی چارەنوسی ئەو 18 كچە، ناوەندی هەڵەبجە _( چاك) لەسەرانسەری ئەوروپا لەبەردەمی سەفارەتەكانی میسر سەرقالی خۆپیشاندان بوون‌و لێرەش بێدەنگنەبوون، ئەمە جگە لەوەی رێكخراوەكە لە 16/ی 3ی هەمان ساڵەوە، بریاری ئەوەی دابوو كەوا ئەم چالاكیانە دەكات‌و لە ناوەندەكانی راگەیاندنیشەوە بەتایبەتی لە ماڵپەرە ئەلەكترۆنییەكانەوە بانگەوازیان بۆبڵاودەكردەوە‌و رای گشتی جیهان‌و كوردستانیان بۆ هەڵدەخراند. سەرەئەنجام چالاكییەكانیان كردوو سەفارەتی میسریان لە ئەوروپا توشی ئیحراجی یەكی زۆركرد، ئەی چۆنە ئەو برا رۆژنامەنوسە ئاگاداری ئەمەیان نیە؟ ئایا لەم هەوڵانەش هەر بێئاگابووە ؟!!
سەیرەكە ئەوەیە چالاكیەكانی (ناوەندی چاك) لە كاتێكدا بوون كە ئەو خەریكی گەشتەكەی بوو، بۆ میسر، خۆپیشاندانی كوردەكانی هەندەران هێشتا بەردەوامبوون‌و سەفارەتی میسریان بەتەواوی بەگیروگاز هێنابوو.. عەجایەب رۆژنامەنوسێك ئاگاداری ئەو چالاكیانەو كێشەیەكی ئاوا گرنگ نیە؟ ئەوەی جێگەی پرسیارە ئەوەیە كە بەرێكەوت رۆژێك پێش رۆیشتنی بۆمیسر ئەو ژمارەیەی میدیای بەرچاوكەوتووە؟! كە بەڵگەنامەكەی موخابەراتی كەركوكی تێدا بووە؟ باشە چۆن یەكسەر بروای بەمیدیاو ئەو بەڵگەنامەیە كرد؟ چۆن هەر یەكسەر پێش رۆیشتنی بریاریدا، بەدوای ئەم پرسە گەورەیەدا بچێت؟!
رۆژنامەنوس ! دەگاتە قاهرە‌و لەناولیژنەیەكی ئەمنی زۆربەهێزدا كچانی ئەنفالكراو دەدۆزێتەوە !
ئەو برایە دەڵێت: هەرلە پێشوازیدا پلەدارێكی ئاسایشی میسری (ئەمن) سەرۆكی كۆمپانیا یەمەنیەكەی ئاگاداركردووە كە ئەوانە عێراقین (سەرنج بدەرە تەئكیدی نوسەر) ئەویش ووتی: بەڵی عێراقین‌و كوردن ! ( ئەمەش تەئكیدی دووەمە)( ئایا دەزگای هەواڵگری میسر، كە ئەو سەروەختە باڵوێزەكانی لە ئەوروپا كەوتبوونە ژێر فشاری خۆپیشاندەرانی كوردەوە، بۆ دیاریكردنی چارەنوسی ئەو 18 كچەی كە رۆژنامەنوسەكەمان بەنیازە سۆراخیانبكات. هیچ حسابێك بۆمیوانەكانی بەتایبەتی( كوردی عێراق) ناكات ؟ ئەوكەسانەی كەدەچنە نادییەكان‌و ئەوانەشی لەوێ كاردەكەن (بەتایبەتی كوردەكان) هیچ چاودێرییەكیان لەسەرنیە ؟! بۆئەوەی لەبەڵای ئەو بەڵگەنامەیە بیانپارێزێ ؟ ئینجا پاش ئەوەی پلەدارەكە سەرۆكی كۆمپانیا یەمەنیەكە ئاگادار دەكاتەوە لەوەی كە “كوردن” كاكە فەرمان دەڵێت ئەمە بۆخەیاڵەكەی من زۆر گرنگ بوو! بەڵام شێخ رەزا ووتەنی (شیڕڕڕڕ وانەبوو) چونكە پێچەوانەكەی ڕاستە، دەبوایە كاكە فەرمان بزانێت، مادام موخابەراتی میسر یان دەزگا ئەمنیەكانی ئەو وڵاتە تەئكید لەهاتنی كورد دەكەنەوە بۆ ناو هوتێلەكە ئیتر ڕیسەكەی لێدەبێتەوە بەخوری، ئەمەش ئەگەری هاتنەدی خەونەكەی (ئەوبرادەرە) زۆر زەحمەت تردەكات، نەك ئاسانتری بكات وەك ئەوبۆی چووە. بەتایبەتیش لەبەرئەوەی كاكە كوردەو بۆنەگبەتیش رۆژنامەنوسەو خەڵكی كوردستانی عێراقیشە.! لەوەش خراپتر خەڵکی شارەكەی سەحەرالكوردیشە. !!
من نازانم رۆژنامەنوسەكەمان چۆن‌و بەچ ریگایەك هەوڵیداوە كچی كورد” ئەوانەی ئەنفالكراون، نەك بۆسیاحەت چوون” بدۆزیتەوە ؟ ئایا بەپرسیاركردنی هاكەزایی؟ یان بەكەراماتی غەیبی؟ بەكام عەصای سیحری ئەم كچانە دەدۆزێتەوە؟ بۆچی لەو میسرە گەورەیەدا كابرا یەكەو ڕاست رێی كەوتە ئەو هوتێلەی كە كچە ئەنفالكراوەكانی تێدان !؟ ئایا چەند هوتێلی تر بەدوایاندا گەرابوو؟ چەندە پێیانەوە ماندوو بووە؟ بێگومان ئەمە رێكەوتێكی ئەفسوناویە ! باوای دابنێین رێكەوتێكی مێژووییە من پێموایە ئەوكچانەی كە بۆمیسر نێردراون، بەتایبەتی منداڵانی خوارتەمەن 10ساڵان ئێستا هەموو مۆركێكی –نەتەوەیی كوردیان لێسەندراوەتەوە، بۆیە دۆزینەوەشیان هەروا كارێكی ئاسان نیە، ئەوە جگەلەوەی هەوڵێكی زۆر ورد‌وسەرمایەیەكی گەورەشی دەوێت، چونكە ئەوانە لە هەلومەرجێكی زۆر نائاسایی (قۆناغەكانی ئەنفال)دا لەرێگەی موخابەراتەوە براون، نەك تۆ لە باڕێكدا دابنیشی پارە پەخش بكەیت‌و ئەوانیش بێن‌و بڵێن فەرموو “كاكە” ئێمە ئەنفالكراوین وەرن بمانبەنەوە بۆ كوردستان ! پێموایە ئەمە بەعەقلی هەموو كەسدا نەچێت.
ئەگەر حكومەتی میسر ئەوكارەی دەرهەق بەكچانی كورد كردبێت لە ئەنفالدا ( هەرچەندە بروام وایە كردوویەتی) هەروا بەو ئاسانیە‌و بە ئازادی رێگەی ناو هۆڵی نادییەكانی شەوانەیان نادات، چ جای ئەوەی بەناوی نەتەوەی خۆشیانەوە بناسرێن ! ( ئەمە تێڕامانی زۆری گەرەكە..) لەكاتێكدا كاك فەرمان خۆی لەوهوتێلە نامۆ بووە، چاوكراوە نەبووە، كارمەندێك نەبووە بۆماوەیەكی درێژ لەوێندەرێ كاری كردبێت تابتوانێت بەشێوەیەكی ورد بە دوای ئەوپرسە ئالۆزەدا بگەرێت، ئەگەر ئەوكچانە دۆزینەوەیان هێندە بێسەرئێشە بوایە ئەوا دڵسۆزێكیان بۆ پەیدا دەبوو بۆیان بچێتە میسرو ببێتە شاگردێك، كارگوزارێكی ئەوهوتیڵانەو بە سۆراخیانەوە بوایە. بۆیە من بە كارێكی مەحاڵی دەزانم ، ئێمە هەروا بەو ئاسانییەی رۆژنامەنوسەكەی میدیا باسیی لێوەكردوون سۆراخی ئەو مرۆڤە ئەنفالكراوانەمان بكەین‌وبەو شێوازە چارەنوسیان بەدیار بكەوێت.
چیرۆكی دۆزینەوەی سەحەر الكوردی
چیرۆكی دۆزینەوەی سەحەر بە جۆرە سیناریویەك دەزانم كە پێشوەخت ئامادەكرابێت، سیناریوێكەش بە دوو دیودادەبینم، یان رۆژنامەنوسەكە لە خەیاڵیی خۆیدا بۆسەفقەیەكی رۆژنامەنوسی هەڵی بەستووە، ( كە ئەمەیان ئەگەرێكی لاوازە) یان ئەوەتا كارێكی موخابەراتییە‌و لەپشتی رۆژنامەنوسە كەشەوە نەخشەی بۆكێشراوەو بۆمەبەستێك ئامادە كراوە‌و خۆشی كەمێك ترش‌و خوێی كردووە، مەبەستیش هەرئەوەیە دۆسێی ( 18) كچەكە بخەنە تەمومژەوە، ئەوەش دوای ئەو فشارەی ناوەندی (چاك)دێت كە لەدەرەوە لەسەر باڵوێزەكانی میسر هەیە.
لێرەدا چەند پرسیارێك خۆیان قووت دەكەنەوە، بۆیە سەرنجی خۆێنەری خۆشەویست ڕادەكیشم كەوا ئەوانیش لای خویانەوە سەرنج بدەن:
ئایا حكومەتی میسر چۆن لێگەرا لەپاش بڵاوبوونەوەی ئەو بەڵگەنامەیەوە ئەوكچانە هەر لە ناو نادیەكانی شەوانە(نادی کلاپ)ی ئەو وڵاتەدا بمێننەوە؟ كە ماویشنەتەوە چۆن ئەوەندە ئازادن هەتا بەدوای سەرەداوی گەڕانەوەدا بگەرێن بۆ كوردستان؟ خۆ هەتا ئێستا ناوەندی چاك‌و سەفارەتی میسر لەمشت‌ومردان؟ هەر ئەو ناوەندە چەندین وڵاتی خۆرئاواشیان لەو تاوانەی میسرو حكومەتی بەعس گاداركردووەتەوە. هەندێك لەئەندام پەرلەمانەكانیان هەڵوێستی باشیان هەبووە، سەفارەتەكانی میسر هێندە كەوتبوونە تەنگانەوە لەوڵاتانی خۆرئاوا داوایان لە نوێنەرەكانی ناوەندی چاك كردبوو كە خۆپیشاندان نەكەن، ئەوەشیان ووتبوو هەر هیچ نەبێت لافیتەكانتان بە زمانی عەرەبی یان كوردی بنوسن‌و بەزمانی ئەو وڵاتانە مەینوسن، مامەحەمەیی ئەوەشیان کردبوو گوایە ئێمە لەگەڵ كورد براین‌و ئەمە بۆ وڵاتەكەمان زۆر خراپە([4])
تۆبڵێی سەفارەتەكانی میسر هێندە خەمساردبن ئەم مەسەلەیان بە حكومەتەكەیان نەگەیاندبێت؟.. ئەگەروابێت موخابەراتی میسر فاشلترین موخابەراتی دنیایە، كەوانیە !! باشە ئەو برا رۆژنامەنوسەمان یەكەم كەسە چووبێتە وڵاتی میسر؟ یەكەم كەسە بچێتە ئەو نادیانەو خۆی بەكورد بناسێنێ ؟ لەوەش گرنگتر ئەوەیە كە كاك فەرمان یەكەم كەسە بەدوایاندا گەرابێت ؟ ئایا هیچ رێوشوێنێكی وای گرتبووەبەر كە ئەو كچە (سەحەر) ناچاربكات هەتا وازلەرەقص بهینێ‌‌و بچێتە سەرمێزەكەی‌و گەورەترین نهێنی‌و گرێی دەرونی خۆی بۆبكاتەوە ؟
وەك لەگێرانەوەكەیدا دیارە، (ئەگەر راست بکات) ئەو برایە هیچ رێوشوێنێكی وای نەگرتووەتەبەر. بەڵكو كچە سەما كەرەكە خۆی هاتووە خۆی پێناساندووە. ئەمەش لە كاری موخابەراتی میسر دەچێت نەك ئەوكچە ڕاستەقینە ئەنفالكراوەی ئێمە بەدوایدا وێڵین.
رۆژنامەنوسەكەمان دەڵێت: هەموو شەوێك خۆم وەك كوردێكی عێراقی دەناساند، بۆئەوەی هەر كوردێك لەو شوێنە هەبێت بێت‌و خۆیم پێبناسێنێ؟ بروام وایە گرتنە بەری وەها رێوشوێنێك ( لەگەڵ رێزیكی زۆرم بۆ ئەو برایە)جگە لەوەی زۆر ساویلكانەیە، خوێنەر زیاتر دەخاتە گومانی ڕاستی چیرۆكە كەوە، ئەمە ئەگەر هەرشەوەی لە هوتێلێكدا بوایە دەمانگوت بەجدی گەڕاوە، بەڵام لە هەمان ئەو شوێنەدا لەشەوی 11هەمینی سەفەرەكەیدا گۆدۆی ئەنفالكراو( سەحەر ئەلكوردی) تەمەن 28بۆ30 ساڵ؟ پەیدا دەبێت، ئەمە گومانەكان زیاتر دەكەن. دڵنیام كچانی كورد( كوژراون، فرۆشراون، دابەشكراون. هتد) بەڵام بۆچی ئەو كچانەی نێردراون بۆ وڵاتە عەرەبیەكان ئیلا‌وبیلا هەردەبێت بۆ مەلهاو نادییەكان برابن؟ بۆدەبێت هەموویان كرابنە سەماكەری سەرشانۆی هوتێلەكان.؟! بەش بەحالێ خۆم ئەمە بەڕاست نازانم. ڕاستە بەڵگەنامەكەی بەرێوەبەراتی موخابەراتی كەركوك وامان پێدەلێت. بەڵام خۆ ئەوە رێی تێناچێت بەنادیە ئەهلی‌وگشتیەكان فرۆشرابن.
دیسانەوە پرسیار گەلێكی تردێنە پێشێ، ئایا هونەری سەماكاری هەروا كارێكی سوك‌و ئاسانە هەموو كەس ئەسپی خۆی تێدا تاوبدات؟ بێگومان ئەوانەی دەبنە سەماكار لەو نادی‌و هۆتێلانەدا دەبێت بەلای كەمەوە سەماكاری پرۆفیشناڵ بن، باشە كچێكی ئەنفال! لە تەمەنی دەساڵییەوە چەندە دەرفەتی هەبووە‌و خەریكی خۆراهێنان بووە؟ باواز لەكۆلیژ‌و پەیمانگاش بهێنین، چەند دەورەی بینیوە تا دەبێتە ئەو سەماكارەی هۆتیلەڕاقیەكان قبوڵی بكەن. كێ ئەو چاكەیەی لەگەڵكردوو ئەو دەرفەتەی بۆ رەخساند؟ موخابەراتی میسر؟! یان رێكخراوە مرۆڤدۆستەكانی ئەو وڵاتە؟ بەقسەی رۆژنامەنوسەكەمان بێت لە زمانی سەحەرەوە ئەولە میسر بووەتە ژنی پیاوێكی دەوڵەمەند ! لە بەرمنداڵبوونیشی چەند سالێك بەخێویانكردووە‌و مارە یانكردووە‌و دواتر بووەتە ژنی كوڕێكی دەوڵەمەند‌و دوومنداڵی بووەو ئینجا دەبێتە دایكێكی دڵشكاو چونكە منداڵەكانی لێزەوتكراوە ( بێئەوەی ناوی مندالەكانی بزانین ؟!) ئیدی لەكوێ فێری سەماكردن بوو؟ چۆن كاتی بۆرەخسا؟ چەندی كات ویست هەتابووە سەماكاریكی بەناوبانگی قاهرە !؟ ئەمە رێی تێناچێت. با ئەوەش بە کاکە فەرمان بڵێم ئەوەی دەیەوێت لە هونەری سەماكاری وڵاتی میسر تێبگات بابفەرموویت كتێبە بەناوبانگەكەی رۆژنامەنوسی بەناو بانگی ئوسترالی (جیرالدین برۆكس)*[5] بخوێنێتەوە، هەروەها ئەو كتێبە خزمەتێكی زۆری ئەو كەسانەش دەكات كە تاكو ئیستا وای بۆدەچن كچانی ئەنفالكراو لە هۆتیلەكانی وڵاتی میسر خەریكی كاری (سەما)كارین، لەبەرئەوەی ئەو رۆژنامەنوسە بە جۆرێك باسی هونەری سەماكاری میسریمان بۆدەكات، كە ئەستەمە كچێك یان ژنێك خەڵکی ئەو وڵاتە نەبیت بتوانێ فێری هونەری سەمای میسری بێت. بەتایبەتی بروانە بەشی دوانزە هەمی ئەو كتیبە (كچانی خوا) كەباس لە بەرزی‌و ئالۆزی هونەری سەمای شەرقی دەكات.
بۆچی ئەوكچە كوردانەی ئێمە لەو نادیانەدا قاپشۆرنەبن ؟ بۆچی پاككەرەوە نەبن؟ ئێ بۆ هەر راقصە؟ خۆ ئەگەربێت‌و ئەمكارە نامرۆڤانەیە لە نێوان موخابەراتی دوو لایەندا بووبێت، موخابەراتی بەعسیش لایەنێكی بووبێت چۆن كارئاسانیان بۆ كرا كە بەبای باڵ ببنە سەماكاری بەناوبانگی هۆتیلەكانی قاهرە؟ کورد دەڵێت عەقڵ بۆ مرۆڤ باشە، ( چما بونە سەماكاری بەناوبانگ گەمەی منداڵانە؟) با ئەوەش لەولاوە بووەستێت كە كەسانێكی ئەنفالكراو، دڵشكاوی ناو قۆناغەكانی كۆكردنەوەو گواستنەوەی ئەنفال‌و مەرگەساتی تۆپزاوایان بەچاوی خۆیان بینیبێ ئەوا زۆر ئەستەمە ئەمانە بەو هەموو باگراوەندی ترس‌و خۆفەوە ببنە سەما كارێكی باش لەو هۆتێلانەی كە رۆژنامەنوسەكەی میدیا باسیان لێدەكات.
سەیر لەوەدایە كە سەحەر دێتە لایەوە هەر لەبەرئەوەی حەشیشە كیش بووە ئەم ترساوە لەوەی توشی شتێكیان بكات؟ ئەی ئەو بریاری نەدابوو بەدوای چارەنوسیاندا بگەرێت؟ بۆمەگەر گەران بەدوای چارەنوسی ئەوكچانەدا هەروا ئاسانە؟ بێگومان نەخێر، بەڵكو وەك ئەوە وایە لەناو كێڵگەی میندا بجوڵێیتەوە، كەچی بێئەوەی هیچ بووبێت، ئەو ترساوە توشیان بكات‌و بەگرتنیان بدات؟! ئەمە جگەلەوەی پێناچێت هیچ كام لەو سەماكارانە بڕوای بەو پیاوانە هەبێت كە دەچنە ئەو بارو هۆتێلانە‌وە كە گەمەیان لەگەڵ دەكەن‌و پارەیان بەسەردا دەبەشنەوە، ئێ باشە خۆ سەحەر علمی فەلەكی نەبوو بزانێت ئەو برا كوردە هەرلە هەولێرەوە بریاریداوە بەدوای چارەنوسی ئەو كچە ئەنفالكراوانەدا بگەرێ؟ بەڵام سەماكارەكان خۆیان دەزانن چۆن دەماری ئەو پیاوانە دەگرن، دەزانن ئەوەی دەیڵێن لە درۆیەكی رووت بەولاوە شتێكی ترنیە، من نە چوومەتە مەلها بەڵام وای بۆ دەچم هەزار سوێند لە مەلها بەپولێك بێت، لەوێندەرێ ئەوەی لە قەیراندایە بڕواو متمانەیە، ئیدی نازانین كاكە فەرمان چی سوێندێكی بۆ خواردووە هەتا سەحەر باوەری پێبكات ؟ من دڵنیام ئەگەر كچە ئەنفالكراوێك لەو هۆتیلانە هەبێت هەرگیز بەو شێوازە هەوڵی دەربازبوون نادات، مەگەر بۆ ماوەیەكی دورودرێژ پەیوەندی لەگەڵ پیاوێكدا دروست بوبێت‌و سەرەتایەكی بروا بەیەك بوون‌و مرۆڤانە دروست بێت لە نێوانیاندا. ئەمەش جگەلەوەی ئەگەرێكی لاواز‌و دەگمەنە، مەودایەكی دورودرێژیشی گەرەكە لەوكەش‌و هەوایەدا متمانە دروست بێت.
ئافرەتانی ناو ئەوباڕانە ( نەك سەماكارە بەناوبانگەكان) بەگشتی بێئومێد‌و نامەسئول‌و رەشبین‌و دڵشكاون، بەتایبەتی كچێك لە ئەنفال رزگاری بووبێت‌و لەرێگەی موخابەراتەوە بە زۆر برابێتە میسر بە مەبەستی تێكشكان‌و سوكایەتی پێكردنی بیكەنە راقصە‌و تراژیدیای ئەنفالیشی لەبیرمابێ ! بەڵام عەقلم نایبرێ بە پێچەوانەوە بروام وایە ئەوانەی بەفیتی موخابەرات برابنە میسر بەخەونیش ئەو هوتیلانە نابینن كە ڕۆژنامەنوسەكەمان باسیان دەكات. بەڵام باگریمانەی ئەوە بكەین، هەموویان لەو هوتیلانە دانراون و لە وێندەرێ كاریان هەیە، ئەی تۆبلێی لە پاش خۆپیشاندانەكانی كوردانی ئەوروپاشدا موخابەراتی میسر هێندە لەوموشكیلەیە بێخەم‌و بێدەربەست بووبێت ؟چۆن هیچ هەنگاوێكی بۆ شاردنەوەیان نەناوە؟ ئەمەشم بەعەقلدا ناچێت.
بێگومان موخابەراتی میسر نەك هەر بێخەم نیە لەو كێشەیە بەڵكو مەترسی ئەوەم هەیە هەرلە دوای دەركەوتنی بەڵگەنامەكەوە ئەو مرۆڤانەش بەهەمان دەردی ئەنفالكراوەكانی تر برابن، هەرئێستا هەواڵی ئەوە هەیە ئەو هۆتێلەشی داخستبێت كە فرمان لێی دابەزیووە. ئەگەر ئەوهەواڵە ڕاستبێت، كەواتە موخابەراتی میسر نەك هەر لەناوخۆ بەڵكو لە كوردستانیش كار دەكات، دەنا بڵاوكراوەی میدیا نە بەزمانی عەرەبی دەردەچێ‌‌و نەرۆژنامەیەكی هێندە ناسراویشە، لەشەقامەكانی قاهرە بفرۆشرێ. تابەهۆی هەوالێكی یەوە هوتێلێك دابخات. !
بەسەرهاتی (سەحەرئەلكوردی)
سەرنج بدەن، سەحەر بە فەرمان دەلێت ( من ناوم سەحەر ئەلكوەردیە بەڵام ناوی ڕاستە قینەی خۆم ((رۆژگارە)) لە شاری هەولێر گەرەكی تەعجیل بووین. لە سالی 1988 كە بەسەردان چوبووینە ماڵی باپیرەم لە دەور‌وبەری كۆیە هێرشی حكومەت هات و ئەنفالكراین. ئەوەی كەمن لەبیرمە دوو خوشكی دیكەشم هەبوو، برایەكیشم هەبوو، دایكم زۆر زۆر جوان بوو ئەو جوانییەی من كە ئێستا دەیبینی رەنگی دایكمم هەڵگرتووە، كە لەلای كەركوك زیندان بووین لە دایكم‌و باوكم جیاكراینەوە دواتر منیان برد نازانم خوشكەكانی ترم ماون یان بۆكۆێیان بردن كە منیان برد چاویان بەستم بردمیان بۆ دائیرەی ئەمنی كەركوك لەوێ شەوماینەوە بۆبەیانی زانیم كچی دیكەم لەگەڵدان هتد..). باشە ئینجا باقسەکانی فەرمان و سەحەر وردبکەینەوەو سەرنجیان بدەین ، (سەحەر) تەمەنی دەساڵان بووە دەزانێ ماڵیان لە هەولێر بووە، ناوی گەرەكی خۆیانی لە بیرماوە بەڵام ئەو ناوی دراوسێیەكی خۆی لەبیر نەمابوو؟ ناوی مامۆستایەكی قوتابخانەكەی ناوی باوك‌و باپیرەی‌و ناوی گوندەكەیان لە كۆیە هیچی دیارنین و بەشاراوەیی ماونەتەوە!، ئەوەی باسی لێوەكردووە قەڵای هەولێرە‌و ئەنفالی ناوچەی كۆیەیە كە ئەمانەش زانیاری گشتین‌و گرێكوێرەكان ناكەنەوە، بەڵكو گومانەكە پتر دەكەن.
دیسانەوە پرسیارێكی دی خۆی قوت دەكاتەوە ئەنفالی دەشتی كۆیە قۆناغی چوارەمە، ئەو سەروەختە گوندەكانی كوردستان ئاگرباران‌و لەڕاستیدا رۆژی حەشر بوون، ئەنفالچی نەبێت كێ دەیتوانی بچێتە گوندەكان ؟ سێ قۆناغی تری ئۆپەراسیۆنە سەربازییەکان لە پێش ئەنفالی چواردا بەرێوەچوون‌و هەواڵی وێرانكردنی گەرمیان گەیشتە دوا كونجی ئەم وڵاتە، ئەوسا خەڵك لە گوندەوە بەدزییەوە‌و بەهەزار دەردەسەری تاكو تەرا خۆیان بە شارەكاندا دەكرد، نەك لە شارەوە خەڵكی چوبێت بۆ گوند چ جای ئەوەی بچن بۆ سەردان‌و ماوەیەكیش لەوێ بمێننەوە؟! ئەمە لەگەڵ بریاری 4008ی ساڵی 1987ی نوسینگەی باكور‌و فەرمانەكەی عەلی حەسەن مجیدیش یەكناگرێتەوە كەدەڵێت: هاتووچۆ لەوێوە بۆشار‌و لە شارەوە بۆ ئەوناوچانە قەدەغەیەو هەر زیندەوەرێك تیایدا مەحكومە بەكوشتن. ئەمە گرێیەكی تری هەواڵەكەیە، بەكورتی هۆنینەوەی ئەوچیرۆكە سیناریویەكی سەرنەكەوتووە.
سەحەر لە میسر دەفرۆشرێتە میسرییەكی دەوڵەمند؟ بەڵام بەڵگەنامەكە دەڵێت بۆنادی شەوانەی میسر ئامادە كراون؟ نەك بۆدەوڵەمەندانی وێندەرێ؟ بیستوومە میسریە دەوڵەمەندەكان كارەكەر رادەگرن بەلام نەمبیستووە مرۆڤ ( مەگەر موخابەراتەكەیان) بكڕن، چ جای ئەوەی مارەی بكەن‌و وەچەی لێبخەنەوە ! دوای تەڵاقدانیشی سەحەردەچێتە هوتیلەكان بۆ كاركردن، دەلێت {چارم نەما هەردەبوایە چووبام لەو یانە شەوانیانە كاربكەم”كار نەك سەما ؟” لەسەرتادا وەكو كوردێك بەوە قایل نەبووم بەڵام هەردەبوایە بچم … باشە ئەوئافرەتە غەدر لێكراوانەی ئێمە بۆ هەر مەرجە لەویانە شەوانانە دابن؟ بۆچی حوکمە کارەکانیان هەرلەو هۆتێلانەدابن ؟ ئەمە هەرلەبەر ئەوەی ئەو بەڵگەنامەیەی موخابەراتی كەركوك باسی چۆنیتی فرۆشتنی ئەوكچانە بەیانەكانی شەوانەی میسر دەكات، (نەك چونیان بەرەزامەندی خۆیان !) ئیدی هۆنینەوەی چیرۆكەكە ئەگەر بەو یانانەوە نەبەسترێتەوە یەكێتی بابەتەكەی “حیكایەتخوان” دەشێوێت.
باشە خۆ ئیخوان موسلمین هەر لەمیسری عەرەبی دامەزراوەوگەورەترین تۆری رێكخستنیشیان لەوڵاتی میسردایەوكارێكی زۆریش لەسەر ئەوئینسانە تێكشكاوانە دەكەن، بۆ ئەوەی رایانكێشنە ریزەكانی خۆیانەوە، ئەی چۆنە ئەوان نەیانقۆستۆتەوە‌و نەیانكردووەتە وەرقەیەك بۆ ئابروبردنی حكومەتی میسر؟ ئەی بۆچی سەحەر ئەلكوردی”رۆژگار” یان یەكێك لەو 200 كچەی تر ئێستا ئافرەتێكی حجاب لەسەری ناو ریزەكانی ئیخوان نین؟ خۆئافرەتی كورد ئەگەر دوو رێگای لەبەردەمدا بێت رێگای نادی‌و رێگای مزگەوت بە دڵنیاییەوە رێگەی مزگەوت دەگرێتە بەر. ئیتر بۆچی هەر دەبێت كارەكتەرێكی ناویانەكانی شەوانەی میسر بێت لە كاتێكدا هێشتا خەسڵەتی كوردانەی خۆی لەبیرەو دەڵێت وەك كوردێك نەمدەویست ئەو كارە بكەم؟ (تەئكید هی ئەوە) كەواتە ئەو ئارەزوو مەندانە چووەتە نادییەكان نەك موخابەرات وەك كچە ئەنفالكراوێك بە زۆری بردبێتی. ئەمەش پێچەوانەی بەڵگەنامەكەیە.
سەیر لەوەدایە پاش ئەوەی فەرمان باسی بەڵگەنامەكەی موخابەراتی كەركوكی بۆ دەكات سەحەر زانیاری ئەوەشی هەیە ! كەوا كچانی كورد تەنها ئەو هەژدە كچەنین كە فرۆشراون، بەڵكو تەنها لەوڵاتی میسر باس لە (200) كەسی لەو جۆرە دەكات، ئینجا ئەوەش دەزانێت كەوا لەوڵاتی (سعودوكوێت‌وئوردن)یش ئەم كچە فرۆشروانە هەن، بەڵام نازانین پەیوەندی ئەو بەوكچانەی ترەوە چۆنە؟ چۆن دەزانێت لەوڵاتانی تریش كچی ئەنفالكراو هەن ؟ ئایا هەر قسەی خەڵكن یان شتێكی لەو بارەیەوە پێیە؟ ئایا سەحەر تەنها سەماكارێكە بۆنان پەیدا كردن؟ ئایا زانیاری ئەوەی لایە كەوا كوردەكان ئێستا ئەو مەسەلەیەیان كردووەتە خەمێكی خۆیان؟ كە دەزانێت چۆن سەرچاوەی زانیاریەكانی چین‌و كامانەن؟ ئەمانە كۆمەڵە پرسێكبوون كەوا فەرمان دەبوایە وەك رۆژنامەنوسێكی خەمخۆر لەسەحەریانبكات. بەڵام بۆ نەیكردووە وەڵامەكە لای خۆیەتی.
دوو سەماكاری بەناوبانگی قاهرە :
سەرنج بدەن،هەردوو كچەكە یان هەردوو پاڵەوانی چیرۆكەكەی فەرمان بەهەر شێوەیەك بێت دەیانهێنێتەوە ناونادییەكان بە شێوەیەكیش باسیان لێوە دەكات كەوا هەردووكیان ( رۆژگارو نەسرین) دوو ئافرەتی سەماكاری بەناوبانگی قاهرەن( ئەمە زۆر مایەی تێڕامانە چونكە قاهرەی خاوەن شارستانیەتی كۆن‌و زادگای هەزاران هونەرمەندی بە توانا‌و سەماكاری لێهاتوو ناشێت دوو ئافرەتی ئەنفالكراو بە هەزاران گرێی دەروونییەوە بەبێ ئەوەی هەلی خوێندنی زانستی هونەری سەمایان بۆ برەخسێ ببنە دوسەماكاری بەناو بانگ، بەتایبەتی ” سەحەری ئەنفالكراو” كە هێشتا نازناوە كوردییەكەی فرێنەداوە) باشە چۆنە ئەم دوو سەماكارە بەناو بانگە بۆیەكەمجارە ئێمە ناویان دەبیستین) خۆسەما كارەكان زوو ناویان بڵاودەبێتەوەو دەناسرێن؟ بەلای كەمەوە هەندێك حەسانەیان هەیە نەك خراپ ناژین وەكو فەرمان دەڵێت، بەڵكو زۆر باشیش دەژین، فیفی عەبدە كە خاوەنی ریبازی رەقصی شەرقیە لەمیسر نەك هەربەچاوی سوك تەماشا ناكرێت، بەڵكو وەكو هونەرمەندێكی بەتوانا زۆر بەرێزەوە تەماشا دەكرێت، كەس نیە لە وڵاتی خۆی لە ژیان‌و پاشخانی رۆشنبیری فیفی عبدە شارەزا نەبێت لە بواری هونەری سەمادا، ئەو بە شانازی‌و باگراوەندێكی رۆشنبیری دەوڵەمەندەوە داكۆكی لە هونەرەكەی خۆی دەكات، پێموانیە كچێك لەگوندێكی كۆیە یان لە گەرمیانەوە ئەنفالبكرێت‌وبفرۆشرێتە میسرو ببێتە مونافیسی؟ ئەی چۆنە ئەو سەماكارە كوردە رۆژنامەیەك نەچوو دیدارێكی لەگەڵ سازبكات‌و لە ژیانی بكۆڵێتەوە، چۆنە ئەو دوو سەماكارە گرێی دەروونی خۆیانیان بۆرۆژنامەنوسێك نەكردووەتەوە ؟ ئەمە باواز لەوەش بهێنین سەماكار بەرلەوەی خۆی بكاتە كاڵا زەوقێكی هونەری مەزنی لە پشتەوەیە. پێموانیە كەس بەزۆر بكرێتە سەماكارێكی سەركەوتوو. ئەوەشی باس لەوەدەكات كچە كوردەكانی ئەنفال كراونەتە راقصە نەلە هونەری رەقص‌و نەلە تراژیدیای ئەنفال‌و نەلەنیازەكانی موخابەراتی بەعس‌و میسریش تێگەیشتووە. چونكە ئەوانە ئەگەر برابێتن بۆ وڵاتە عەرەبیەكان بۆفێر بوونی هونەری سەما نەیانبردوون، بەڵكو وەك كەنیزەك، بۆسوكایەتی پێكردنی “كوردە بێدین‌ولادەرەكان” بردوویانن. ئەگەر ئەو چیرۆكەی فەرمان عەلی ڕاست بێت كەواتە حكومەتی میسر بەپێی كلتور‌و شارستانیەتی میسری ، خزمەتێكی زۆری بەكچە ئەنفالكراوەكانمانكردووە كە لەگۆرستانەوە بردوونی بۆ مەیدانی هونەری سەماكاری. ئەمەش هەرگیز بەعەقڵدا ناچێت، با ئەوەش بە كاكە فەرمان بڵێم كەوا ئەوانەی لەو هوتێلە دەرەجەدارانە كار دەكەن شاگرد‌و بۆیەكانیشیان بەلای كەمەوە بەبێ بروانامەی پەیمانگەی گەشت‌و گوزار ناتوانن لەوێندەرێ كاری شاگردیش بكەن،چ جای سەماكارەكانی؟ پێمخۆشە ئەو زانیاریەش بدەمە كاكە فەرمان كەوا عازف موزیكەكانیش بەبروانامەی بەرزەوە نەبێت لەو هۆتیلانە وەرناگیرێن تا ئاهەنگ بگێڕن، هەر بۆ بەڵگەش مامۆستایەكی عەرەب هەبوو بەناوی ( ف) لە پەیمانگەی هونەرە جوانەكانی سلێمانی وانەی موزیكی دەوتەوە، لەساڵانی هەشتاكاندا بە بروانامەی كۆلیژی هونەرە جوانەكانەوە ئینجا لەو هوتیلانەی میسر وەكو عازف كەمانێكی پلەمام ناوەندی كارێكی پێبڕابوو ! ئیدی ئەگەر ئەمە حاڵی شارستانیەتی میسر بێت كچە ئەنفالكراوێكی دیلكراو چۆن دەتوانێت هەلی ئەوەی بۆ برەخسێت ببێتە سەماكارێكی بەناوبانگی قاهرە؟
كچی دووەمی هەوالەكەی میدیا(دینا) یان (نەسرین) دەلێت زۆر جار هەوڵمداوە یەكێك بدۆزمەوە كورد بێت ؟ واهەست دەكەم ئەمەش زۆر دوربێت لە ڕاستییەوە، چونكە كورد لەمیسر قاتی نیە باشە یەكێتی‌و پارتی نوسینگەیان نەبوو؟ لەماوەی18 ساڵدا هیچ كوردێك پێش فەرمان رێیان نەكەوتە ئەو هوتێلانە؟ من پێموایە مادام دینا هەولیدا بێت چیرۆكی فرۆشتنی خۆی ئاشكرا بكات ئەگەر هەر كەسێكی كوردیشی دەست نەكەوتایە نامەیەك بگەیەنێتە كوردستان یان سەركردە كوردەكان بە بێگانەیەكیشدا بوایە هەر دەیناردەوە. مەگەر شەرم ئەلشێخ كەم رۆژنامەنوس‌و خەڵكی بیانی لێیە؟ تۆ بڵێی نامەیەك یان سۆراخێكی نەسرین (دینا) هاتبێتە لای بەرپرسانی كوردو پشت گوێیان خستبێت؟ ئەمەیان ئەركی دەسەڵاتی كوردی یە وەڵامی بداتەوە.
نامەكەی سەحرو ئیقامەی كاتی
فەرمان دەڵێت حكومەتی میسر پاسەپۆرتی نەداوەتە ئەو كچانە بەڵكو كارتێكی داونەتێ وەك ( ئیقامەیەكی كاتی واتا ناتوانێ بەو كارتە سەفەر بكات) كەوایە موخابەراتی میسر مەسەلەكەی بەهەندگرتووەو تا ئێستا فەرامۆشی نەكردوون. ئەی فەرمان چۆن دەتوانێ بیانهێنێتەوە؟! ئەگەر ئەمە ڕاستبێت، باشترین دۆكۆمێنت لەبری ئەو نامەیەی گوایە سەحەر نوسیوێتی كۆپییەكی ئەو كارەتی ئیقامە كاتییە بوو كە فرمان وێنەیەكی لێبهێنابایەتەوە بۆ كوردستان. ئەوسا پێش ئەوەی بڵاویبكردایەتەوە بیرێكمان لێدەكردنەوە.
باشە ئەگەرفەرمان نەیتوانی بە ئاشكرا وێنەیەكیان بێنێتەوە، بۆچی ناونیشانی خزمێكیان یان دۆستێكیانی وەرنەگرت؟ ئەی كە سەحەر باوەشی پێداكرد گووتی: توخوا بمبەرەوە بۆ كوردستان نەیگوت بمبەرەوە بۆكوێ؟ بۆماڵی كام خزمم ؟ ئەوسا لەبری ئەوەی تەلەفۆن بۆ فەرمان بكەنەوە تابزانن چی كراوە بۆ گەرانەوەیان! تەلەفۆنیان بۆ كەس‌وكاریانكردبا؟ ئەگەرنا بۆچی قسەكانی ئەوتەلەفۆنانەی تۆمارنەكردووەوبەدەنگ نەیداونەتە وەزیری شەهیدوئەنفالكراوان، بۆچی نەیگەیاندە ئەمنستی ئەنتەرناشناڵ؟ بۆچی نەیدان بەناوەندی چاك كە لەپارەوە لەگەڵ سەفارەتی میسر ئێستاشی لەگەڵ بێت لەمشت‌ومردان؟ چما ئەو تەلەفۆنە ئەو بەڵگەنامە دەنگیانە نەدەبوونە دۆكۆمێنت؟
ئینجا دەمەوێت بپرسم ئەم هەواڵە بۆچی لە بڵاوكراوەی میدیادا بڵاوكرایەوە؟ ئایا لە پێش میدیاوە دراوەتە رۆژنامەو بڵاوكراوەكانی تر؟ ( من بڵاوكراوەی میدیا باش دەنرخینم) ئەمە تەنها پرسیارێكەو دەیكەم، دەنا ئەو پەیامنێری تەلەفزیونی زاگرۆس بووەو لەناوەندی راگەیاندنەوە رێگەی پێدرابوو كە بروات بۆمیسر كەچی لە بیرۆكەیەكی ئاوادا پرس بە ناوەندی راگەیاندن ناكات؟ كەچی دێتەوە بۆ كوردستان‌ولەبری گەشتی رۆژنامەوانی بۆ تەلەفزیونی زاگرۆس هەواڵێك دێنێتەوە‌ولە میدیا بڵاودەكاتەوە نەك لە تەلەفزیونی زاگرۆس؟ باشە خۆ میدیا ئەهلییەو كەم‌وزۆر پەیوەندی بەناوەندی راگەیاندنەوە نیە. مەگەر ناوەندی راگەیاندن‌و رۆژنامەو بڵاوكراوەكانی حزب بەتایبەتی ئەوەی فەرمان كاریان بۆدەكات مەسەلەی چارەنوسی ئەوكچانە بەهەند ناگرن؟ یان لە بنەرەتەوە بروایان بە دارشتنی چیرۆكەكە نەبووە؟
ئەوەی لە‌وبرادەرە هەڵكەوتووە جاڕاست یان ناڕاست، هەقی بڵاوكردنەوەی نەبوو، بۆچی لەبەرئەوەی باگریمانەی ئەوەبكەین كە ئەو چیرۆكە ڕاستەو ئەوكچانە بەگۆشت‌وخوێن‌و برینی كارەساتی ئەنفالەوە لەوڵاتێكی عەرەبی هەن، دەبوایە یەكەم هەنگاو پارستنی ئەمنیەتی ئەودوومرۆڤە غەدرلێكراوانەبێت. ئینجا هەوڵی هێنانەوەیان بدریت، با پركیشی ئەوەش بكەین‌و كەمێك لەم رۆژنامەنوسەش دوربكەوینەوە.. ئەی چۆنە رۆژێكی ترو لە سینارێویەكی تردا ئەگەر كورێكی كورد كچە عەرەبێك لەو وڵاتانە پەیوەندییەكی تایبەتی خۆیان بەست‌و هاتن‌و ووتیان ئەمەش كچە ئەنفالێكی ترە؟ چۆن ڕاستی‌و ناڕاستی ئەو چیرۆكە بدۆزینەوە؟!! بەڵام سینارێویەكی لەمجۆرەی ئەوبرایە بڵاوی كردووەتەوە هەموو ریسەكانی تریش دەكاتەوە بەخوری، ئەوهەوڵانەش مایە پوچ دەكاتەوە كە تا ئێستا دراون، ئەمە جگە لەوەی نیازی حكومەتی میسریش مەیسەردەكات لە پەردە پۆشكردنی تاوانێكی لەمجۆرە، كێ دەلێت حكومەتی میسركە دەزانێت كۆمەڵگەی كوردی كۆمەڵگەیەكی ئەخلاقییە‌و بەعاتیفە بیردەكاتەوە مەبەستی نیە پێمان بڵێت وەرن هەژدە راقیصەی بێكەڵك‌و بێ مستەوا‌و فاشلی میسرتان دەدەمێ‌‌و بیانبەن‌و لە كۆلمم ببنەوە، لەبری هەژدە پاكیزە، هەژدە مرۆڤی گەرمیانی، هەژدە ئینسانی قارەمانی ئەنفالكراو هەژدە ئینسانی تێكشكاوو بەكاڵاكراومان بۆ بنێرنەوە، كەوا جارێكی تر ئافرەتان بكەن بەكاڵاو رەدەڵ‌وبەدەڵیان پێبكەن‌و بەسیناریویەكی ئاوا نائەخلاقی قایلیان بكەن هەڵبەتە پێشێلكاریەكی ئاوای مافی مرۆڤ‌و ئەم سینارێویانە بۆحكومەتە كۆنەپەرستەكان زۆر گەمەیەكی ئاسانن بیكەن، بۆ ئەوەی ئێمەش ئیتر لەهەوڵەكانمان وەرس بین‌و چیدی باسی ئەوكچانەمان‌وداوای چارەنوسی ئەوئینسانانەمان نەكەینەوە.
بەڵام كە هاتە سەر جدیاتیش ئەوئافرەتانە بێن‌و دەورەكانی خۆیان بگێڕن‌ولێرەوە لەبەردەمی رێكخراوەكانی مافی مرۆڤ‌ورای گشتی دنیا پێمان بڵێن ئێمە نەكوردین‌و دەشزانین واتای ئەنفال چییە. ئێوە بەسەهوو ئێمەتان هێناوەتە ئێرە. بەڵكو هاتوین كارێك بكەین وەك چۆن سەدەی رابوردوو براكانمان لێرە كارییانكردووە، سینارێویەكی ئاوا هەرنابێتە گاڵتەكردن بە رۆژنامەنوسەكانمان بەڵكو دەبێتە مایەی گاڵتەكردن بەقوربانیانی ئەنفال‌وبەكلتور‌وسیاسەتیشمان. بۆیە لە دۆسێی ئەو هەژدەكچەدا پێویستمان بە دیقەت‌و وردەكاری زیاتر هەیە، من لێرەوە رەخنەم هەرلەوبرایە‌وبڵاوكراوەی میدیا نیە بەڵكو ڕەخنەم لەهەموو ئەولایەنانەش هەیە كەوا بە وەها چیرۆكە هەواڵێكی بێبناغە بەهارلەخۆیان دەهێننە چۆكان، لە پێش هەموویانەوە رەخنەم لە ناوەندەكەی خۆم ناوەندی(چاك) هەیە، كە بەهەڵەشەیی‌و بێبەرنامە لەپێش هەموانەوە هەڵای لێهەستا.
ئەم بابەتە لە گۆڤاری هەشتاو هەشت ژمارە(7)و(8)دا بڵاوكراوەتەوە.
[1] ئەم ژمارەیەی میدیا بە ئینگلیزی (٢٦٧) و بەکوردی (٢٥٧)ی لەسەرە !
[2] بۆ خویندنەوەی چیرۆكەكە بروانە هەفتەنامەی میدیای ژمارە ( 267 ) .
[3] ىروانە کوردستانی نوێ ژمارە (٣١٠٠)
[4] (بروانە ماڵپەری ناوەندی چاك بەشی چالاكیەكان، خۆپیشاندانی كوردان بۆ بەردەم سەفارەتی میسر)
[5] كتێبكی (كچانی خوا )ی كچە رۆژنامەنوسی ئوسترالی بۆ زۆربەی زمانەكانی دنیا وەرگێردراوە لەوانە بۆ زمانی كوردیش لەلایەن بەڕیز (نوری كەریم)ەوە وەرگیردراوە.
