داوای لێبوردنی کرد، بەڵام ژێربەژێر !
داوای لێبوردنی کرد، بەڵام ژێربەژێر !
عومەر محەمەد
رۆژی ٣١/١/٢٠١٥ بەژمارە ٧/١/١٥ کە لۆگۆی پەرلەمان و واژۆی سۆران عومەری لەسەرە لەنامەیەکدا کە زیاتر لەکۆڵخۆکردنەوەیە بۆبنەماڵەی هونەرمەندی کۆچکردوتەها کەریمی سەرۆکی لیژنەی مافی مرۆڤ لە پەرلەمانی کوردستان داوای لێبوردن دەکات، بەڵگەی لەکۆڵکردنەوەکەش لەوەدا دیارە کە هەڵەی رێنوسی و نەزانی لەمەر فیلمی هەزارو یەک سێوتێدایە.
سۆران دەنوسێت : سەرەتا دەستی دایک وباوکی کاکە تەها جوانەمەرگ ماچ دەکەم وخوای گەورەی میهرەبان سەبوری سوتای ([1] ) جەرگیان بدات و لە بەهەشت پاداشتی نەبڕاوەیان بداتەوە.
لە بەشێکی تری نامەکەیدا هاتووە بەوهۆیەشەوە ئەگەر دڵی ئێوە – وەک بنەماڵەی هونەرمەندی کۆچکردوو کاکە تەهای کەریمی-زویر بووەو نیگەران بوون داوای لێبوردنم هەیە، دڵنیابن مەبەستێکی کەسی یاخود ناوزڕاندنی کەسی لەپشت قسەکردن لەو دۆسێ بوونی نیە، هەرچەندە بەتەنها وشەیەکیش کۆمێنتم نەخستووەتە سەر ئەو پارە سەرف[2] کردنە بۆ هونەرمەندان دڵنیاشم وشەیەکی من لەبەر دەست نیە کە وتبێتم کاکە تەها یان کاک دیاری قەرەداغی یان کاک عەدنان کەریم یان هەر هونەرمەندێکی تر گەندەڵی کردووە. ئێوەو ئەوانەی ناوم هێناون جێی رێزو فەخری هونەری کوردین لە بوارە جیاوازەکاندا، شایەنی رێزی بێ پایانن، شایانی ئەوەن بۆ کارەکانیان هەموو پشتیوانی وهاوکارییەک بکرێن، بەلام ئەوە نادادعەری ([3]) ئەم سیستمی حوکمرانێتییە کە بەو جۆرە ئاور لە هونەرمەندان وکارە هونەریەکانیان دەداتەوە، لە دۆسێی سەرفکردنی پارەی یادی ٢٥ سالەی کیمیابارانی هەڵەبجەدا پێویستە لێپێچینەوە لەلایەنی حکومی بکرێت و هیچ پەیوەندی بەهونەرمەندانەوە نیە)
لە کۆتایی نامەکەشیدا سۆران عومەر دەنوسێت (ئەوەی پەیوەندی بە کارە ناوازەکەی کاک تەهای کەریمیەوە هەیە یەکێکە لەو فیلمە دۆکۆمێنتاریانەی کەشایەنی دەیان هێندە زیاتر لە پاداشت وخەڵاتەو قسەیەکم لەسەری نیە جگەلەوەی کە ئەفسوس دەخوازم هونەرمەندێکی وەها بەتوانا زۆر زوو جێیهێشتین، سڵاو لەگیانی کاکە تەهاو دڵنیام فیلمەکەی یەکێک لە دەستکەوتە گرنگەکانە بۆ پرسی جینۆسایدی گەلی کورد .
سەیرە ..! هێشتا ئەو ئەندام پەرلەمانە پێیوایە تەهاکەریمی خەلاتکراوە ؟! لەکاتێکدا من لەنزیکەوە ئاگادارم وەزارەتی کاروباری شەهیدان وئەنفالکراوان سپۆنسەری کارەکە بووەو هیچ خەڵاتکی هونەرمەندی نەداوەتە جوانەمەرگ .
هەڵوەستە لە نامەکەی سۆران عومەر
جێگەی پرسیارە کە نامەکەی ئەو پەرلەمانتارە بۆ بنەماڵەکەیەتی نەک بۆ کەسایەتی تەها کەریمی و هونەری سینەمای کوردی، ئەو لە داوای لێبوردنەکەشیدا هێشتا تەها بچوک دەکاتەوە بۆ کوڕی خانەوادەیەک نەک داهێنەرو چالاکێکی بەئەزمون و سینەماکارێکی گەورە کە فیلمەکەی لەسەر ئاستی جیهان ناسراوەو لە ڤیستیڤالە گرنگەکانی دنیادا خەلات وپاداشت وەردەگرێت.! خۆی بێبەری کردووە لەوەی ناوی تەهای زراندبێت ! لەکاتێکدا ئەوەی سۆران عومەر کردی هەوڵێکی ئاشکرای شکاندنی هونەرمەندان و تەهاکەریمی و فیلمە بەناوبانگەکەی بوو، ئەونامەیەشی کە ئاراستەی بنەماڵەکەی کردووە، لەژێر هەژمونی ئەو وتارانەدایە کە روی راستەقینەی تەهایان وەک مرۆڤێکی داهێنەر بۆ سینەمای کوردی ودۆسێی ئەنفال پیشانداوەو بەتوندی ئەوەیان رەتکردووەتەوە کە تەها کەریمی گەندەڵ بووبێت و لەکارەکانیدا ئامانجی پارەوەرگرتن بووبێت. تەنانەت کارەهونەرییەکەی تەهاکەریمی پەیوەندی بەکیمیابارنەوە نیەو باس لەتاوانی ئەنفال دەکات !
ئەوەی لەکارەکەی سۆران عومەردا ناوی زرا تەهای جوانە مەرگ بوو، نەک بنەماڵەکەی، راستە بنەماڵەکەی بەتایبەتی دایک وباوک خوشک وبراکانی ئازاری زۆریان چەشت، بەلام بەدڵنیاییەوە ئازارەکە هی ئەوەنەبوو کە گەندەڵییەکی کوڕەکەیان ئاشکرا بووە، بەڵکو کارە بێدیقەتەکەی سۆران عومەر بوو، کە هەر رۆحی تەهاو بنەماڵەکەیانی ئازارنەدا بەڵکو هەموو ئەوانەشی ئازاردا کە تەهایان لە نزیکەوە دەناسی، سینەمای کوردی ئازاردا. کەواتە سۆران عومەر دەبوو دانی بەوەشدا بنایە کە مافی هاوڵاتیانیشە بەرپرسیارانەتر مامەڵەی لەتەک ئەو بەڵگەیەدا بکردایە، دەرخستنی گەندەڵی مافی خەلک وئەرکی پەرلەمانتارە بەڵام تۆمەتبارکردنی خەڵک بەو شێوەیە تاوانە ئێستا دەبێت بپرسین ئایا بۆچی ئەو لەراگەیاندنەوە ئازاری تەها کەریمی دەدا بەڵام ژێر بەژێر و بەدور لەچاوی راگەیاندن نامەی تایبەتی دەبنێرێ و داوای لێبوردن لە خانەوادەکەی دەکات ؟ بۆداوای لێبوردن لەتەهاو هاورێکانی وسینەمای کوردی ناکات مەگەر ئەوان هەستیان نیەو هێشتا شایانی ئازار دانن ؟
چاوەروان بن نامەی (د. یوسف محەمەد) سەرۆکی پەرلەمانییش بەزوترین کات دەگاتە دەستمان کە ئاراستەی خانەوادەی تەهاکەریمی جوانە مەرگی کردووەو داوای لیبوردنی کردووە .
[1] سوتای هەلەی رێنوسی سۆران عومەرە کەدەبوو بنوسێ سوتانی .
[2] سەرف وشەیەکی عەرەبیەو لەبری جارێک دوجار بەکاری بردووە بەڵام خەرج راستە .
[3] ناداد عەری هەلەی رێنوسەو مەبەستی ناداد گەرییە.
