بەدشداشەو جلی خەستەخانەوە گەڕامەوە بۆ ماڵەكە .
ئیدریس عەبدولقادرمستەفا:
بەدشداشەو جلی خەستەخانەوە گەڕامەوە بۆ ماڵەكە
ئا: باوكی هۆزان
تایبەتە بە گۆڤاری ئەنفالستان
ئەم بەسەرهاتەی ئیدرریس عەبدولقادر زۆر سەرنجراکێشە، هەرچەندە لەژمارە (٤) گۆڤاری ئەنفالستاندا بە گرنگی پیدانەوە بڵاومان کردەوە، بەلام بەداخەوە وەک هەموو چیرۆکەکانی تری ئەنفال وکیمیاباران هێندەی پیویست بوو پێشوازی لینەکرا. بۆیە جارێکی تر ماڵپەڕی ئەنفالستان دەیخاتەوە بەردیدە .
گوندی (دەرە شیش)[1] سەرووی چەند رۆژێك وێرانبوونی شاری هەڵەبجەوكیمیابارانكردنی، ئەوە بۆ من رۆژێكی سەیر بوو، یەكەم رۆژو بۆیەكەمجارم بوو بتوانم بۆماوەی چەند رۆژێك، لەماڵ بچمە دەرەوە لە كاتێكدا من هێندە منداڵ نەبووم بەڵكو تەمەنم 16 ساڵان بوو، ئەوە بوو لە بەرواری 10/3/1988 بە تكایەكی زۆروپارانەوەم لە باوكم كە رێگەمبدات، بچم بۆماڵی خزمێكی خۆمان لە سلێمانی، بەڵام هەرچەندی دەكۆشام نەیاندەهێشت‌و قایل نەبوون، ئەمەش لەبەرئەوەبوو كەوامن تاقانەبووم، برای شەش خووشك بووم هەمووشیان لەخۆم بچوكتر بوون، لەبەر ئەوە دەستبەردارم نەدەبوون بچمە هیچ كوێیەك، بەڵام ئەمجارەیان قەدەری خوای گەورە رازی بوون، بچم بۆ سلێمانی بەڵام لەوێ ئیسراحەتم نەكردوو كارەساتی كیمیابارانی هەڵەبجە روویدا، كە من هێشتا ئەم ووشەیەم نەبیستبوو، بۆیە زۆر بەڵامەوە سەیربووكە باسدەكرا، یەكدوو رۆژێك هەروا باسدەكرا گوایە قەسفكراوەو شەرهەیە، ئیتر دوای یەكدوو رۆژ ووشەی كیمیاباران دەكرا، ئەمە ناوشاری سلێمانی بەتەواوی گرتەوە، ئیتر لەهەموو كوچەو كۆڵانێكی شاری سلێمانیدا دەنگۆی ئەم كارەساتەت دەبیست، منیش تەنها مامەیەكم لەشاری سلێمانی بوو، ئەویش بۆكارێك هاتبوو، لەوێ یەكمانگرتەوەو بریارماندا بچینەوە بۆهەڵەبجە، ئێمە هاتینە شارۆچکەی سەید صادق، بەڵام عەسكەرێكی زۆری تێدابوو بەهیچ زیاتر نەیاندەهێشت لەوێ زیاتر برۆین، ئیتر بەناچاری‌و بەدڵێكی غەمبارەوە گەڕاینەوە بۆ سلێمانی، غەمبارییەكی وا كەوەك دنیا ئاخر بووبێت لەلای ئێمەوابوو، چونكە كە گەراینەوە بۆ سلێمانی ئاگامان لە كەس‌و كارمان نەما، لەشاریش تەنها ماڵێكمان شك دەبرد، بۆی بچین، ئەویش چەند رۆژو چەند مانگ؟! ئیتر گوێقوڵاغ بووم، بۆ دەنگ‌و باسیان بزانم ماون یان نا ؟ هەموو رۆژێك دەهاتمە ناو بازاڕەكە، هەرچەند زۆریش شارەزا نەبووم، كەچی بەعسیە جەلادەكان لەویش نەیاندەهێشت ئارام بگرین، لەبەر ئەوەی دەگەران بە دوای هەڵەبجەییەكاندا، چەند جارێك منیان گرت بەڵام لەبەرئەوەی هێشتابچووكبووم بەریاندەدام،، ئیتر ئەمرۆژەم دەدایە دەم ئەو رۆژ، بۆهەواڵیك هیچم دەست نەدەكەوت، ئیتر بێزارییەكی وا دایگرتم وەك بەسەر ئەمدنیایەوە نەبم وابوو بۆمن، ئەو مالەشی كەمنیان داڵدەدا بوو بەهۆی منی هەڵەبجەییەوە زۆر نارەحەت ببوون، گیانم بە كورەكەیان وو كە زۆر دڵنەوایی دەكردم‌وقسەی خۆشی بۆدەكردم، لەراستیدا منیش زۆر دڵم بەو دەكرایەوە،كەمێك لە ئازارو خەمەكانمی كەم دەكردەوە. من رۆژانە بەخەمی خێزانەكەمانەوە دەتلامەوە، رۆژێكیان لەگەڵا مامەم لە گەرەكی ئازادیەوە بە پاص دەهاتینە خوارەوە، ئەو رۆژە هەر لە بایانییەكەیەوە تەندروستیم باش نەبوو، وەزعم خراپ بوو، مامەم خێرا بردمی بۆ نەخۆشخانە، لەوێ چەند دەرزی‌وحەبێكیان پێدام‌و مامەم هێنامییەوە بۆ ماڵ ناسیاوە كەمان، خێرا جیگایان بۆ داخستم‌و دور لە سۆزو خۆشەویستی دایك‌وباوك‌و خوشكەكانم خۆم داپۆشی، ئیتر ووردەوردە ئازار شاڵاوی بۆ هێنام لەپڕ دەست‌وقاچم رەق هەڵاتن‌و وەستان، ئیتر ئیشیان نەكرد، ئازاریشم زۆر زۆر بوو ناچار قیژاندم‌وهاوارمكرد، كە بێن بەدەممەوە، ئیتر هاتن‌و بەچواردەستە هەڵیانگرتم‌و بردمیان بۆ ناو سەیارەیەك‌و بەخێراییەكی زۆر فراندمیان بۆ نەخۆشخانە، لەوێ بەخێرایی ئاویان بۆهەڵواسیم، دكتۆرێك هات تەماشای كردم‌و ووتی : بیبەن بۆ ژووری تایبەت. كە بردمیانە ئەوێ كابینەیەك بوو، لە دوری خەستەخانەكەوە، ئیتر مواجەیان لێ قەدەغەكردم، چونكە توشی دەردە كۆلێرا ببوم، ئیتر لەگەڵ دكتۆرێكدا بۆماوەی 9 شەو هەرلەوكابینەیەدا بە دووقوڵی ماینەوە، پاشان وردەوردە بەرەو باشتر دەچووم، كاتێكیش دەرچووم پاش 14 رۆژ داوای جل‌وبەرگەكەی بەرمم كردەوە، كەچی وەڵامێكی سەیریاندامەوە كابرایەك ووتی : بابە برۆ بەس نیە خۆشتیان نەسووتاندووە! منیش ناچاربووم بە دشداشەو جلی خەستەخانەوە گەرامەوە بۆ ماڵەكە، تەنها(5)دیناریشم پێبوو، یەكدوو رۆژێك لەمالەكە كەوتم تا عیلاجەكان تەواو بوون، ئیتر كەوتمەوە گوێقوڵاغبوونی هەوالی باوكم‌وخوشكەكانم، ئەم دەنگ‌وباسە چووبووە قوللەی قافەوەو خەبەرێكیان هەرنەبوو، چەند جارێك خەڵك دەهات هەریەكەو هەواڵێكی پێبوو یەكێك دەیگوت ماون‌و هەزاردەیگووت نەماون، یەكێك دەیگووت ماون‌و لە فڵان شوێنن، ئەمانە زۆر كاریگەری خراپیان دەكردە سەرم، زۆرجار بەتەنها دەچوومە شوێنێكو دەكەوتمە خەیالەوەو پاشان ئاو بەچاوانمدا دەهاتە خوارەوە،دەستم دەكرد بەگریان، بەم حالەوە ماوەی شەش مانگێگ لەو مالە مامەوە، ئیتر لەتوانامدا نەماو بیرم لەوەكردەوە بچم بەرەو ئیران، ئەمەم بەمامەم ووت، ئەویش پەسەندی كرد، برادەرێكی قاچاغچی دۆزییەوە كە هەردووكمان بە بری 200 دینار لەقەندیلەوە بگەیەنێتە خاكی ئێران ئیتر مەوعدمان لێوەرگرت‌و تا رۆژی رۆیشتنمان هاتە پێشێ، لە گەركی ئازادی شاری سلێمانییەوە من‌ومامەم سواری پاص بووین، بەونیازەی كە سەعات حەوتی بەیانی لەبازاربین، لەپڕیەكێك دای لەتنیشت پاصەكەو پاصەكە وەستا، كەسەیرمانكرد یەكێكە لە دۆستەكانمان، بانگی ماممی كرد ووتی كاك خالید دابەزن، نازانم ئەم رێكەوتە چۆن بوو؟! ئەم پیاوە لە ئۆردوگای نەسرەوە چۆن گەیشتبووە ئازادی، چۆن ئاگای لە ئێمە بووە كە سواری ئەم پاصە بووین، كە ئێمە دابەزین سەرمان سورمابوو، مامەم ووتی كاكە خێرە چۆن گەیشتوویتە ئێرە، ئەویش وەڵامی داینەوە: باوكم ناردوومی تا فریاتان بكەوم‌ونەهێڵم ئێوە برۆن بۆ ئێران، ئینجا ووتی جا وەرن بابچین بۆ ئۆردوگای نەسر بۆ ماڵی ئێمە، لەراستیدا من زۆر بێتاقەت بووم، لەوەی كە سەفەرەكەمان سەری نەگرت، چونكە ئەوەندە بیری مالەوەمان باوكم‌وكەس‌وكارم دەكرد، خەریك بوو شێت دەبووم.
كە گەیشتینە نەسر ئەوە پیاوەی كە ئێمەی گێرایەوە هەرلەگەلماندا بوو ووتی: كاكە خزمێكی نزیكی خۆتان لەئێران هاتووەتەوە هەوالی ئێوەش دەپرسێ، ئێمەش ووتوومانە وا خەریكن دەچن بۆ ئێران بەڵام ئەوو پێی ووتوین مەهێڵن بانەچن، ئێمەش بۆیە هاتین بۆئەوەی ئەو سەفەرەنەكەن، منیش ووتم جا ئەو خزمە پەیوەندی بەم سەفەرەی ئێمەوە چییە؟ بەهەرحاڵ ووتی كاكە ئەم نیوەرۆیە لەماڵی ئێمە دەعوەتن‌وئەویش لەوێ‌یە، ئیتر ئێمەش لەگەڵ مامەدا چووین بۆماڵەكە، نیوەرۆكەی لەماڵا ئەوان بووین، دوای نانخواردن من چووم دەستم بشۆم ئەوان راستیە تالەكەیان بەمامەم ووتبوو( كاكە بۆكوێ دەچن سەرلەكورەكە مەشێوێنن، راستیەكەی نە تۆو نەئەویش كەستان دەرنەچووەونەماوون، كارێكیش مەكە ئەم كورە هەست بكات، دڵنەوایی بكە ووردە وردە قەناعەتی پێبكە، تا خۆی بەرەبەرە دەیبیستێ، باسەری لێنەشێوێ) منیش لەم چیرۆكە سامناك‌و تراژیدیە بێخەبەربووم، بەڵام كە گەراینەوە بە مامەم ووت: نهێنیەك هەیە لێم مەشارەوە، پێمبڵێ ئەمكۆبوونەوەیە چی بوو؟ بۆ نەرۆیشتین؟ بۆئێران ، ووتی هیچ نیە. تەنها وویستیان ئێمە نەچین بۆ ئێران‌و سەرمان لێنەشێوێ.
-جا سەرلێشیوان لەمە خراپتر؟
+ بەڵێ لەمەش خراپتر زۆرە.
دوایی بەمامەم ووت: باشە ئەی دایكم‌و باوكم، ئەو ئاوا وەڵامی منی دایەوە كە ئەو پیاوە ووتوویەتی كە هەمووی 3 مانگی ترنابات، هەموو ئەوانەی لەئێرانن دەگەڕێنەوە ئیتر ئێمە بۆ بچین بۆ ئێران، ئیتر هەرچۆنێك بوو لەگەڵ چەند دۆستێكی تر قایلیانكردم ماوەیەكی تری پێچوو، نەخێر دومانگێكی تری پێچوو من هەرلەم گێژاوەدا دەژیام، ئیتر رۆژێكیان مامەم هات ووتی ئیدریس بۆچی بۆخمان نەچینە ئۆردوگای باریكەو لەوێ هۆدەخانویەك بگرین‌وتیایدا دابنیشین، باهیچی ترئەزییەتی ئەم ماڵە نەدەین( مەبەستی ماڵەكەی سلێمانی بوو)مالەكە پۆرزای باوكم‌ومامەم بوو، منیشبەناچاری بەمە قایل بووم، چونكە دڵم بەوان دەكرایەوە‌وكورەكەیان هاورێم بوو، قسەی خۆشی بۆدەكردم‌ودڵنەوایی زۆری دەكردم، بەهەرحاڵ من‌و مامەم بەسەڵتی رومانكردە ئۆردوگای زۆرەملێی باریكە(برایەتی) چوینەماڵی ئاوەڵ زاوایەكی مامەم كەدووكچی ئەوانیش شەهید ببوون،كە یەكێكیان هێشتا شووینەكردبوو، ئەویش بەسەردان چوبووە هەڵەبجەبۆماڵی مامەم.
كابرا ووتی بۆ هیچ شوێنێك مەچن، لەهۆدەیەكی ئێمەدا دانیشن، مامەمەشم دوای مەمنونی دەربرین وووتی باشە خوشكیكم ماڵیان لەنەسرە دەچم خوشكەزایەكی خۆم دەهێنم، بائیش‌وكارو بنەوانیمان بكات، ئەو كچەكە مامەم دەیویست بیهینێ بۆلامان خاڵوزای خۆشمی دەكرد، بەڵام كابرا بەمە رازی نەبوو سوێندی لێخواردین ووتی: ئەگەر كارێكی ئاوابكەن بە خزمتان نازانم‌و لێرەش جێگەتان ناكەمەوە، ئێمەش ناچار بە گوێمانكرد كچە خالۆكەمان نەهێنا بۆئەوێ، بەم حالەشەوە نزیكەی 9مانگێك لەوێش ماینەوە، ئەوەی هەقە باسی بكەم لەوماوەیەدا كابرا نەخۆیی‌ونەژنەكەی تەنانەت قسەیەكیان نەكرد ئێمەی پێ نارەحەت بین. ئیتر رۆژێكیان مامەم ووتی ئیدریس دەمەوێت داوای كچێكی خاڵۆت بۆ بكەم، چی دەلێیت؟ منیش چونكە رەئییەكان لەدەست خۆمدا نەبوو، ووتم نازانم خۆت دەیزانی، ئیتر مامەم چوو بوو بۆ داوای كچە خاڵۆكەم‌و ئەوانیش رازی ببوون. هەمووی ماوەی هەفتەیەكی پێچوو كە چووین بۆ مارە برینی، هەروا پێنج مانگێك دەستگیرانم بوو رۆژێك مامەم ووتی : واباشە ئێمە لێرە باربكەین بۆ نەسر‌و نزیكی مالی خلۆت ببینەوە باشترە، منیش پرسیم بۆچی؟ ووتی لەبەرئەوەی لەوێ خانوویەك دەگرین‌و نزیك مالی خلۆت بێت باشترە تۆش ژنەكەت بگوازەرەوە، من ئەمەم پێخۆش نەبوو چونكە لە باریكە راهاتبووم‌و نەسریشم زۆر بەڵاوە ناخۆش بوو، چونكە لەماوەی ئەو نۆ مانگەدا كۆمەڵیچك هاوڕێی زۆر باشم پەیداكردبوو، دایك‌وباوكیان دەیانناسیم‌و دڵیان پێمدەسووتا، هەركاتێك خواردنێكی خۆشیان ببوایە بە كورەكانیان دەگوت ئیدریس بانگ بكەن بابێتەوە بۆ ئێرە، ئەوانیش دەهاتن تەكلیفیان لەمامەم‌و مالی ئاوەڵزاواكەی دەكرد كە ئەو ئێوارەیە لەگەڵ ئەواندا بچم.
سەرئەنجام باریكەم بەجێهێشت‌و بەرەو ئۆردوگای زۆرەملێی نەسر رۆیشتین، لەوێ خانوویەكمان لەنزیك مالی خالۆمەوەگرت‌و هەروا ماوەی مانگێك لەوخانووەدا بووین، من ژنەكمم گواستەوە، بەڵام بەراستی نەسر زۆر ناخۆش بوو كەسمان نەدەناسی، دەستم كورت بوو، زۆر هەبەهەژاری دەژیاین. لەو ماوەیەدا رۆژێك چووم بۆ سلێمانی‌و سەردانی ئەومالەخزمەمانم كرد كەلێی مابوومەوە، دانیشتبووین لە پڕیكدا كابرایەكی دۆستی ماڵەكە هات، بەڵام من نەمدەناسی‌وئەویش منی نەدەناسی، خاوەن مالەكە پرسیاری لێكرد ئەرێ دەنگوباسی ئێران چییە، ئەو خزمانە كێ ماوە كێ نەماوە؟ ئەویش ناوی چەند كەسێكی هەڵدا ئەوە ماوەو ئەوە مردووە، ئینجا ووتی ماڵی عەولقادری مستەفای لای خۆشمان (كە باوكی من دەكات) بەتەواوی تێدا چوون‌ودەڵێن كورەكەیان ماوەو لەسلێمانییە، خاوەن مالەكەش بە هەناسەیەكی ساردەوە ووتی وەلللە ئەمە كورەكەی ئەوە، بەڵام من دنیام لێ ئاخیر بوو، نەمدەزانی چیبكەم؟! نەبەگریان نەهاوار، هیچ شتێكی دادی نەدەدام، هیچ شتێك نەبوو ئەم ئێشەسەخت‌وبەئازارەم لەكۆڵبكاتەوە یەكپارچە گروئاگربەربووە گیانم، هەرئەو ئێوارەیە ئۆقرەم لەبەربراو گەرامەوە بۆماڵەوە، بۆماوەی مانگێك نەمدەزانی كە مرۆڤم لەپڕ نەخۆشییەك لێدام ئازارێكی زۆر بە تەوژمم بۆ هاتو بورامەوە بە خێرایی سەیارەیان هێنابوو هەرئەو شەوە هێنایانمەوە بۆسلێمانی‌و سەعات ١١گەیاندیانمە نەخۆشخانە، بەپەلە عەملیاتیان بۆ كردبووم، بۆ بەیانیەكەی هۆشم هاتەوەبەر خۆم، مامەم پێی ووتم گۆشتێكی زیادە نزكەی كیلۆونێویك دەبێت لە مەعیدەتا بووە تەنانەت دكتۆرەكانیش سەریان لێی سوڕماوە، بەو حالەوە هەشت شەو لە نەخۆشخانەمامەوە ئازارێكی زۆرم هەبوو، دواتر دەریانكردم‌وگەرامەوە بۆ مالەوە، هەر دوو شەو لەمالەوەبووم هەناسەم تووند بوو، دیسان بەخێرایی بردمیانەوە بۆنەخۆشخانەی سلێمانی، كە گەیشتمە ئەوەێ پاش ئەوەی چەند فەحسێكیان بۆ كردم خێرا نەقلیانكردم بۆ كەركوك، ٧رۆژیش لە كەركوك مامەوە، تا دەهات حاڵم خراپتر دەبوو، ئینجا هەستمكرد ووردەوردە لە پێدەكەوم، هەر هاوارم دەكرد بۆئەوەی نەقڵم كەن بۆ بەغداد، ئەوانیش هەر دەیانگووت چاوەڕێی ئەنجامی فەحسەكانین ناردوومانە بۆ بەغداد، فەحسی ئەو پارچە گۆشتەی لە سكم دابوو، ئیتر نەتیجە نەدهاتەوەو منیش خەریك بوو دەمردم.
ناچاربووم پێیان بڵێم ئەگەر نەمنێرن لەخەستەخانە دەچمە دەرەوەو خۆم دەرۆم چی دەبێت با ببێت بابمرم، ئیتر لەسەر ئەركی خۆم نەقلیانكردم بۆ بەغداد لەگەڵ مامەم رۆیشتین، بەڵام من هیچ نەمدەتوانی بە پێ برۆم هەر 50مەتر دەرۆیشتم‌و دەبوایە دابنیشم، هەرچۆنێك بوو گەیشتینە دەرەوەی خەستەخانەكە، ئیتر سەیارەیەكیان بە خصوصی هێناو چوین بۆ بەغداد، لەوێ دەستی دەستییەكی زۆریان پێكردین، شوێنەكەمان نەدۆزییەوە، خەریك بوو شەومان بەسەردادەهات، ئیتر تاریكی كرد منیش نەمدەتوانی لە شوێنی خۆم بجوڵێم ئیتر نازانم چۆن بوو مامەم شوێنەكەی دۆزییەوە هەرلەناو خەستەخانەكەدا ئیسعافێكی بۆهێنام‌و بردیانمە ئەو ژوورەی كە لەسەر وەرقەی نەقلەكەم نوسرابوو، ئەو شەوە بەرەو مەگ دەرۆیشتم لە تاو ئازار دەمردم‌و زیندوو دەبوومەوە، دەبوورامەوەو هۆشمدەهاتەوەبەر، هەرچی دەهات هەر عەرەب بوو، مامەشم هەردەگریا بەدیارمەوە‌و عەرەبیشی باشنەدەزانی، دكتۆریش نەدەهات بەهانامانەوە ئەو شەوەم لێبوو بەسلێك نەدەبرایەوە، بۆبەیانی كە رۆژ بوویەوە، بردمیان بۆ فەحس‌و تیشك، پاشان تەختیتی دڵیان بۆكردم، ئەو شەوەش بەهەمان شێوە لەو قاوشەدا مامەوە من بەتەواوی ئاگام لە خۆم برا، ئیتر چاوم نەیدەبینی، قاچم نەدەجوڵا، بۆبەیانی كە دیسان رۆژبووەوە خستیانمە سەر عەرەبانەیەك، بەرەو شوێنێك پاڵیان پێوە دەنام كەسێك لەوانەی پاڵی بەعەرەبانەكەوە دەنا، بیبەن بۆ ئەو سەر كوردێك لەوێ‌یە، ئیتر بردمیان بەڵام لە دوای ئەوەوە بۆماوەی دوو رۆژ ئاگام لە خۆم نەما كەچی روویداوە، پاشان كۆمەڵیچك دكتۆر هاتن، یەك‌ودوو فەحسیان دەكردم، دەستیان دەدا لەسكم‌وكەلەكەم، پاشان لەسەر فایلەكەم عیلاجیان نوسیوو، دكتۆرێكی كوردی هەولێری لێبوو وتی : دەرزیان بۆ نوسیووی توك بەسەرتەوە نامێنێ، منیش ئازارمم زۆر زۆر بوو، ووتم هیچم ناوێت تەنها بمێن‌وئەم ئازارەم لە كۆڵبێتەوە، بەڵام بەو حالەشەوە هێشتا وورەم بەز بوو، رۆژێكی 4شەممە بوو، دەرزییان لێدام، زۆر بێتاقەتی كردم، تا ئێوارەی رۆژی شەممە هیچ توك بەسەرمەوە نەما، هەرچەندە قژیشم زۆر بوو، كەچی هەمووی بەدەست دەردەهات، من كەمێك گیانم پێمابوو مامەشم بێتاقەت ببوو، بەدیارمەوە كەسیش نەدەهات بۆلامان‌و سەردانمان بكات، چونكە هەم شوێنەكەمان دوربوو هەم خەڵكیش سەرقالی ژیان‌و گوزەرانی خۆی بوو، ئیتر پاش دەرزییەكان من ووردەوردە، بەرەو باشی دەچووم، هەتا وای لێها بەپێی خۆم دەمتوانی بچم بۆ دەرەوە دەرزیەكانیش هەفتەی جارێك بوون، كە وام لێهات ئیتر خۆم بجوڵێم داوام لەدكتۆركرد، مۆلەتم بدات، چونكە ماوەیەكی زۆر بوو لەمالەوە دابرابووم، بەتەواوی بێتاقەت بووم، لەنخۆشخانە برادەرێك لەتەنیشتم بوو ناوی (حسیب قەرەداغی) بوو، كاتێك من چووم ئەو لەوێ بوو، ئەویش هەمان نەخۆشی منی هەبوو، چونكە، قاوشەكە، تایبەت بوو بەم نەخۆشییە،(نەخۆشی خوێن) بوو نزیك بوو لە نەخۆشی شێرپەنجەوە، ئەو برادەرە (حسیب ) لەمن وەزعی باشتر بوو، چەند رۆژێك بەیەكەوە بوین، ئیتر ئەو بەرەوباشی رۆیشت‌و دەریانكرد، منیش داوامكردوو ووتم دكتۆر ئیجازەم بدە، دەچمەوە بۆ مالەوە ووتی ئاخر دەبێت هەموو هەفتەیەك لێرە ئامادەبیت، دەرزی بدەی لە خۆت، منیشم ووتم باشە . بۆیەنایەكەی ئیجازەی 7 رۆژی بۆ كردم‌و بەرەو ماڵ هاتینەوە، لە رێگا وەزعم خراپ بوو، كە گەیشتنینە دوز خورماتوو، خراپتر بووم، بەڵام تازە زۆر دوركەوتبووینەوە لە بەغدا، هەرچۆنێك بوو گەیشتینەوە مالی خۆمان، دوو رۆژ لەمالەوە بووم بەڵام تادەهات وەزعم خراپتر دەبوو، بەپەلە بردمیانەوە بۆ بەغدا، لەوێ 7 رۆژی تر مامەوە گەرامەوە ئیتر ناو دەمم هەمووی بوو بە زام، تاكو قورگم نەمدەتوانی تەنانەت محەلەبیش بخۆم، ناچار گەیاندمیانەوە بۆ بەغدا، دكتۆرەكە ووتی ئەوە كاریگەری دەرمانەكان، لەبەرئەوەی بەهێزن، كە گەیشتمەوە بەغدا تەماشادەكەم كاك حسیب لەوێ پاڵكەوتووە كەئەوم بینی تەواو ئەژنۆم شكاو وورەم بەردا، لەدڵی خۆمدا ووتم دیارە ئەم نەخۆشیە،كوشندەیە كاك حسیب هەموو گیانی ببووە زام، حاڵ‌وئەحواڵم لێی پرسی بە ئاستەم قسەی دەكرد، كوڕێكی تریشی لێبوو هی حزبی دیموكرات بوو، ئەویش هەمان نەخۆشی هەبوو، وەك من كەسی نەمابوو، ئەوبەستەزمانە هەردوو چاوی كوێر ببوو، كورێكی تری تەوێڵەیی لێبوو پشتی خوێنی دروست نەدەكرد، خوێنەكەی دەسووتاند، هەموو رۆژێ 4-5 بتڵ خوێنیان تێدەكرد، لەگەڵ سێ كوردی تردا، تا ئەو هەفتەی من چومەوە ماڵ‌و گەرامەوە ئەوان هەموویان گیانیان لەدەستدا، من بەهەوالی مردنیان زۆر دڵتەنگ بووم، ووتم منیش رۆژێك هەر تووش دەبمەوە، بەڵام خوای گەورە دەرفەتی دام‌و ئارەززی لەسەر نەبوو، ئیستا رۆژ بەرۆژ بەرەو باشی دەرۆم ئیتر دەرزیەكانم لە(٧) رۆژ جارێكەوە بۆ كرا بەمانگی جارێك، كە دەبێت بۆ ماوەی ٩ مانگ سەردانی دكتۆر بكەم، عیلاجەكانم تەواو بوو دواهەمین دەرزیم لەلێدانی عێراقدا بوو لەلایەن ئەمریكاوە، ئەو رۆژە دەرزیم هەبوو كەچی خەریك بوو لەوە لێدانەدا بكوژرێم بەم شێوەیە لەم نەخۆشییەش رزگارم بوو ئەمە تەنها كورتەیەكەلەژیانم.
[1] دەرەشیش ناوی گوندێکی هەورامانە لە کوردستانی باشور ئیدریس خەلکی ئەوگوندەیە
