سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
یادی ئەنفال و سفرە و خوانی تاقانەیەک !
یادی ئەنفال و سفرە و خوانی تاقانەیەک !
سمکۆسابیر
١٤ی نیسانی ٢٠١٥ – کەلار
رۆژی 14/4 لەیادی 27 ساڵەی تاوانی ئەنفالدا بووین لەگۆڕستانی دێبنە.بەهۆی وێنەگرتن و ئەنجامدانی چەند دیمانەیەك لەگەڵ كەناڵەکانی ڕاگەیاندن، درەنگ كەوتین و هەتا نیوەڕۆ هەر لەدێبنە ماینەوە، دواتر چەند کەسێک هاتنە ناو مەزارەکەوە ئەوانە تاقانەکانی ئەنفال بوون ( ئەوانەی هەموو کەسوکاریان لەپەلامارەکانی ئەنفالدا گیراون و هەر خۆیان بەتەنیا ماونەتەوە پێیان دەوترێت تاقانەی ئەنفال ) بەرلەچەند رۆژێک بریاری بایكۆت کردنی یادەكەیان دابوو، لەبەرئەوە نەهاتبوون بۆ یادەکە هەرکە مەراسیم كۆتایی هات ئەوانیش گەیشتنە ناو مەزارەكە و دوای خوێندنی فاتیحا بۆ رۆحی قوربانییانی ئەنفال، هاتنە لای ئێمە كەئەو كات من قسەم بۆكەناڵی nrt دەكرد. دواتر كاك سەباح نەجمەدینی تاقانەی ئەنفال زۆر خوڵقی کردین و فەرمووی لێكردین، كەدەبێت نیوەڕۆ میوانی ئەوبین سەباح ماڵیان لە گەرەکێکی ناحیەی رزگارییە . ناچاری کردین داواكەی جێبەجێبكەین لەگەڵ چەند کەسێکی تر کەئەوانیش تاقانەی ئەنفال بوون گەیشتینەماڵی سەباحی تاقانە، بەر لەوەی دەستبكەین بەنانخواردن سفرەكەیان چەند جۆرە خواردنێكی سادە و كوردەواری لەسەربوو، خۆشبەختانە ئەوەی سەرنجی راكێشام ، سەرسفرەکە گۆشتی تێدانە بوو، وەک بڵیی بێئاگابم لەوەی ئەو رۆژە لەگەرمیان بەتایبەتی ماڵی ئەنفالکراوەکان هیچ سەرنابڕن و گۆشت ناخۆن لێمپرسین كەچۆنە سەر سفرەتان بێ چەوری وگوشتە، كاك سەباح وخێزانەكەی بەیەكەوە بواریان بەمن نەدا قسەی تر بكەم و ئەوەی لەزارمدایە تەواوی بكەم، پێکەوە گووتیان ئێمە لە رۆژی 14/4 نە گوشت دەخۆین نە هیچ سەر دەبڕین ! چ وەڵامێکی جوان بوو لەناخەوە قسەکانیان دڵی پڕكردم، ! چونكە زۆرم پێخۆش بوو لەرۆژی 14/4 کە كەسوكاری ئەنفال پابەندن بەگۆشت نەخواردن و سەرنەبڕین.بۆیە زۆر بەگەرمی دەستخۆشیم لێكردن و پێمگوتن ئەوە تەنها پرسیارێك بوو،كە بزانم هۆكاری چییە كە سفرەتان بێ گۆشتە، ئایا بەڕێكەوت بووە ،یاخود بیرۆكەیەك لەپشت ئەو كارەوە هەیە..؟ زۆر سوپاسم كردن ئەوەشم پێگووتن كەمن هیچ جۆرە گۆشتێك ناخۆم نەك لە رۆژ لە 14/4 بگرە لەرۆژانی تری ئاساییدا. سەرتان نەیەشێنم لەماڵی ئەو تاقانەیە نانی نیوەڕۆمان خوارد، لەخۆشی ئەو كارەی سەباح نەجمەدینی تاقانەی ئەنفال جارێكی تریش باسی چۆن و چیەتی وگرنگی ئەو پرۆژەیەمان كرد كە ساڵانێك لەمەوبەر عومەر محەمەد سەرنوسەری گۆڤاری ئەنفالستان بۆیەكەمجار ئەو بابەتەی رووژاند و پێیگوتین چەند گرنگە هەموو ئەو زیندەوەرو پەلەوەرانەی چارەنووسیان لەژێر دەستی ئێمەدا تەنها ئەگەر بۆیەك رۆژیش ژیانیان پارێزراو بێت و هەر هیچ نەبێ بتوانین لەو رۆژەدا ژیانیان لێوەرنەگرینەوە .دواتر پرسیاریشم كرد زۆربەی تاقانەكانی ئەنفال ئەو پابەندییەیان ماوە و رێزی لێدەگرن . لێرەدا کۆتا قسە ئەوەیە چیمان لەدەست دەچێت ئەگەر بۆتەنیا ڕۆژێکیش بێت هاو هەڵوێست و هاو سۆزی ئەو خانەوادانەبین و ڕێز لە هەست و سۆزی ئەوان و هەموو زیندەواران بگرین ؟
