سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
دادگایی نه‌كردنی جاش و موسته‌شاره‌كان,سازشكردنه به‌خوێنی قوربانیانه‌وه
دادگایی نه‌كردنی جاش و موسته‌شاره‌كان,سازشكردنه به‌خوێنی قوربانیانه‌وه
لاوان ئه‌حمه‌د
(27) ساڵه‌تێده‌په‌ڕی به‌سه‌ر تاوانی ئه‌نفال و قڕكردنی كوردی له‌م به‌شه‌ی كوردستان و هێشتا دۆسییه‌ی به‌سزا گه‌یاندن و 
دادگایكردنی تاوانبارانی ئه‌نفال (جاش و موسته‌شاره‌كان) دۆسییه‌كی گرنگی پێنادراو به‌هه‌ند وه‌رنه‌گیراوه له‌لایه‌ن حكومه‌تی هه‌رێم وده‌سه‌ڵاتدارانی ئه‌م به‌شه‌ی كوردستان,به‌داخه‌وه فشارێك ئه‌وتۆش به‌دی ناكرێت نه‌له‌لایه‌ن رێكخراوه‌كانی داكۆكی له‌مافی قوربانیانی ئه‌نفال نه‌خودی كه‌س و كاری به‌جێماوی ئه‌نفالكراوه‌كان , ئه‌وه‌ی هه‌یه ساڵانه له یادی مه‌رگه‌ساته‌كه‌دا و له ئان و ساتی كولاندنه‌وه‌ی برینه‌كانیاندا جۆره هه‌ڵچون وناڕه‌زاییه‌ك به‌دی ده‌كرێت و رق وگڕی ناخی خۆیان به‌رامبه‌ر به‌و جاش و موسته‌شارانه بۆ كه‌ناڵه‌كانی راگه‌یاندن ده‌رده‌بڕن .
جاش و موسته‌شاره‌كان ئه‌وانن كه به‌نه‌خشه‌و خیانه‌تكردنیان خه‌ڵكی كوردیان راپێچی مه‌رگ و له ناوچوون كرد , ئه‌وانه‌ن كه‌چاوساغی و رێنوێنی به‌عسیان كرد له‌سه‌رخستی پرۆسه‌ی ئه‌نفال و ئیباده‌كردنی هاونیشتمانیانی خۆیان.به‌ڵام به‌داخه‌وه ئه‌وان(موسته‌شاره‌كان) نه‌ك دادگاینه‌كران نه‌ك شه‌رمه‌زار و ریسوا نه‌كران به‌ڵكۆ له‌دوای راپه‌ڕینه‌وه زۆر له‌و جاشانه كه‌رۆڵی خراپیان بینیوه له‌تاوانی ئه‌نفالدا وهه‌ستی نه‌ته‌وایه‌تیان تێكشكاند, ژیانێكی پڕ له به‌خته‌وه‌ریی و ئاسوده‌ییان بۆ فه‌راهه‌م كراو هه‌ندێكیان كران به به‌رپرس و راوێژكار , زۆرێك له‌وان كه‌ده‌ستیان به خوێنی پێشمه‌رگه سووره له گه‌ڵ چه‌ندین ئه‌نفالچی تر به‌پله‌ی به‌رزی سه‌ربازی خانه‌نشین كراون ,كه‌ئه‌مه‌ش ئه‌نفالێكی تر و خیانه‌تێكی تره وله‌هه‌موو له‌لایه‌ك زیاتر یه‌كێتی و پارتی وه‌ك دوو هێزی فه‌رمانڕه‌وا لێی به‌رپرسیارن و په‌نجه‌ی تاوان و به‌رپرسیارێتی رووه‌و ئه‌وانه.
له(27) ساڵه‌ی تاوانی ئه‌نفالدا ده‌بێت ئه‌و پرسیاره ته‌رح بكرێت :بۆچی دۆسییه‌ی دادگایكردنی جاش و موسته‌شاره‌كان له‌لایه‌ن حكومه‌تی هه‌رێمه‌وه گرنگی پێنادرێت؟
ده‌بێت مه‌ترسی جوڵاندنی ئه‌و كه‌یسه چی بێت ؟ رێكخراوه‌كانی داكۆكی له مافی قوربانیانی ئه‌نفال بۆ وه‌ك پێویست فشار دروست ناكه‌ن,بۆچی خائین و خۆفرۆش خۆش بژین ؟ بۆچی ئێمه ته‌نها له‌یادی مه‌رگه‌ساته‌كه‌دا توڕه‌ده‌بین و ده‌خوازین ئه‌نفالچییه‌كان به‌سزا بگه‌یه‌نرێن ؟ ئه‌مانه‌وه ده‌یان پرسیاری تر ده‌بێت به‌رده‌وام ته‌رح بكرێن و سۆراخی وه‌ڵامه‌كانیان بكه‌ین.
ئه‌گه‌ر له‌سه‌رده‌می راپه‌ڕیندا به‌ره‌ی كوردستانی بڕیارێكی له‌و چه‌شنه‌ی دابێت بۆ لێخۆش بوون له (ئه‌نفالچییه‌كان) ئه‌وه ئه‌و به‌ره‌یه ده‌بێت بزانێت گه‌وره‌ترین موزایه‌ده و سازشی به‌خوێنی شه‌هیدان وقوربانیانی ئه‌نفاله‌وه كردووه , ئه‌مه‌وه جگه له‌وه‌ی به‌ره‌ی كوردستانی هیچ شه‌رعیه‌تێكی یاسایی نه‌بووه ,جگه له‌شه‌رعیه‌تی شۆڕشگێڕی نه‌بێت, وه‌ك ئاشكراشه ئه‌م كه‌یسه په‌یوه‌سته به یاسه‌وه كه‌سێك تاوانێك ده‌كات پێویسته یاسا لێپێچینه‌وه‌ی له‌گه‌ڵ بكات. .
وه‌ئه‌گه‌ر له دوای ڕاپه‌رینه‌وه ئه‌م تاونبارانه دادگایی بكرانایه و سزای خۆیان وه‌رده‌گرت ئه‌وه هیچ كوردێك جارێكی تر بیری له خیانه‌ت و ئازاردانی گه‌له‌كه‌ی نه‌ده‌كرده‌وه , هیچ كوردێك ئاماده نه‌ده‌بوو سه‌نگه‌ر له‌هێزی پێشمه‌رگه بگرێت و ببیت به داعش ..له كۆتایدا ده‌بێت هه‌موو لایه‌ك بزانن كه ده‌ستی سازشكاری له‌پرسی داداگایكردنی جاش وموسته‌شاره‌كان به روونی دیاره,بێ ده‌نگ بوونیش ئه‌و پرسه بۆ زیاتر ته‌ئجیل ده‌كات.
