سهردێرهكان
کۆرێک بۆ د. بورهان یاسین دەربارەی جینۆسایدی کوردوئەرمەن وجولەکە بەسترا
کۆرێک د. بورهان یاسین دەربارەی جینۆسایدی کوردوئەرمەن وجولەکە بەسترا
ئەنفالستان – سلێمانی : کاتژمێر ٤ی پاشنیوەڕۆی ئەمڕۆ کتێبخانەی ئەندێشە کۆرێکی بۆ د. بورهان یاسین ڕێکخست و بەئامادەبوونی ژمارەیەکی بەرچاو د. بورهان لەماوەی ٤٥ خولەکدا باسێکی بەراورد کاری گرنگی دەربارەی جینۆسایدی کوردو ئەرمەن و جولەکە پێشکەش کرد.
لەسەرەتادا د. بورهان ئاماژەی بۆ ئەوەکرد کەهەر لەسەرەتای ساڵانی نەوەدەکاندا سەرقاڵی لێکۆلینەوەی قرکردنی ئەرمەن وجولەکەو کورد بووەو جینۆسایدی ئەم سێ گروپە شایانی ئەوەیە کۆمەڵگەی مرۆڤایەتی لەسەری بوەستێ و پەندوعیبرەتی لێوەربگرێت . لەمەرگرنگی بەراوردکارییەکەشیەوە ئەوەی خستەروو کە ئەمجۆرەبەراوردکاریانە دەرگا بەروی ئەنفالدا دەکاتەوە، چونکە ئەو تیوریە دانسقانەی دەربارەی جینۆساید کراون زیاتر لەمەر هۆلۆکۆستن نەک ئەنفال . لەکۆرەکەیدا دکتۆر بورهان گرنگی یادوەریشی خستەبەر باس و رونی کردەوە کە یادوەری گرنگترین رەهەندی هەرنەتەوەیەکی زیندووە هەتا وەک مادەیەکی گرنگ خۆی لەسەر بنیاتبنێتەوە . چونکە ناسیونالیزم لەسەر سێ پێگە وەستاوە رابوردو ئێستاو داهاتوو، بەداخەوە کورد لە ساڵی ٢٠٠٥ لەکاتی دامەزراندنەوەی عێراقدا رابوردوی لەبیرکرد . بەتایبەتی کەعێراق ئامادەی نەرمی نوندن نیەو دیموکراسیەت لە عێراقدا بووەتە دیکاتۆرییەتی زۆرینە !
لەبەشێکی تری باسەکەیدا د. بورهان یاسین باسی لەرەگەزەکانی جینۆسایدکرد دەستنیشانکردن و کۆکردنەوەو لەناوبردن . گرنگترین خاڵ لەکاتی دەستننیشانکردندا (بێزراندن ، تحقیر کردنە کەئەوەش وا لەجەلاد دەکات دلرەقانەتر مامەڵەلەگەڵ قوربانیدا بکات بەو راستیشەوە کە جەلادو قوربانی هەردوکیان خەسڵەتە ئینسانیەکانیان لێ دادەماڵدرێت و دەبن بەکارەکتەری سەرشانۆی روداوەکان . هەروەک کوردوئەرمەن وجوو وەک یەک بەخیانەتکار و بە رەگەزە پیسەکان ناودەبران لەلایەن ئەنجامدەرانی تاوانەکەوە و دەبوو لە ناوببرێن .
دکتۆر بورهان ئەوەی خستە روو کە قوربانی دەبێت چی بکات بۆنمونە کورد دەبێت چی بکات بۆ ئەوەی جینۆساید نەکرێتەوە گرنگترین گرەنتی بۆ ئەمە سەربەخۆییە .
دواتر گوێی لە سەرنج وپرسیاری ئامادەبوان گرت و وەلامی پرسیارەکانی دایەوە .
خوێنەران ئاگاداردەکەینەوە کە ٢/٥ شەممەی هەفتەی داهاتوو کتێبەکەی لە کتێبخانەی ئەندیشە دەربارەی کوردو داعش بە ئامادە بوونی دکتۆریاسین دابەش دەکرێت .
