نامەیەک بۆ باوکم
نامەیەك بۆ باوكم
ڕێبوار ڕەمەزان بارزانی
باوكە…كە
لە دایكبووم یەكەم سات، هەستت بە چی كرد؟ ئایا گریانی من تۆی گریاند یاخۆد گرنژینی خستە سەر لێوانت؟باوكە من باسی مناڵی خۆمت بۆ ئەكەم، خۆزگە تۆش باسی بەر لە دایكبوونی منت ئەكرد، یاخود چركە ساتی لە دایكبوونم، بە هەر حاڵ باوكە تۆ هەر بێ دەنگی، من بۆت ئەگێڕمەوە باوكە دایكم ئەیووت، كە تۆ دەستگیركرای هاوینێكی گەرم بوو 31-7 – 1983 ڕۆژێكی جودا لە ڕۆژەكانی تر، دایكم وتی سەربازەكان زۆر بێ شەرمانە خۆیان بە ماڵەكاندا كرد و ماڵ بە ماڵ گەڕان، هەرچی ڕەگەزی نێرینە هەبوون دەستگیر كران، شێت و كەم ئەقڵ و كەم ئەندام و نەخۆش هەموویان لە گەڵ ئێوە بەرەو چارەنوسێكی نادیار
باوكە، دایكم وتی: تۆ گۆرەویت لە پێ ئەكردو ئەچویتە كۆرسێكی خوێندنی هاوینە، بە یەك تاكە گۆرەوی تۆ ڕۆیشتی، باوكە تخوا ئەم نهێنیەمان بۆ بڵێ ئەتویست چی بڵێی، كە دەستگیركرای چونكە دایكم وتی دووجار دەمی كردەوە كە شتێك بڵێ بەڵام سەربازەكان راپێچیان كردو دەرفەتیان نەدا، بوەتە گریەك تا ئەمڕۆش بە دەستیەوە ئەناڵێم ئایا دوا وتەت چی ئەبوو، ئەتویست چی بڵێی ؟ بۆ هاوارت نەكرد و بۆ؟!! بۆ!! باوكە
ڕۆژانە ئەم پرسیارە ئەكەم كە ئەتویست چی بڵێی؟
باوكە تۆ ڕۆیشتی نەگەڕایتەوە بەڵام من و خوشكەكانم و دایكە ماندووەكەم، دووچاری سەدان دەردە سەری بوین، دایكم ئەیوت : كارەبامان لێ بڕا و سەرچاوە ئاوەكانیان نەهێشت و بۆڕیەكانیان شكاند لەو ئۆردووگایە زورەملییەدا هەرچی خزمەتگوزاری بوو نەیان هێشت، دایكم ئەیوت: بە نهێنی ئەچووم شیرم بۆ دەكری، هەندێك جاریش شەكرم ئەكردە ناو ئاوی گەرمەوە و دەم دا بە تۆ، بەڵێ باوكە من بە شیری قوتو و قەندئاو گەورە كراوم، دایكم ئەیوت ئەوەی هەبوو لە پارە و سامان هەموومان خەرج كرد هەر بەشی دوو مانگی كرد، دواتر ناچار بەدوای كاردا بگەڕێین ئەویش بە نهێنی، باوكە ئێستا دایكم دووچاری چەندین نەخۆشی بووتەوە بە هۆی كاركردنیەوە.
دایكم ئەیوت كاری بیناسازی و چەمەنتۆ و كاری قورسم ئەنجام ئەدا كاری شینانی و هەر كاریك كە حورمەتی تێدا بوایە گرنك نەبوو كارەكە قورس بێت و لە توانای ئەودا نەبێت ئەنجامی دا.
باوكە قوتابخانەكان داخران، ژن و كچ و مناڵە بچوكەكان مافی خوێندنیان نەبوو، ئەمڕۆ سەدان مناڵی وەك من نەیانتوانی بخوێنن، ئێستا بە دەست نەخوێندەوارییەوە ئەناڵێنن.
باوكە دایكم ئەیوت: كەل و پەلی ناوماڵمان فڕۆشت هەرچی هەبوو تەنانەت تەلەفزیۆنە ڕەش و سپیەكەش. جگە لەوەش دایكم ئەیوت: پاسەوانیمان لە خۆ ئەكرد چەند ئافرەتێك لە خانوویەكدا ئەژیان لە گەڵ مناڵەكان، ڕۆژانەش ئەچوونە كاركردن دەرگایان لە سەر ئێمە دا ئەخست لە پەنجەرەكەوە سەیری تیشكی خۆرمان ئەكرد باوكە، من ئەوكات تەنیا هەستم بە هیچ نەدەكرد و وام ئەزانی ژیان وایە بریتی یە، لە كاركردنی ئافرەتان و داخستی دەرگا بە سەر ئێمەی مناڵ .
دایكم شەو خواردنی ئەكرد بۆ نیوەڕۆ چونكە خوشكەكانیشم بچوك بوون، نەیان ئەزانی خواردن لێ نێن.
باوكە دایكم كە ئێوارن ئەگەڕایەوە وامان هەست ئەكرد هەموو ژیان هی ئیمەیە زور زور زور خۆش بوو باوكە!!!.
چونكە هەندێك جار چوكلێتێك یاخود نوقڵ و بیسكویتێكی بو ئەهێناین بەشمان ئەكرد لە گەڵ خوشكەكانم و ئەمان خوارد.
ڕێبوار ڕەمەزان بارزانی
بارزان
٢٢-٥-٢٠١٤
