ووتە بێژی ئەنجومەنی دادوەری دەبوو بزانێ بێزراندن (تحقیر) رەگەزێکی تاوانی جینۆسایدە!
ووتە بێژی ئەنجومەنی دادوەری دەبوو بزانێ بێزراندن (تحقیر) رەگەزێکی تاوانی جینۆسایدە!
عومەر محەمەد
٢٩/٤/٢٠١٥ سلێمانی
لە هەموو کردەیەکی جینۆسایدکردندا دەستنیشانکردن و بێزراندن دەبێتە رەگەزێکی ناسینەوەی تاوانەکە، کێن ئەوانەی دەبێت بکوژرێن ؟ لە تاوانی هۆڵۆکۆستداو لەلای نازییەکان (رەگەزەپیسەکە جوو) لە لە کۆمەڵکوژی ئەرمەنیەکانیشدا (جرج ومشک)ەکان و لە تاوانی ئەنفالیشدا، (کەر و بزن و بەکرێگیراوانی ئێران) ئەم سوکایەتی پێکردن و بێزراندنە ڕەفتارێکی سەرەکی جەلادە بەرانبەر هەر گروپێکی جینۆسایدکراو، ئامانج داماڵینێتی لە خەسڵەتە ئینسانیەکەی و سوککردنێتی بەنیازی ئەوەی جەلاد باشترو خێراتر بێ دوودڵی کردەی کوشتن و لە کۆڵکردنەوە ئەنجام بدات، کوشتنیشیان لەلای رای گشتی نەبێتە مەسەلەیەک، بۆیە قوربانی دەبێت لە قۆناغی بنیاتنانەوەیدا مامەڵەی ئینسانی لەتەکدا بکرێت، مافەکانی دەستەبەربن و لە بەرزترین ئاستی زماندا لەگەڵیدا بدوێیت و لەبەرزترین ئاستدا رەفتاریان لەگەڵدا بکرێت، ئەوەی وتەبێژی ئەنجومەنی دادوەری وتوویەتی درێژەی هەمان ئەو زمانە بەعسیانەیە کە سوکایەتی بەهەمان ئەو قوربانیانە دەکات کە بەعس لەسەرەختی تاوانەکەدا ناوو ناتۆرەی لێنابوون و لە زیندانەکانی نوگرەسەلمان و دوبز سوکایەتی پێکردوون و شکۆی شکاندوون، هەستانەوەو گەراندنەوەی شکۆ بۆ ئەنفالکراوان ئەرکی حکومەتی هەرێمی کوردستان و وەزارەت ودەزگاکانێتی لەپێش هەموویانەوە ئەرکی دادگاکان وئەنجومەنی دادوەرییە، ئەفسوس دادوەران دەبوو لەپێش ئێمەو مانانەوە بزانن تحقیرو بێزراندن یەکێکە لەرەگەزەکانی جینۆسایدو لەوانەوە فێربوینایە، دەسەڵاتی دوای بەعس چ لە هەرێمی کوردستان وچ لە عێراق دەبوو سوکایەتی بەکەسوکاری ئەنفالکراوان بەیاسا و بەتۆخی رێکبخستایەو ببوایەتە هێڵی سور.
دەبوو هەمان ئەوزاراوانەی بەعس بەکاری دەهێنانن بەیاسا قەدەغەبکرانایەو لە ئاستی کۆمەڵایەتیشدا شەرمی گەورە بونایە ، من ناخوازم بڵێم ئەوەی ئیستا دەگوزەرێ ئەنفالە بەڵام بەداخەوە هەمان زمانە، ئاخر کە عەلی حەسەن مەجیدو ئەفسەرەکان لەسەر شاشەی تەلەفزیۆن ورۆژنامەکان و نوسراوە فەرمیەکانیاندا بێ سڵەمینەوە بە ئەنفاکراوان وبە کوردیان دەگووت (کەر، بزن، ئاژەڵ) بەکرێگیراوی ئیران، هۆکارەکەی ئەوە نەبوو کە عەلی حەسەن مەجیدو ئەفسەروسەربازەکان خۆیان دەم پیس وبەدرەفتار بوون، بەڵکو لەبەرئەوەبوو لەلای دەولەت ولە فەرهەنگی دەوڵەتدا یاساغ نەبوون و رێگە پێدراوبوون .
باشە ئەگەر عەلی حەسەن مەجید بۆ کوشتن ولە گۆڕنانیان ئەو ناوناتۆرانەی لێدەنان بۆئەوەی جەلاد رەحمیان پێنەکات ئەی وتە بێژەکەی ئەنجومەنی دادوەری لەسۆنگەی چییەوە پێیان دەڵێت بالتەچی ودزوحەشیشە خۆر ؟ ئەو بەنیازی چییەو شکاندنی ئەوانە چ مەبەستێکی تری لەپشتەوەیە ؟ ئایا بەراست کە دەزانن حەشیشە خۆرن بۆچی رێگەدەدەن لەناو قوربانیاندابن ؟ هۆکار چییەکە نایانگرن ؟ ئایا کەسوکاری ئەنفالکراوان شایانی ئەوەنین لەناو خەڵکی باشوسەلامەتدا بژین ؟ دادگاکان وەک دەسەلاتی گرتنی جاش وموستەشارەکانیان نیە دەسەڵاتی گرتنی بەڵتەچی وحەشیشەخۆرانیشیان نیە؟
رۆژی ٢٦ی نیسانی ٢٠١٥ خەڵکی کەلار لەبەرانبەر سزادانی حاکم هاوژیندا خۆپیشاندانیان کردو رۆژی دوایش لەبەرانبەردا ئەنجومەنی دادوەری رایگەیاند شکۆی دادو دادگاکانی کوردستان شکاوەو مانگرتنی راگەیاند ووتە بێژی ئەنجومەنی دادوەری هەرێمی كوردستان، لە لێدونێكی نابەرپرسیارانەدا خۆپیشاندەرانی شاری کەلاری بە گیرەشوێن و باڵتەچی و حەشیشە خۆر ناوبرد ئەمە وەک کاردانەوەیەک لەبەرانبەر خۆپیشاندانی کەسوکاری ئەنفالکراوان بوو.
