جینۆسایدی ئەرمەن و کاک ئارام شێخ مەحمەد؟
جینۆسایدی ئەرمەن و کاک ئارام شێخ مەحمەد.
تەها سلێمان
لەكاتێكا لەسەرتاسەری دنیا، رۆژانی پێش ئیستاو ئەمڕۆ 24-4-2015، بە شێوازی جۆراو جۆر یادی 100 ساڵەی جینۆسایدی ئەرمەن لە لایەن دەوڵەتی عوسمانی دەكرێتەوەو زۆربەی داواكارییەكانیش روو لە دەوڵەتی توركیان وەك میراتگرەوەی دەوڵەتی عوسمانی، لە كوردستان و عێراقیش ئەم یادەوەرییە تاڵە كە زیاتر لە ملیۆنێك قوربانی لێكەوتوەتەوە، باس و خواسی لێدەكرێ، هەروەك بڕیاریش بوو نوێنەری ئەرمەنەكان بەم بۆنەوە ووتارێك لە ئەنجومەنی نوێنەرانی عێراق پێشكەش بكات، بەڵام جێگای سەرنج و هەڵوەستە لەسەركردنە كە وەك سەرچاوەكان ئاماژەی بۆ دەكەن جێگری سەرۆكی ئەنجومەنی نوێنەرانی عێراق “ئارام شێخ مەحمەد” كە پشكی كوردە رێگری لە خوێندنەوەی ووتارەكە دەكات، بە پاساوی ئەوەی ئەمە دەستوەردانە لە كارو باری ناوخۆی وڵاتی توركیا؟!
تا ئێستا دوای ئەوەی “23” دەوڵەت دانی بە كۆمەڵكوژی ئەرمەنەكان وەك تاوانی جینۆساید ناوە، بە رێكخراوی نەتەوە یەكگرتوەكانیشەوە، لە گەڵ چەندین ولایەتی نەتەوە یەكگرتوەكانی ئەمریكاو پەرلەمانی ئەوروپاو چەندین رێكخراوی مافی مرۆف وبە سەدان شارەزاو پسپۆری بواری جینۆساید وەك تاوانی جینۆساید دەیناسێنن، كەچی تازە بە تازە كاك ئارام شێخ مەحمەد بە پاساوی دەستوەردان لە كارو باری ناوخۆی توركیا، رێگری لە خوێندنەوەی ووتاری نوێنەری ئەرمەنەكان دەكات؟
كاك ئارام یان بیری چوە یان پێیان نەوتوەو ئاگای لە دەورو بەری خۆی نیە چی دەگوزەرێ، چونكە ئەگەر هەركامیانی بزانیبایە، دەبوایە نەك رێگری بەڵكو هەرچی ئاساناكاری هەیە بیكردایە بۆ ئەوەی نوێنەری ئەرمەنەكان ووتارەكەی پێشكەش بكردایە. بۆ نموونە توركیا لە بەرامبەر فشارە ناوخۆی و نێودەوڵەتیەكان بۆ ئەوەی دان بە جینۆسایدی ئەرمەنەكاندا بنێ و داوای لێوبردنیان لێ بكات، كەچی كاك ئارام رێگە بە خوێندنەوەی ووتارێك نادات؟
پرسیارێكی سادە لە كاك ئارام: ئایا ئەگەر كاك ئارام وەك نوێنەری كوردو كوردستان بڕواتە وڵاتێك و بیەوێ بەناوی كوردو كوردستان ووتارێك لە یادەوەری جینۆسایدی “هەڵەبجە یان ئەنفال یان فەیلیەكان یان بەرزانیەكان یان ئێزدییەكان” پێشكەش بكات و داوا لە حكومەتی عێراق بكات قەرەبووی كەس و كاری قوربانیەكان بكات وەك میراتگرەوەی حكومەتەكانی پێش خۆی داوای لێبوردن لە گەلی كوردو كوردستان و پێكهاتەكانی بكات ئەمە دەستوەردانە لە كاروباری ناوخۆی عێراق و دەبێت رێگری لێبكرێت؟
لێرەوە، داوا لە كاك ئارام دەكەم وەك یەكێك لە بەرپرسە گەنجەكان و بەتایبەت لە سەرپشكی كوردستان داوای لێبوردن لە نوێنەری ئەرمەنەكان لە عێراق بكات، هاوكات پشتگیری خۆی بۆ دۆزی ئەرمەنەكان رابگەیەنێ، نەك بە پێچەوانەوە وەك ئەو هەڵەیەی ئەمڕۆ كردی؟
لەماڵپەڕی جینۆساید کورد وەرگیراوە
