سه‌ردێره‌كان
- تاوانی ئەنفال و زیانە کلتوورییەکانی کورد لەکوردستانی باشوردا. هۆمەر محەمەد
- ڕۆڵی سینەما لە پاراستنی یادەوەری ئەنفالدا – وانەیەک لە هۆڵۆکۆستەوە
- سەرنجێک لەسەر دەرکەوتنی (بەراء) هۆمەر محەمەد
- الإجرام بصيغته القانونية 2 جريمة إسقاط الجنسية والترحيل – قرار (٦٦٦)
- دیسانەوە دۆسێی ١٨ کچە فرۆشراوەکە لەنێوان ساختە و ڕاستیدا. هەڵوەستەیەک لەسەر قسەکانی کاک شۆڕش حاجی
بەسەرهاتی تاقانەی ئەنفال (ئاری كاكە برا حەمە عەلی)
بەسەرهاتی تاقانەی ئەنفال ئاری كاكە برا حەمە عەلی
ئاری ساڵی 1984 لە گوندی سێوسێنان لەدایك بووە.
بەرلەوەی تاوانی ئەنفال وكیمیابارانی سێوسێنان بكرێت تەمەنی هەروا ساڵ ونیوێك بوو، كە بە منداڵی لێی قەوماو دایكی بەناوی ( نزار محەمەد) بە نەخۆشی كۆچی دوایی كرد، ئیتر هەرلە منداڵییەوە كەوتووەتە لای عەتیە ئەحمەد مەحمودی نەنكی هەرئەو بەخێوی كردووە.
لە پەلاماری ئەنفالی دووی قەرەداغدا پاشئەوەی گوندەكەیان كیمیاباران كرا كاكە برا حەمە عەلی ماڵ‌و حاڵی خۆی بەجێهێشت، بە نیازی خۆ دەربازكردن، ئاژەڵەكانی پێشخۆیدا بەرەو چیای گلەزەردەو بەنیاز بوو خۆی بگەیەنێتە شاری سلێمانی، بەڵام لەرێگا لە چیای گڵەزەردەی بەرامبەر شاری سلێمانی، كەوتە بۆسەیەكی سوپاو هێزەكانی ئەمنی سلێمانیەوەو لەوێ دەستگیركراو ئیدی لەو ساتەوەختەوە بێ سۆراخ مایەوەو وەك هەر ئەنفالكراوێكی تر چارەنوسی نادیارە .ئاری كە پێشتر هەر بێ دایك بوو، ئەوا ئیتر باوكیشی لەدەستدا .
كاكە برا حەمەعەلی بژێوی ژیانی لەسەر كشتوكاڵ و ئاژەڵداری بوو، لەهەمانكاتدا پێشمەرگەی (ی.ن.ك) بوو، لەگەڵ (د. فایەق گوڵپی) لە خەستەخانەكەی شۆڕش بوون كە بارەگاكەی لە بەلەكجاری ئەوبەری گوندی سێوسێنان دامەزرابوو، بەڵام ئەوە تارادەیەكی زۆر بۆ ئاری تاقانە بەجێماوی خانەوادەكەیان بووە مایەی سەرئێشە، لەبەرئەوەی لەو سەروەختەدا نەیانوێراوە (تەسكەرە) پێناسی باری شارستانی بەناوی باوكییەوە بۆ دەربهێنن، بە ناچاری لەسەر مامێكی بەناوی (عوسمان حمە علی) مامەڵەی یاسایی بۆكراوەو کراوە بەکوڕی عوسمان، بەڵام كاتێك لەساڵی 1998 هەوڵیدا ناوەكەی بخاتەوە سەر بنەرەتی خۆی و بەناوی باوكی خۆیەوە ناوی لە فەرمانگەی باری شارستانی تۆمار بكات توشی كێشەی یاسایی و بێنەو بەرەیەكی زۆر بووە، بەتایبەتی لەبەرئەوەی ئەو مامەشی لە ژیاندا نەمابوو چوارساڵ پێشتر ساڵی (1994) كۆچی دوایی كرد بوو، بەڵام هەرچۆنێك بوو دوای ماوەی ساڵێك ئەمسەر و ئەوسەرو بێنەوبەرە توانی مامەڵەی راستكردنەوەی ناوی خۆی بنەرەتی راستبكاتەوە .
ئاری تاقانە هەتا نەنكی ( عەتیە ئەحمد محمود) لە ژیاندا مابوو هەر پێكەوە لەگەڵ ئەودا دەژیان، بەڵام ساڵی (2009) نەنكیشی كۆچی دوایی كردو دیسانەوە بەتەنیامایەوە . خۆشبەختانە ئێستا هاوسەرگیری لەگەڵ ئامۆزایەكی خۆیدا كردووەو باوكی دوو كچە .
ئاستی خوێندەواری تەنها قۆناغی دوهەمی ناوەندی بڕیوە .
ئێستا كاری شۆفێری تەكسی دەكات و بەوە بژێوی خۆی بەرێوەدەبات .
لە سێوسێنان بە كشتوكاڵ و ئاژەڵداری ژیاون و باوكی لەگەڵ ئاژەڵەكاندا هاتووە بەمدیودا
كەسێك كە ئاری نازانێ كێیە لەگەڵ باوكیدا بووە لە ناو شاری سلێمانی لە نزیكی دەساڕەكە خۆی فڕێداوەو بەهۆیەوە رزگاری بووە .
