بەڵگە ترسناکەکە .. (بریاری ٤٠٠٨ )ی نوسینگەی باکور
دەقی تەواوی بڕیاری س ف 4008:
20 ی حوزێرانی 1987
لە: فەرماندەیی مەكتەبی باكوورەوە .
بۆ: فەرماندەیی فەیلەقی یەك، فەرماندەیی فەیلەقی دوو ، فەرماندەیی فەیلەقی پێنج ([1])
بابەت: مامەڵە كردن لە گەڵ ئەو گوندانەی كە لە بەر هۆكاری ئەمنیی قەدەغە كراون.
لە بەر ڕۆشنایی ئەو ڕاستیەی كە دوا مۆڵەتی ڕەسمیی ڕاگواستنی ئەم گوندانە لە 21 ی حوزێرانی 1987دا كۆتایی دێت بڕیارمان دا ئەم خاڵانەی خوارەوە لە 22 ی حوزێرانی 1987ەوە جێبەجێ بكرێن:
١- هەموو ئەو گوندانەی كە تێكدەران بەكرێگیراوانی ئێران و خیانەتكارانی لەو چەشنەی دەرهەق بە عێراقیان تێدا بێت لەبەر هۆكاری ئەمنی بە قەدەغەكراو دادەنرێن.
- ئەم شوێنانە بە ناوچەی عەمەلیات دادەنرێن‌و بوونی مرۆڤ و ئاژەڵ تیایاندا بە تەواوی قەدەغەیەو هێزە چەكدارەكان بێ هیچ بەربەستێك دەتوانن دەستیان لێبكەنەوە تاوەكو ڕاسپاردەی تریان لە لایەن مەكتەبمانەوە بۆ دێت.
3 – هاتوچۆكردن بۆ ئەم ناوچانە، هەروەها هەرچالاكیەكی ئاژەڵداری‌وكشتوكاڵ‌وپیشەسازی قەدەغە دەبێت‌و بەچاكی لە لایەن دەزگا تایبەتمەندەكانەوە چاودێریی دەكرێت.
4 – فەرماندەیی فەیلەقەكان پەیڕەویی بۆردمانی (عشوائی) كوێرانەی ئەو ناوچانە دەكەن‌و تۆپخانە‌و هەلیكۆپتەر‌و فڕۆكە هەموو كاتێك بە شەو و بە رۆژ بەكاردێنن، بۆ ئەوەی گەورەترین ژمارەی ئەوكەسانە بكوژن كە لە ناوچە قەدەغە كراوەكاندان‌و ئێمەش لە ئەنجامەكانی ئاگادار بكەنەوە. (لێرەدا جەختی لە سەر كراوە).
5 – هەموو ئەو كەسانەی لەو گوندانەدا دەگیرێن دەبێ لە لایەن دەزگا ئەمنیەكانەوە لێكۆڵینەوەیان لە گەڵ بكرێت‌و ئەوانی تەمەنیان لە نێوان 15 ـ 70 ساڵدایە پێویستە ئیعدام بكرێن پاش ئەوەی زانیاریی بەكەڵكیان لێوەردەگیرێت‌و لە كاتی خۆیدا ئاگادار بكرێینەوە (جەختی لە سەر كراوە)
6 – ئەوانەی تەسلیم بە دەسەڵاتە حوكوومی‌و حیزبیەكان دەبنەوە لە لایەن دەزگا تایبەتمەندەكانەوە لێكۆڵینەوەیان لە گەڵدا دەكرێت بۆ ماوەی ئەوپەڕەكەی سێ رۆژ كە دەكرێ درێژ بكرێتەوە بۆ دە رۆژ ئەگەر پێویستی كرد، بە مەرجێ لە هەموو حاڵەتەكان ئاگادرامان بكەنەوە. ئەگەر لێكۆڵینەوەكە پێویستی بە ماوەیەكی زۆرتر بوو پێویستە بە تەلەفۆن یان برووسكە ڕەزامەندیی ئێمە یان هەڤاڵ تاهر توفیق العانی وەربگیرێت.
7- هەموو شتێك كە لە لایەن موستەشارەكان‌و فەوجەكانی بەرگریی نیشتمانییەوە دەستی بەسەردا دەگیرێت بۆ خۆیان دەبێت جگە لە چەكی قورس‌و دابەستراو و مامناوەندی
(49). ئەوان دەتوانن چەكە سووكەكان بۆ خۆیان گلبدەنەوە بە مەرجێ تەنها ئاگاداری ژمارەی ئەو چەكانەمان بكەنەوە. فەرماندەی فەیلەقەكان دەبێ بە خێرایی تەواوی موستەشارەكان‌و فەرماندە هاوكارەكانیان‌و فەرماندەی یەكەكان ئاگاداربكەنەوە‌و زانیاریی تەواومان بدەنێ سەبارەت بە چالاكییان لە نێو فەوجەكانی بەرگریی نیشتمانیدا (لێرەدا جەختی لە سەر كراوە).
بۆ زانیاریتان‌و دەستبەكاربوون لە ناوچەی دەسەڵاتتاندا، ئاگادارمان بكەنەوە.
ئـیمـزا
هەڤاڵ
علی حسن المجید
ئەندامی سەركردایەتیی هەرێمایەتی
سكرتێری گشتیی مەكتەبی باكوور
[1] ئەمە كۆپی ڕاسپاردەی س ف 4008 كەوا نوسینگەی رێكخستنی باكوری حزبی بەعس ئاڕاستەی هەردوو فەیلەقی یەك‌وپێنج‌و دەزگا جۆرا‌وجۆرەكانی ئەمن‌و موخابیەرات كراوەو میدڵ ئیست وۆچ لە ناو فایلەكانی حوكوومەتی عێراقدا بەدەستیهێناوە‌و دواتر لەراپۆرتەكەی خۆیدا بڵاوی كردووەتەوە.
