سهردێرهكان
راژیدیای پوورزاكانم- یادهوهریی بۆردوومانی قهڵادزێ 24/4/1974 بوار نوورهدین- سلێمانی
تراژیدیای پوورزاكانم- یادهوهریی بۆردوومانی قهڵادزێ 24/4/1974
بوار نوورهدین- سلێمانی
تهمهنم 12 ساڵ بوو، له پۆلی شهشی سهرهتایی بووم، بابم برینپێچ بوو، به هۆی جیاوازیی بیروڕاوه، سهرهتا بۆ چوارقوڕنه و دواتر بۆ گوندی سونێ دوور خرابووهوه… شهوی 23/24 له بری قاز و قوڵنگ، تهیارهكانی بهعس به ئاسمانی شارهكهمدا دهسووڕانهوه، له بری ههوریش گرمهیان بوو… بهیانی زوو، دایكم ناردمی بۆ ماڵی پوورم… بهو بهیانییه زووه، به كۆڵانهكاندا ڕام دهكرد و لاسایی تهیارهكانی شهوم دهكردهوه…
پێش نیوهڕۆ له بهردهمی ماڵی پووره نهجیبم یاریی (باله)مان دهكرد، جگه له هات و هاواری ئێمه، ههست و خوست زۆر كهم و گهڕهك خامۆش بوو، دهتگوت شارهكهم شتێكی بیستووه و چاوهڕێی بهڵایهكی ناگههان دهكات. دهستم بهرهو ئاسمان و ڕووم له قهڵا بوو، كاتێكم زانی چهند تهیارهیهك، كه یهكی چهند ناپاڵمێكیان لێ چۆڕابووهوه، لهگهڵ تۆپهكهم، كهوتبوونه ههلهكهسهما و گهمهیان به چاوم دهكرد، فریای هاوار و ڕاكردن نهكهوتین، كاتێك ههموومانی بهرزكردهوه و كێشاینهوه به زهویدا.
خۆمان خزانده ژوورێكی ماڵی پوورم و به ههموومان پاڵمان به دهرگاكهیهوه نا، به ئهقڵی خۆمان، بۆ ئهوهی ئهو دێوهزمهیه بۆمان نهیهته ژوورێ، كهچی كاتێك له كاولكارییهكهی گهڕایهوه، به دهنگه ڕهق و گڕ و نهڕهكهی، پاڵی به دهرگاوه نا و ههر هاته ژوور و ههموومانی بهسهر یهكدا دا…
شار شێوا، بۆنكروز و تهپ و تۆز و دهنگ و هاوار و ناڵه، به ئاسمانی شاردا پاڵیان به یهكترییهوه دهنا. به ڕاكردن گهڕامهوه بۆ ماڵێ، ئهوهندهی پێ نهچوو، پوورزا كهلوپارچهكراوهكانم (سهیران، شهپۆل، مهریوان، بههار، ڕووبار، دهریا، دهوهن…)ی پووره سهبریم، به قاو و قیژ و نركه و ناڵهوه، خۆیان به حهوشی ماڵهكهمان دا كرد: كوا خاڵه نوورهدین، خاڵه گیان له كوێی؟ فریامان بكهوه… هیچ چارهیهك نهبوو، خاڵه زۆر دوور بوو.
پوورزاكانم به ناچاری ڕوویان له مزگهوتی خانهقا كرد و منیش دوایان كهوتم، ئهو مزگهوتهی پڕ بوو له مرۆڤ، كه بۆ نوێژ و دهستنوێژ نههاتبوون؟! لاشهی شههیدهكان ببوون به ئیمام و بریندارهكانیش به فهقێ و بانگدهر و مجێور… خهڵكیش له پێشیانهوه نوێژی دهخوێند و نزای دهكرد، كه له نمایشی دیمهنێكی ڕۆژی حهشر دهچوو. خۆم به ژووری مزگهوتدا كرد، چی دهبینم؟ پوورێكی ترم (فهخری) كهوتووه و مێرهدهكهی (حهسهن حاجی مهحموود) ههر هات و هاواریهتی، پووریشم وهڵامی نییه و هۆشی نییه و به ناڵه ناڵ، له تاو ئازار، ئهمدیو ئهودیویهتی و لهگهڵ ئاسمان قسه دهكات و ههواڵی جگهرگۆشهكانی دهپرسێت؟ حاجی حهسهن ئهو پیاوهی، پیاوی دهویست قسهی لهگهڵ بكات و له بهرامبهریدا شهرم زمانی نهگرێ… گوتی: بوار، كهس و ماڵ و منداڵم نهما. ویستم بپرسم؟ به ئاسماندا بفڕم و ههواڵی پوورزاكانی ترم بزانم؟! مزگهوت بووبوو به مهیدانی خوێن و گۆشت و شین، چ زۆر بوو، تراژیدیا زۆر بوو، سیناریۆ و ڕۆمان هاواریان بوو، شانۆگهرییان پێشكهش دهكرد، تیلی چاوم، كهوتهوه سهر شانۆگهریی پوورزاكانم:وا دهوهن، له گیانهڵادایه، پارچه ناپاڵمێك له پشتی سهری داوه، له لای ڕاستی ناوچهوانی هاتووته دهرهوه، برینپێچهكه به پارچه لهفافێك مێشكی دهسڕێ و به پارچهیهكی تر دهپێچێتهوه؟ برینپێچ چاوێكی گێڕا، دهتگوت له گیانه فڕیوهكهی دهوهن دهگهڕێ… دهوهنیش به بهر چاومهوه، بۆ دوا جار ماڵئاوایی كرد و دوا نیگای له چاوییهوه ههڵفڕاند… سهیران كه ههردوو قاچی شكابوو، دوو پارچه تهختهی (خانه)ی ههڵگرتنی پێڵاوی مزگهوتیان بۆ شكاند و قاچیان پێ ههڵبهست و لهسهر پێلیژهیهكی داریندا، بهستیانهوه… ئهوانی تریش ههموو دهست و دهموچاویان، برینی ئاوساو و ههڵتۆقیو و سووتاو بوو. ههموویان خزێنرانه پشتی لاندڕۆڤهرێكهوه، كه دهرگای دواوهی جێبهكه، وهك نزا و فرمێسكهكانی ئێمه، واڵا كرابوو و پهیژهقاچی سهیرانیش، ستانداردی كۆمپیانیای لاندڕۆڤهری تێپهڕاندبوو و نزیك به مهترێك درێژتری كردبوو… خهریك بوو بڕۆن، سیروانی ڕهحمهتی برا گهورهیان هات، سیروان كه هاوڕێ و دۆستی ههره نزیكی قوبادی پوورزای بوو، كاتێك زانی و بیستی شههید بووه، دایك و باب و خوشك و برای بیر نهما و پڕمهی گریانیش، ژیانی دهسڕیهوه و ههموو شتێكی بیر دهبردهوه… ئیتر بۆ چارهنووسێكی نادیار بهڕێكران، حهسرهت و تاسهمان، تا سهردهشت و بۆ چهند مانگێك، به دهستی بهرزكراو و باوهشی كراوه و زمانی لاڵ، به دوایانهوه بوو…
چوومهوه ژووری مزگهوت، پرسیار پرسیار، ئهوسا زانیم كه ماڵی پوورێكی تریشم، وێران بووه و بهر بهڵا كهوتووه، قوبادی گوڵ، گوڵهباخی خوشكی و سێ خونچهكوڕی شههید و چهند خوشك و برایهكی كهلوپارچه بوون… تهنانهت باڵای بهرزی سنهوبهری باخچهكهیشیان، شكابوو. ئهوانیش بۆ سلێمانی بهڕێكراون.. سهڵاحی برا گهورهم، هات و به زۆر بردمی، بۆكوێی بردم؟ بۆ ژێرخانی خانووێكی گڵی دراوسێیهكمان، ئیتر دایكم دهستی گرتم و نهیهێشت بچمهوه دهرهوه و دیمهنهكانی تر ببینم. تا شهو هات، ئهوهندهم ڕوانییه دارڕایهڵی ژێرخانهكه، تا حهسیرهكان بوون به لاپهڕه و دارهكانیش بوون به یهكهم دێڕی بیرهوهرییم، نازانم ئهو دارانه چییان لێ بهسهرهات؟ سووتان یان بهرهو كوێ براون؟ بهڵام وشه به وشهیان كه به فرمێسكی چاوم نووسران، له یادم ناچنهوه و ههرگیز جێم ناهێڵن… بوون به تراژیدیای مێژوو، پاڵهوانی ڕۆمان، سیناریۆی شانۆگهری و ئاوازی سیمفۆنیای پوورزاكانم… كاتێك بابم گهیشتهوه شار، خوارزاكانی له باوهشی گڵدا بوون، یان بهرهو سهردهشت و سلێمانی بهڕێكرابوون. بهری بهیانی، بهرهو گوندی سندۆڵان ههڵاتین و دوای چهند ڕۆژێك گهڕاینهوه. چهند مانگێك له قهڵادزێ بووین، كه له 20%ی دانیشتوانی تێدا مابوو، ئیتر بووبوو به مهیدان و سنووری شهڕ، فڕۆكهی مێك و سیخۆ و میراج و باجهر… له بری چوێلهكه و كۆتر و باز، ئاسمانی قهڵادزێ و پشدهریان كردبوو به پهردهباز…
ئهم بابهته ڕۆژی 24/4/2015 له ڕۆژنامهی (كوردستانی نوێ)دا بڵاو دهبێتهوه.
