سهردێرهكان
فیدراسیۆنی رێکخراوەکانی کۆمەڵگەی مەدەنی و پارێزەرانی سلیمانی پشتیوانیان بۆ کەسوکاری ئەنفالکراوان راگەیاند .
فیدراسیۆنی رێکخراوەکانی کۆمەڵگەی مەدەنی و پارێزەران و ڕۆشنبیرانی سلیمانی پشتیوانیان بۆ کەسوکاری ئەنفالکراوان راگەیاند .
ئەمڕۆ (٣٠-٤-٢٠١٤)، کاژێر ١٠ى سەرلەبەیانى لەبەردەم دادگاى سلێمانیدا گردبوونەوەیەک بۆ پشتگیری لە خۆپیشاندانى کەسوکارى ئەنفال و داواکارییەکانیان و دۆسیی دادوەر (هاوژین حامد) کراو پەیامێکیان ئاراستەی ئەنجومەنى دادوەری کرد.
کاتژمێر ١٠ ی سەرلەبەیانی ئەمڕۆ (٣٠-٤-٢٠١٤) فیدراسیۆنی رێکخراوەکانی کۆمەڵگەی مەدەنی و بەشێک لەپاریزەران، بە کۆمەڵیک دروشمەوە لە بەردەم دادگاى سلێمانیدا گردبوونەوەیەکیان ئەنجامدا، پەیامێکیان ئاراستەی ئەنجومەنى دادوەری کرد. ئامانج لەو گردبوونەوەیە پشتیوانی کردن بوو لە خۆپیشاندانى کەسوکارى ئەنفالکراوان و داواکارییەکانیان .
ئارام جەمال رێکخەری فیدراسیونی رێکخراوەکان بە ماڵپەری ئەنفالستانی راگەیاند ئەمرۆ ئێمە لیرە کۆبووینەتەوە بۆ ئەوەی پەیامێک ئاراستەی ئەنجومەنی دادوەری بکەین و پشتیوانی رێکخراوەکانی ناوفیدراسیونیش بگەیەنینە کەسوکاری ئەنفال کراوان و پشتیوانی لە دۆسیی دادوەر (هاوژین حامد) یش دەکەین .
دەقى پەیامەکە بخوێنەرەوە:
پەیامێك لە “فیدراسیۆنی رێكخراوەكانی كۆمەڵگەی مەدەنی”یەوە
بۆ ئەنجومەنی دادوەریی لە هەرێمی كوردستان
دادگاییكردنی تۆمەتبارانی ئەنفال، سەنگی مەحەكە بۆ مانەوەی شكۆی دادگاكان..
پەیامی ئێمە، وەك فیدراسیۆنی رێكخراوەكانی كۆمەڵگەی مەدەنی، بۆ ئێوەی ئەنجومەنی دادوەری لە هەرێمی كوردستان ئەوەیە كە زۆر نیگەرانین لە خەمساردیو جیاكاریتان لەكاتی جێبەجێكردنی یاسا لە نێوان دەسەڵاتدارانو كەسانی بێدەسەڵاتدا، تەنانەت دۆخی دادوەریی گەیشتۆتە ئەو ئاستەی، هەندێك لە دادوەرە عەدالەتخوازو بە هەڵوێستەكان ناچاربكرێن، لەبەر بێهودەیی هەوڵو تەقەلا جددیەكانیان، دەستلەكاربكێشنەوە، لە نموونەی حاكم “فەرهاد حاتەم”، یاخود لە ژێر پەردەی فەرمانی كارگێڕیدا، سزا بدرێنو دوور بخرێنەوە، وەك ئەو ناهەقییەی بەرامبەر دادوەر (هاوژین حامید حسێن) ئەنجامتاندا. جیاوازییەكی سەیرە! ئێمە كە چەند رێكخراوێكینو لەدەرەوەی دەسەڵاتی دادوەرییەوەین، وەك بەشێكی زۆری كۆمەڵگەكەمان، شانازی دەكەین بە هەڵوێستە جوامێرەكانی هەردوو دادوەری ناوبراوەوە، كەچی ئێوەی ئەندامانی ئەنجومەنی دادوەری، بەبێ گوێدانە موعاناتی پیشەییو ئینسانیان، دەستبەجێ نامەكانی دەستلەكاركێشانەوەیان ئیمزا دەكەن! لەوەش خراپتر، كار گەیشتۆتە ئەوەی بە پاساوی شكاندنی شكۆی دادگاوە، سەرقاڵی بەهانەهێنانەوە بن لە دژی داخوازییە ئینسانیو یاساییەكانی كەسوكارو تاقانەكانی ئەنفال بۆ دادگاییكردنی تۆمەتبارانی ئەنفال.
لێرەوە پێتان رادەگەیەنین كە ئەوەی لە سەرەوە بە كورتی باسمانكرد، تێگەیشتنی ئێمەی رێكخراوەكانە بۆ دۆخی ئێوەی ئەنجومەنی دادوەران، ماوەتەوە ئەوەی كە ئەگەر بەردەوامبن لەسەر ئەو هەڵوێستانەتان، ئەوا بە دڵنیاییەوە ئەم وێنە نەخوازراوە لە پیادەكردنی دەسەڵاتەكەتان، بۆ دروستكردنی رای گشتی ناوخۆ وەگەڕدەخەینو هەوڵی جددیش دەدەین بۆئەوەی زۆربەی رێكخراوە نێودەوڵەتییەكانی بواری مافی مرۆڤو دیموكراسیو لەو پێشێلكاریانە ئاگاداربكەینەوە.
