ڕۆژی ١٠ی نیسان یادی ئەنفالکردنی گوندی قەشقەیە
رۆژی ١٠ی نیسان یادی ئەنفالکراوانی گوندی قەشقەیە
ئەنفالستان – سلێمانی : گەنجان و گوندنشینانی گوندی قەشەقەی سەربە نا‌حێی قادر کەرەم لەسەر ئەرکی خۆیان و بەکۆمەکی دەستەجەمعی ڕۆژی ١٠ی نیسان کاتژمیر ٢ی پاشنیوەرۆ یادی ئەنفالکراوانی گوندەکەیان دەکەنەوە . سیروان کویخا ئەندامی لیژنەی ئامادەکاری مەراسیمەکە بە ئەنفالستانی ڕاگەیاند کە لەو رۆژەدا یادی ئەنفالکراوانی گوندەکەمان دەکەینەوە، وتیشی یادەکە بە بودجەی هیچ لایەنێکی حزبی و حکومی نیەو لەسەرئەرکی خەڵکی گوندەکەیەو خۆمان بەپێی توانا پارەمان کۆکردوەتەوەو مەرسیمەکە لەسەرئەرکی خۆمان بەڕیوە دەبەین .. ئاماژەی بەوەش کرد کە لەو مەراسیمەدا چەند خەڵاتێکی رێزلێنانمان بۆ چەند کەسێک داناوە کە لە ناساندن و بردنە پێشەوەی دۆسێی ئەنفالدا ڕۆڵیان بینیوە .
گوندی قەشقە لە ڕێکەوتی ١٠ی نیسانی ساڵی ١٩٨٨ کەوتە بەرپەلاماری ئەنفال و خەڵکەکەی روبەڕوی دەربەدەری و گیران و ئەنفالکردن بوونەوەو سەرئەنجام ٩٩ کەسی ئەو گوندە گیران وبێسەروشوێنکران . چیرۆکی یەکێک لەو گەنجانە ئازایەتی سەلام قەشقەییە لە کۆمەڵکوژی بیابانی ڕومادی کە بەرلەوەی لە پاسەکە دایانبگرن و گوللەبارانیان بکەن پەلاماری جەلادێکی دابوو بەلام جەلادێک لێی هاتبووە دەست وهەر لەناو پاسەکە شەهیدی کردبوو، بەڵام ئەم روبەروو بوونەوەیە بێ ئەنجام نەبوو بەڵکو بەهۆیەوە ٤ کەس لە هاوڕێکانی لە کۆمەڵکوژی رزگاریان بوو بەناوەکانی ( عوزیر، رەمەزان، ئەنوەر تەیار، واحید) .
فۆتۆ : ئەنفالستان مەراسیمی ساڵی رابوردووی گوندی قەشقە .
