شەڕی دەرونی داعش ، رەنگدانەوەی لە میدیای کوردیدا ئەرسەلان ڕەحمان
لێكۆڵينه‌وه‌يه‌كى تايبه‌ت به شه‌ڕى ميديايى و ده‌روونى داعش دژ به كورد به چاپ گه‌يشت
ئەنفالستان – سلێمانی : كتێبى “شه‌ڕى ده‌روونيى داعش و ره‌نگدانه‌وه‌ى له ميدياى كورديى دا) كه توێژينه‌وه‌يه‌كى بوارى ميديا و سۆسيۆلۆژياى ميدياييه، له توێى 477 لاپه‌ڕه‌دا له نووسين و ئاماده‌كردنى (ئه‌رسه‌لان ره‌حمان)، به چاپ گه‌يشت.
نووسه‌ر له‌و كتێبه‌دا خوێندنه‌وه‌يه‌كى كوردانه‌ى سه‌باره‌ت به رووماڵى ميدياى كورديى بۆ شه‌ڕى داعش و پرسى شه‌ڕى ده‌روونى داعش دژ به خه‌ڵكى كوردستان و هێزى پێشمه‌رگه خستووه‌ته‌ڕوو.
سه‌باره‌ت به ناوه‌ڕۆكه‌كه‌ى، له پێشه‌كى كتێبه‌كه‌دا، هاتووه: “باسه‌كانى ئه‌م به‌رهه‌مه كه زياتر له چه‌شنى رێبه‌رێكى ميديايى بۆ ميدياكارانى كورد گرنگى خۆى ده‌رده‌خات، فراوانن، ته‌نيا، قسه‌كردن نييه له‌سه‌ر داعش وه‌ك رێكخراوێكى تيرۆريستيى و ناساندنى بنه‌ما فيكرى و هێڵه گشتييه‌كانى كارى ئه‌و رێكخراوه به وه‌رگرى كورد، به‌ڵكو هه‌ريه‌ك له باسه‌كانى په‌يوه‌نديدار به رووماڵى ميدياى كوردى بۆ رووداوه‌كانى شه‌ڕى داعش، پرسى شه‌ڕى ده‌روونيى، پێويستيى هه‌بوونى راگه‌ياندنى سه‌ربازى و رۆڵى پيشه‌ييانه‌ى په‌يامنێرى جه‌نگيى روونكراونه‌ته‌وه”.
هه‌روه‌ها هاتووه: “راى ژماره‌يه‌ك ئه‌كاديميست و نووسه‌ر وه‌رگيراوه و راسپارده و پێشنيازيش بۆ كارله‌سه‌ركردنيان خراونه‌ته به‌رده‌ست. هه‌روه‌ها نموونه‌ى پێويست بۆ روونكردنه‌وه‌ى مه‌به‌ست خراونه‌ته‌ڕوو بۆ ئه‌وه‌ى وه‌رگر و ميدياكارى كورد زياتر درك به ناوه‌ڕۆكى ئه‌و په‌يامانه بكه‌ن، كه رۆژانه داعش له رێگه‌ى تۆڕه كۆمه‌ڵايه‌تييه‌كان و مه‌كينه‌ى پڕوپاگه‌نده‌كردنييه‌وه ئاراسته‌ى وه‌رگرى كوردى ده‌كات و له كۆى گشتى به‌رهه‌مه‌كه‌شدا جه‌خت له‌سه‌ر گرنگى هاتنه‌ئاراى روانگه‌يه‌كى كوردانه بۆ رووماڵى رووداوه‌كان و وه‌رگێڕان و داڕشتنه‌وه‌ى په‌يامه ميدياييه‌كان كراوه‌ته‌وه”.
ناوه‌ڕۆكى كتێبه‌كه دابه‌شكراوه به‌سه‌ر چوار به‌شدا له كۆتايى كتێبه‌كه‌شدا ژماره‌يه‌ك پێشنياز و راسپارده بۆ به‌رچاوى لايه‌نه په‌يوه‌نديداره‌كان خراونه‌ته‌ڕوو. هاوكات ئه‌نجامێكى پوخته‌كراوى كتێبه‌كه‌ش خراوه‌ته به‌رده‌ستى خوێنه‌ر. وێڕاى خستنه‌ڕووى سه‌رچاوه‌كانى كتێبه‌كه.
پێڕستى كتێبه‌كه:
*به‌شى يه‌كه‌م: ستراتيژيى شه‌ڕى ده‌روونيى داعش و دامه‌زراوه ميدياييه‌كانى
-پارى يه‌كه‌م: شه‌ڕى ده‌روونيى (چه‌مك، ئامراز و جۆره‌كانى)
+باسى يه‌كـه‌م: شه‌ڕى ده‌روونيى چييه؟
+باسى دووه‌م: كه‌رسته‌كانى شه‌ڕى ده‌روونيى-پارى يه‌كه‌م: شه‌ڕى ده‌روونيى (چه‌مك، ئامراز و جۆره‌كانى)
-پارى دووه‌م: ستراتيژيى شه‌ڕى ده‌روونيى داعش و دامه‌زراوه ميدياييه‌كانى
+باسى يه‌كـه‌م: داعش له گرووپێكى چه‌كداره‌وه بۆ ده‌وڵه‌تى تيرۆر
+باسى دووه‌م: ستراتيژيى شه‌ڕى ده‌روونيى داعش
+باسى سێيه‌م: دامه‌زراوه ميدياييه‌كانى داعش
*به‌شى دووه‌م: راگه‌ياندنى سه‌ربازى و په‌يامنێرى جه‌نگى
-پارى يه‌كه‌م: راگه‌ياندنى سه‌ربازى ورێككاره‌كانى
+باسى يه‌كه‌م: راگه‌ياندنى سه‌ربازى و رۆڵى له كاتى شه‌ڕ و ئاشتييدا
+باسى دووه‌م: رێككاره‌كانى به‌ره‌نگاربوونه‌وه‌ى راگه‌ياندنى داعش
-پارى دووه‌م: په‌يامنێرى جه‌نگ و رووماڵكردنى ململانێ چه‌كدارييه‌كان
+باسى يه‌كه‌م: په‌يامنێرى جه‌نگيى كێيه؟
+باسى دووه‌م: شه‌ڕى داعش و په‌يامنێرانى كورد
+باسى سێيه‌م: رێنمايى پيشه‌يى بۆ په‌يامنێرانى جه‌نگى
*به‌شى سێيه‌م: رووماڵى شه‌ڕى داعش و پرسه ميدياييه‌كان
-پارى يه‌كه‌م: رووماڵى ميديايى و شه‌ڕى داعش
+باسى يه‌كه‌م: سه‌رچاوه‌ى زانيارى ميدياى كوردى و گرفته‌كانى به‌كارهێنانى سه‌رچاوه
+باسى دووه‌م: پرسى بێلايه‌نى و هاوسه‌نگى له رووماڵى شه‌ڕى داعشدا
+باسى سێيه‌م: جياوازى نه‌كردن له نێوان درووشم و زانيارييدا
+باسى چواره‌م: له نێوان میدیای كوردی و هه‌ژماره‌كانی داعشدا
-پارى دووه‌م: ستراتيژى شه‌ڕى ده‌روونيى داعش دژ به كورد
+باسى يه‌كه‌م: چه‌ند نموونه‌يه‌ك له شه‌ڕى ده‌روونيى داعش دژ به كورد
+باسى دووه‌م: شه‌ڕى ده‌روونى داعش و به‌كارهێنانه‌وه‌يان له ميدياى كورديى دا
*به‌شى چواره‌م: گفتوگۆكان
*ئه‌نجام
*پێشنياز و راسپارده
*سه‌رچاوه‌كان
پرۆفايل:
ئه‌رسه‌لان ره‌حمان له‌دايكبووى 1981
به‌كالۆريۆس و دبلۆم له راگه‌ياندن.
به‌ڕێوبه‌رى ماڵپه‌ڕى رۆژنامه‌وانى تايبه‌ت به زانست و هونه‌رى راگه‌ياندن.
توێژه‌ر له بوارى پرسه ميدياييه‌كان و ميدياى تايبه‌تمه‌ند.
