پەیاممان لە یادی (٢٧) بیست و حەوت هەمین ساڵیادی تاوانی ئەنفالدا

نیسان 12, 2015 Omer ئه‌نفال لێدوان نووسین ناچالاککراوە لە پەیاممان لە یادی (٢٧) بیست و حەوت هەمین ساڵیادی تاوانی ئەنفالدا

---

پەیاممان لە یادی (٢٧) بیست و حەوت هەمین ساڵیادی تاوانی ئەنفالدا

رێكەوتی 14-4-2015 بیست و حەوت ساڵ بەسەر گەورە تاوانی ئەنفالدا تێپەڕ دەبێت، كە رژێمی ڕوخاوی بەعس لە ساڵی 1988 بە پێشچاوی کۆمەڵگەی نێودەوڵەتی و ئەنجومەنی ئاسایش وڕێکخراوی نەتەوە یەکگرتووەکانەوە بە هەشت قۆناغی سەربازی یەك لە دوای یەك ئەنجامیدا، لەوتاوانەدا بەعسیەکان تەنها گوندەکانی کوردستانیان نە ڕووخاند، بەڵکو کۆمەڵکوژییان کردو دەیان هەزار مرۆڤی سیڤیلیان لە هەموو چین و توێژەكانی  گوندەکانی کوردستاندا گرت و رەوانەی کەمپەکانی کۆکردنەوەو پۆلێنکردنیان کردن و گەنجەکانیان کۆمەڵکوژکردو گرتووخانەکانی دوبزو تکریت و قەڵای نزارکێ وکەمپی سەلامێیان پڕکرد لە ژن ومنداڵ و پیر. سەرئەنجام جگەلە کەمینەیەک لە پیروپەککەوتە ئەوانی تر بێسەروشوێنکران بەهۆیەوە کۆمەڵگەی کوردستانیان بۆ ماوەی چەندین ساڵ لە چاوەروانیەکی کوشندەدا راگرت، هەتا سالی ٢٠٠٣ کە رژێمی بەعس روخا ئەفسوس راستی کوژرانی دەیان هەزار ئینسان لە گۆڕە بە كۆمەڵەكاندا راستی تاوانەکەیان دەرخست .

ئەمساڵ كە بیست و حەوت ساڵ بە سەر یادەوەری تاوانەکەدا تێدەپەڕێت، گۆڤارو ماڵپەری ئەنفالستان جەخت لە پەیامی پێشتری دەکاتەوە و ئەم پەیامە ڕادەگەیەنێتەوە و دوپاتی دەكەینەوە:

• ئەرکی نوێنەرانی کوردە لە بەغدا هەمیشە جەخت لەسەر ئەوە بکاتەوە کە حكومەتی عێراق بە ئەرکی ئەخلاقی و سیاسی و یاسایی خۆی هەستێت و ریز لە هاوڵاتی بوونی کوردو هەیبەت وبڕیاری دادگای باڵای تاوانەكان بگرێت سەبارەت بە دۆسیەی ئەنفال و کیمیاباران و دۆسییەكانی تری جینۆسایدی گەلی كوردستان و نیازپاکی خۆی بە جێبەجێکردنی بریارەکانی دادگا پیشانبدات بەرانبەر بەکوردو دڵنیایی ببەخشێتە هاوڵاتیان وپێکهاتەکانی تری عێراق‌.
• فشار لە سەر دەوڵەتی عێراقی بكرێت وەك میراتگری دەوڵەتی پێشو، کە تاوانی جینۆسایدی دژبەگەلی کورد ئەنجامداوە بە فەرمی ، داوای لێبوردن لە گەلی كوردستان بە گشتی و كەس و كاری قوربانیان بە تایبەتی و حکومەتی عێراق قەرەبووی كەس و كاری قوربانیان و زیانلێكەوتوانی تاوانەكانی جینۆساید بكاتەوە.
• حکومەتی هەرێمی کوردستان و حکومەتی عێراق بڕیاری دەستگیركردن و دادگاییكردنی تۆمەتبارانی ئەنفال كە ناویان لە دوو توێی پەڕاوو بەڵگەنامەكانی دۆسییەی ئەنفال هاتوە، رادەستی دادگا بكرێن و دادگایی بكرێن.
• دەوڵەتی عێراق و حکومەتی هەرێمی کوردستان لە پێناوی شکۆمەندی هاوڵاتی عیراقی و کوردستانیدا زەمینەسازی بکەن و هاوکاری مادی ومەعنەوی پێشکەش بە هەموو ئەو هەوڵانە بکەن کە لەسەر ئاستی ناوخۆو دەرەوە، کاربۆ پرسی ناساندن و بەجیهانی کردنی تاوانەكانی جینۆسایدو ئەنفال دەکەن، ولەناوخۆشدا بەتەنیشت هەولەکانیانەوە مافی مرۆڤ و شکۆی ئینسان بکەنە خاڵی سەرەکی پابەندبوونیان بە گیانی قوربانیەکانی جینۆساید.
• حكومەتی هەرێمی كوردستان، دەستبەرداری ئەو یادە تقلیدی و ڕۆتینیانە بێت کە ساڵانە بۆ تاوانەکان دەیکاتەوە، لە بەرانبەردا بودجە تەرخان بکات بۆ کردنەوەی مۆزەخانەی نەتەوەیی و نیشتمانی و دروستکردنی سەنتەرو ناوەندی لێکۆلینەوەو توێژینەوە تایبەت بە تاوانەکانی جینۆسایدو زانکۆکانی کوردستان پابەند بکرێن بە لیکۆلینەوەو تویژینەوە.
• لەبری ئەو مەراسیمانەی حکومەت وحزبەکان پاوانیان کردووە بۆ قسەکردنی بەرپرسان وکادیرە حزبیەکانیان كۆنفرانسی ساڵانەی ئەنفال، بكاتە ریسایەکی چەسپاو و هەموو ساڵێك لە نێوان مانگەکانی شوبات وەک دەستپێکی پەلامارە سەربازییەکانی ئەنفال هەتا کۆتایی ئاب و سەرتای مانگی ئەیلول ئەنفالی کۆتایی تێدا راگەیەندرا، بەتایبەتیش لە مانگی نیساندا کە ئەنفالی گەرمیانی تێدا ئەنجامدراو زۆرترین کۆمەڵکوژی لێکەوتەوە لەو مانگەدا کۆنگرەو کۆنفرانس بگیرێت و توانای تایبەتمەند لە بواری لێكۆڵینەوەو توێژینەوەی جینۆسایدو رەهەندەكانی لە سەر ئاستی ناوخۆو دەرەوە بنرخێندرێ و پەرەی زیاتریان پێبدرێت‌.
• هوشیاری کۆمەلایەتی هەڵکشێت و ریزگرتن لە مرۆڤ و ژینگەو زیندەوەران ببێتە پابەندییەکی ئەخەلاقی، کۆمەڵگای کوردستان و یادەوەرییەکانی تاوانەکانی جینۆساید ببنە لەمپەری تەواو لە خوێنرێژی یەکتری و کۆتایی بە شەری ناوخۆ بهێنێت.
• یادەکان لە بری ئەوەی ببنە مایەی گەشتوگوزارو سفرە ڕازاندنەوە بۆ بەرپرسان و شاندە بیانی وناوخۆییەکان باشترە و بۆ هەمولایکمان جوانترو روسورانەترە ببنە مایەی دەستگرتنەوەو بنیاتنانەوەو  بەرهەمهێنەرەوەی دەستکەوتی گرنگ و پابەندی ئەخلاقیمان بۆ دروست بکەن و شکۆمەندی مرۆڤ ببێتە خاڵی سەرەکی و ئازاردانی مرۆڤ و زیندەوەران ببێتە شەرمێکی گەورەی کۆمەڵایەتی و بەعەیب تەماشا بکرێن .

 

 

گۆڤارو ماڵپەڕی ئەنفالستان

١٢ی نیسان سالێ ٢٠١٥ سلێمانی

 

سه‌رنجه‌كان

---