پارەم داوەتە موستەشار‌وخەڵكم رزگار كردووە، بێژم چەند.. هەرچی تیرە هەیە لەم كەلارە من لێم رزگار كردووە
حەمە سور ڕۆغزایی :
پارەم داوەتە موستەشار‌وخەڵكم رزگار كردووە، بێژم چەند.. هەرچی تیرە هەیە لەم كەلارە من لێم رزگار كردووە
دیمانە : عومەرمحەمەد.
هاوکار: پشکۆ محەمەد ڕۆستەم
شوین : کەلاری کۆن- ماڵی دیمانە لەگەڵ کراو .
کات : ١١ی پێشنیوەرۆ .
رێکەوتی ٨ی شوباتی ساڵی ٢٠٠٧
محەمەد حوسێن حەسەن ناسراوە بە حەمەسوری رۆغزایی پیاوێکی هەژاری گەرمیانی بوو، خەڵکی گوندی ناوەو سەرناوەو گەڵاڵ کەوەیەو لە کۆتایی حەفتاکانەوە هاتووەتە کەلارو هەر لەکەلاری کۆن دەژیا، لە سەروەختی ئەنفالدا ڕۆڵێکی یەکجار قارەمانانەی دیبوو، بەو هەژارییەی خۆیەوە مێژوویەکی جوانی بۆخۆی تۆمارکردووە، گەلێک کەسی لە چنگی چەتەو پیاوانی رژێم رزگار کردبوو، تەنانەت پارەی وەکو بەرتیل دابووە جاشەکان بۆ ئەوەی ڕێگەی پێبدەن بچێت بەدەم خەڵکەوە. ئێمە بەهاوکاری کاک پشکۆ محەمەد ڕۆستەم چوینە ماڵەکەی و بۆ ژمارە چواری ئەنفالستان دیدارێکمان لەگەڵدا سازکردوو، بڵاومان کردەوە، وەلێ لەوەشدا بەختی نەبوو، بەهۆی هەڵەیەکەوە دەقی ئەو دیدارە بڵاونەکرایەوە کە پاکنوسکرابوو.
ڕۆژی ١٣ی نیسانی ساڵی ٢٠١٤ وەک ڕێزلێنانێک بۆ شێخ حوسێنی هەزارکانی بەرێوەبەرایەتی سەنتەرە رۆشنبیرییەکانی گەرمیان جگەلەوەی پەیکەرێکیان بۆ شێخ حوسێن دروستکردبوو، خەڵاتی شێخ حوسێنی هەزارکانیشیان بەخشیە چەند کەسایەتیەک، خۆشبەختانە یەکێک لەوکەسانە حەمەسور بوو، یەکێکیشیان من بووم ئەوەش بۆمن شەرەفێکی گەورە بوو، بەلام ئەفسوس لەوەشدا هەر بەختی نەبوو چونکە ئەوکاتە (حەمەسوری پیاوی ڕۆژی تەنگانە) نەخۆش بوو، نەیتوانیبووبێت بۆ وەرگرتنی خەڵاتەکەی بەڵکو کوڕەکەی هاتبوو.
ئەفسوس حەمەسور لە ڕۆژی ١٦ ئازاری ساڵی ٢٠١٥ رێک لە ساڵیادی کیمیابارانکردنی شاری هەڵەبجەدا کۆچی دوایی کردو بەیەکجاریی دنیایی نادادپەروەری وبێوەفایی کۆمەڵگای مرۆڤایەتی بەجێهێشت .
دەمەو نیوەرۆیەكی درەنگ هەر لە كەلار كۆن لەدەرگای ماڵی (حەمە سور)ماندا سەرەتا كە باسی ئەو پیاوەیان بۆ دەكردم‌و دەیانگووت حەمە سور پیاوێكی جەربەزە بووە لە كاتی ئەنفالدا، هەرلەلای خۆمەوە شیوازێكی باڵاو روخساریم وێناكردبوو، بەڵام كە رووبەروو بینیم ئەو پیاوێكی تر بوو، ئەوەی من بۆ ئەوم وێنا كردبوو پیاوێكی باڵا بەرزی گۆشتن‌ورومەت پانی سوروسپی بوو، بەڵام لە راستیدا سەرلەبەری بۆچوونەكەم هەڵە بوو، ئەو جگەلە پیاوێكی سوركاری باڵابەرزی ڕەقەڵەی بەرێز‌و بەخوڵق‌و خۆ شتێكی تر نەبوو، هەركە لە دەرگای حەوشەوە چاوی پیمان كەوت ئەو فریای ئەوە نەكەوت پیڵاووەكانی بكاتە سەرپێ، بەلكو هەربەپێی پەتی بۆ پێشوازیماندەرپەری‌و بەخولق‌و خۆیەكی گەرمەوە فەرمووی كردین، من هەموو جاری كە ئەم خولق‌و خۆگەرمیانیانە دەبینم ئەسالەتی ئینسان لە بەردەمم ئامادە دەبێتەوەو قەسد دەكەم هەتا مردن هەرلەناو ئەم مرۆڤ گەلەدا بژیم، چونكە دەمێكە چوونە پێشەوەی بازارو داب‌و نەریتی شارماڵئاوای لەم خۆلق‌و خۆیە كردووە.
ئیدی بەدەم فەرموو فەرمووەوە چوینە ژورە ساردو سڕەكەیەوە ئەوەی بینیم مالێكی بێكەیبانوو پیرەمێردێكی تەنیا دوای ئەوەی پرسیارم كرد وتی برا من ژنم بوو خوا عافویكا مرد، ژنێترم هەیەو هالەتەكما مناڵەكانمیش هان لەتەكیاو هاوسێ ماڵین، ئەمما لەتەك مناڵا ناگونجیم‌و وەك دەبینی ئیستا خۆم هام وەتەنیا ئەیگوزەرێنم، بەڵام مام حەمە سوور بەو تەمەنەشەوە كەنزیكی 60 ساڵێك دەبێت، هێشتا پیاوێكی بە گور‌و چالاك دیارە‌و وەكو خۆی دەڵێت هەتا ئیستا بۆ نەخۆشی نە چووتە دیدەنی دكتۆر.
هەرچەندە ئیمە پەلەمان بوو بەڵام ئەو لەبەر بەخێرهاتن‌و خولقوخۆی گەرمیانیانەی خۆی بواری نەدەدایە ئێمە نیازی چوونە كەمانی بۆ ئاشكرابكەین‌و لەدەرگای باسەكەمان بدەین، جارێك رای دەكرد ئاوی دەهێناو جارێك پەلاماری كتلی‌و قۆری دەداو نەدەسرەوت، بۆیە لە دەرفەتێكدا توانیمان لەنیوان دوو كەوانەدا بلێین: مامە حەمە ئێمە ماوەمان ئەوەندە نیە تۆ عەزییەت بدەین، بۆیە هاتوین دەمانەوێت لە بارەی ئەنفالەوە كەمێك قسەمان بۆ بكەیت‌و دەرۆین، بەڵام ئەو زوو لێمان هاتەدەست‌و ووتی یاخوا وەخێربێن بەڵام بەوخوا چایەك نەخۆن قسەتان بۆ ناكەم، بەو حاڵە مامە حەمە بەدەم چا لێنان‌و دواتر چا تێكردنەوە باسی سەروەختی ئەنفال‌و هەموو ئەو رەفتارە دزێوانەی جاش‌و ئەو زوڵم‌و زۆرانەی بۆ دەگیراینەوە كە لە پەلامارەكانی ئەنفالدا بینیوویتی، دوای ئەوەی سەروو چای بۆ تێكردین ئینجا ووتی دەیفەرمون چیم عەرزەكەن من هام لە خزمەتتانا. ئیمەش بەدەم چاخواردنەوە كەوتینە پرسیاركردن لێی :
بیستوومە لە ئەنفالەكەدا ئەو ساتەوەختەی ئەو گوندانە كەوتبوونە تەنگانەوە تۆ نەپێشمەرگەبوویت نەجاش، كەچی هەولێكی زۆرت داوە بۆ رزگاركردنی ئەو خەڵكەو خەڵكیكی زۆریش لەسایەی هیمەتی مەردانەی تۆوە رزگاریان بووە؟
جابرا مادام من لەخزمەتی ئەماندا باسم كردووە فەرقی چیە هەر ئەوەم كردووەكە ئەیزانن.
ئاخر من پیێم خۆشە لە دەمی خۆتەوە بیبیستم.
وەڵا قوربانت بم، شوکور قسورمان نەكردووە نەك هەر لەیەل قەومی خۆماندا بگرە لە قەومی رۆغزایی لە كەمالەیی باشتیر، پیرەكان لە هەمووی، قەسەم بەو خوا ها وەبان سەرمانەوە‌و خالقی هەموو شتێكە وەگوێرەی توانا قسورم نەكردە، وەڵاهی لە ماڵی خۆم‌و لە باخەلی خۆم پارەم داوە بە موستەشارەکان ووتوومە قەومێكم ها لەو دەشت‌و جەوەڵە لێی قەومیا چیت گەرەكە من بۆتی جێبەجێ بكەم، بامنیش ئەو قەومە بێنمە خوارەوەو وەهانایان بچم، بەخوا وە شەوو ڕۆژ من هەر لەیەلایاندا مەشغوڵ بووم.
ئینجا موستەشارەکان بەقسەیان دەكردیت؟ جاشەكان پارەكەیان لیوەردەگرتیت؟
ئا ئەرێوەڵا پارەكەیان وەرئەگرت‌و ئەیانووت باشە بڕۆ بیانهێنەرەوە، بەڵام وەبێ پارە نەیان ئەهێشت.
بیرتە چەندێكت ئەدانێ ؟
وەڵاهی بم وەقوربانت، ئامیر سرییەك بوو قەوم گەڵالی بوو، قەوم خۆم بوو، لەم بانی كەلاركۆنەوە بوو، دوو زەلام هاتن لەیەلما كوری (حاجی ئەول كەریم فارس‌و عومەری غەفور)، ئیوارە چوومە لایان ووتیان كاكە ماڵە كەمان دەركردووە، ها لەبنەبەراز وەكو برایەك باش تۆش شارەزای مەملەكەتەكەیت‌و بەشكو لەیەلاماندا بێت بەڵكو ئەو ماڵەمان لەیەلا- لەگەڵدا دەركەیت، شەو سواری 3 ووڵاخی بەرزە بووین‌و رۆیشتین، شەو چوومە لای ئامیر سریەكە.
ناوی چی بوو ئامر سریەکە ؟
عەلی کلای ناوە جاشی مامەیسا[1]و ئەو قەومانە بوو، وەڵا قوربانوووم فرەمان ووت‌و كەمممان ووت، (عەلا كولین) بەهەر حاڵ ووتم كاكە گیان چیشتان گەرەكە ئێوە من بناسن ئیسەكە با بچم ماڵی ئەو دوو زەلامە بێنمە خوارەوە، ئەویش رازی بوو وە 300دینار ئەوكاتە، (مەبەستی دیناری سویسرییە) سەرت نەیەشێنم من رۆیشتم ئێوارە مەغریب سواربووین‌و رۆیشتین ئەمما جاشەكە ووتی ئەبێ سبەی ئێوارە ئەم وەختە هاتبنەوە، ئیمەش چووینە بنەبەراز تۆ رەنگبێكم نەزانی كۆییە؟
نەخێر نازانم چییە لە کوێیە ؟ بنەبەراز ناوی جەوەڵە، چیایە یان گوندە ؟
نانا ئاواییە (گوندە) ها لەو بانە لای سەرقەڵاو تیلەکۆوە بۆی دەڕۆی .
بەڵێ ئیتر لەکاتی خۆیدا هاتنەوە ؟
وا قسەت بۆ دەکەم ، كاتێك چووین، مالی ئەم (فارسی حاجی كەریمە). لە مەسۆیی هاوردوویانن هەر لیرێژایاون،
بەس چی دەمانچەكەیی‌و تفەنگەكەیی‌و برێ قالیچەو ئەمانە هاوردمان قوربانووبم ئێوارە مەغریب سێ چوار وڵاخیشی هاوردبوو بۆ ئەم گۆبانە هات ووتی: كا حەمە مەردی خوابە بزانین ئەم دوسێ ووڵاخیشە نابەینەوە، ووتم وەبان چاو هاوردمان گەینە ئەم كەنە قوڵێ هەرلە خۆمەوە دڵم گۆریا، لەوێ ووتم ئێوە هاربن ؟ ( سەربازی هەڵاتوو)؟ وتیان بەڵێ وتم ئەترسم ئەم ئامیر سریە لەیەلمان راست نەكا، ووتیان ئەی چارە چی بكەین ؟ ووتم كاكە با ئەم (سیلاح) تفەنگانە نەبەین‌و لەم ناوە بیشارینەوە، هەتا ئەوەنەی لێی حالی ئەوین، وەلحاصل وە گوێیانكردم، تفەنگەكانمان شاردەوەو هاتین، بەس پێم ووتن براكەم مادام ئێوە متمانەتان ها وەمن با من بەرلە ئێوە برۆم بچمە لای رەبایەكەو بێمەوە ئەگەر زانیم وەزعەكە هاوەدڵمان یان ئەگەرهاتمەوە ئەوە هاتمەوەو دێم وەدواتانا، خۆ ئەگەر نەهاتمەوە ئەوە مانای وایە ئەوە دنیا خەراپە و ئەگیرین. تومەس ئەوانیش كەمینیان دەركردیە گوییان ها لەم قسەی منە، كە بۆ ئەوانی ئەكەم هەر ئەوەنەمان زانی بووە خرمە خرمی میل راکێشانی كڵاشینكۆف، هەنە رۆن سەگبابینە، هەبیانگرن، بووە هەرایەک هەرمەپرسە، وەڵا گەریامەوە تەماشا ئەكەم هەردوو هاورێكەمیان گرتووە، دەم‌ولوتیان هەڵپێچاوون، ووتم براكەم پیاوبن ئێوە هەر قەوم خۆمانن خۆمن هاتمە لاتان بۆ خۆتان ئەگۆرن؟ وەلحاصڵ نەیان سەلماندوو وتیان ئێوە لەناو پێشمەرگەوە تێن، هەرچیمانكرد كورە پیاوی چاكبن فایدەی نەوو، ووتم كاكە گیان هەرئەوەندە یارمەتیمان بدەن خۆ بگیریێن ئێوە چ سوودێك ئەكەن من دەبێ ئەم زەلامانە بدەمەوە مالی خاوەنیان، وەڵا بەیانی هاتین ووتیان كوا پارەكە ووتم پارە؟ ووتیان ئا؟ بە گیانەكەی ئێوە چونكە شەو ئاواتان لێكردین‌و خاوەن وەعد خۆتان نەبوون ئیسە ئەرۆم هەتا لای ئامیر لیوا ناوێستم ئەلێم ئەم فرسانانە(جاش) هەموو شەوو ڕۆژێ زەخت ئەكەن لەمن( ئەو درۆمە كردیە لەدنیا چونكە درۆ عەیبە زۆر عەیبە) پارەو نانم ئەدەنی بچم بۆ ناوپێشمەرگە مادامێ ئێوە ئەوەنە ناپیاووبوون لەیەل ئێمەیا، وتم ئیتر چارەسەری خۆتان بكەن وەڵا زەلامێكیان ناردە لام ووتی كابرا هاتووە ئەلێ ئامان بیكە لەراهی خوا ئەو پیاوە خاتری هەیە لای تۆ هەرچییەكی ئەوێ بۆی ئەكەین بابە ئێمە پارە ئەدەینە ئەو با تووشی بەڵایەكمان نەكات. بەس وازمان لێبینن.
كابرا كێ بوو ئەوەی زەلامی ناردە لات؟
كورە ئامیر سریە درۆزنەكە. وەلحاصل خۆی هات خۆی كردە ئەم كەلاوە بچوكەوە كە ئیسە تیا دانیشتووین، ووتی دەخیلت بم ملاحەزەمان بكە ئەوانە بیعەقل بوون‌و وازبێنە با تووشی شتێك نەبین، ووتم ئاخر ئێوە لای خۆی كوردن ئەمە ئەكەن ئەی پیاوەتیەكەتان ها لەكوێ؟ وەڵا براكەم وتم برۆن حەواڵە بەوخوا ئیتر پارەكەیان بۆ هاوردمەوە.
بۆ ئەوكاتە پارەكەی لێسەندبوویت یان هەر رێككەوتبوون لەسەری؟
كورە ئائا لێی سەندم ئەی چۆن؟ دوایش زۆر زۆر مەمنونی ئێوە بوو بۆی هاوردمەوە. كورە نەك هەر ئەوە زۆری تریش هەروا بوون.
باشە تۆ چەند كەست بەو حالە رزگار كردووە؟
وەڵاهی بیژم چەند ؟ (بەپێکەنینەوە )هەرچی تیرە هەیە لەم كەلارە من لێم رزگار كردووە. ئەرێ خوا ئاگادارە هەر بۆ خوا تۆ دینارێكت لە خەلك سەندە من وەرم نەگرتووە. بە خوا ڕۆژێكتر چووم بۆ منالی براو كەسی خۆم جا گەرمیان شەو بەهاری خۆشە كە ئەگەریامەوە خەوم هات، شەوارەم كرد روومكردە صمود([2]) ئەوەنەم زانی دنیام لێگۆریاوە هەر ئەوەنەم ما بوو بچمە ناو رەبایەكەوە.
رەبایەكە هی چی بوو؟ جاش بوون یان سەرباز ؟
هی عەسكەریەكە بوو. ئیتر برا سەرتان نەیەشێنم قوربانتان بم ( ئەرێ شیرین ئەخۆن یان دیشلەمە) هەلسیام ئەمە تەنیا قەومێكمان هەیە لەگامەخەڵ كوری حاجی حەمە قایری حەمە حەسەن دەمانچەیەك چواردە خۆر‌و(وەستا تا چایەكەی دایە دەستمان) وەللە هاتم تا نزیك رەبایەی جاشە كان ئاگام لێیان بوو ئەوانیش خۆیانكردە ناو رەبایەكەیا تا بێژن ئاگامان لێی نیە، ئەمما پێشتر لەیەلیانا رێك كەوتبووم، ئەو پیاوەتییەیان بوو رەبایەكی تر بوو جیهازیكردبوو ووتبووی ئەو سوارە با نەروات هەتا ئێمە تێین ئەیگرین، منیش ئاگرم ئاگرە دەمانچەیەكم هاپێی نەفرسانم نەهیچ، وەڵا هەتا ئەوان گەینە من دەمانچەكە شاردەوە، ئیتر دوایی نەجاش زانی‌و نەئەسكەرییەكە بەخوا برێ پارەی زۆریشم پێبوو، ئەویشم فریای جاشێك خست‌و ووتم دوایی بمدەرەوە ئەمە هێشتا ئەسكەرەكان نەگەیشتبوونە لامان، نازانم زابت بوو چی بوو ووتی لە كوێوە دێی ووتم وەڵا خزم‌و كەس‌و كارم لەم جەوەلەن ووتم با بچم بیانهێنمەوە تەسلیم حكومەتیان بكەمەوە، ئەمما دەستم نەكەوتوون‌و ئەوا منیش هاتوومەتەوە، ئەوە ئێسە لەوێوە تێم، ووتی خەلكی كوێت ووتم خەلكی كوێیت ووتم خەلك كەلارم، ووتی جیب هویتك دەستم كرد وەگیرفانما جنسیەكەم دەرهاورد خواكردی وەرقەی كارەباكەش لەیەل جنسیەكەیا هاتە دەرەوە ووتی ئەو وەرقەیە چیە؟ تەماشایەكی كردوو كە زانی راست دەكەم بەو وەرقەی كارەبایەیا زانی ووتی راست دەكەیت، وەرقەكە لە جنسیەكە باشتر بۆم، ووتی بیبەن بۆ لیواكە بەڵام هەرلەوێ مەرێكم كرد بە خێر، ئیتر ئەوان رۆیشتن‌و منیش گەرامەوە دەمانچەكە هەڵگرتەوە بەڵام نەمهێشت جاشەكان بزانن چونكە ووتم ئەمانە قەوم خۆیان ئەفرۆشن، خزم خۆم بوو ئەمناسین ئەمانە چین‌و چی نین؟ ئیتر چوومەوە بۆلای جاشەكان ووتم ئامانەتێكم داوەتە ئەو فرسانە وەری دەگرمەوە، خوا هەڵناگرێ یەكدیناریان لێدەرنەكردبوو پارەكەیان دامەوە، كورە ئەمەنەم كردیە ئەوەنەم بەسەرهات دییە مەگەر خوا بزانێت!!
ئێمە دەزانین كە تۆ خەڵكت زۆر رزگار كردووە، دەتوانی ئەو شوێنانەمان پێ بڵێیت كە تۆ خەڵكت لێ رزگار كردووە؟
قوربان بووم رازیانە ، زەینەڵ قولیجان، سویبەی خان، وارگەرەقە، گامە خەڵ، گڵاڵ كۆ، خەلوەت ژاڵان، ئیتر ئەم دیێیانە هەركوێ دەستم گەیشتبێتی خەڵکم لێ رزگار كردووە، ئیتر لە (تەرخانی، رۆغزایی)[3]، گوێم نەداوەتێ بێژم ئەمە قەوم خۆم نیە، ئەمەكێ‌‌و كێ نیە؟ هەموویم وەكو منداڵەكەی خۆم سەیر كردە،
– مامە حەمە دەزانی چەند كەست رزگار كردووە؟
+ بەخوا من یژم هەزار تۆ بێژە دوو، وەبان.
-ئەوانەی رزگارت كردوون ئیستا كەسێك دێتەوە بۆلات سەرت لێبداتەوە‌و لەحاڵ‌و ئەحواڵت بپرسێ؟
+ وەڵا هەیە سەرم لێ ئەیاو هەیشە هەر ئەو دەقەیە بوو نەمدیووەتەوە.
-ئەو كەسانە دەیانزانی كەوا تۆ لە گیرفان خۆت پارەیان بۆدەدەیت‌و لە خەڵك بۆیان دەپاڕێیتەوە یان نا؟
+ ئارێ وەڵا ئەیانزانی .
ئەی خۆت خەڵك كام گوندیت؟
+ وەك خۆم خەڵك دێی كڵاوگۆی ناو رۆغزایم .
– یانی تۆش رۆغزایت؟
+ بەڵێ ئەرێوەڵا منیش رۆغزایم.
بەڵام خۆ ئێوەش جاشتان بوو؟
+ ئەرێوەڵا بوومان دورلە رووی حازری (بە پێكەنینەوە) سەگبابمان بوو.
ئەم قسەیە بڵاو بكەینەوە ؟
ئەرێوەڵا خۆ ئەزانم ئەیخەیتە ئیزگەوە تەلەفزیونەوە ئەرێوەڵا بڵاوی بكەرەوە، شەرم لە باوكم ناكەم. هەرچی نارێكی بووە قبولی ناكەم.
مامە حەمە لەسەروەختی ئەنفالەكەدا پیاو چاكی وەكو تۆ كەم بووە، لەمەدا تۆ رووسوریت، بەڵام دوای ئەوەی ئەو خەڵكە ئەو حەشاماتە سەرنگوم كرا، هەمووی فەوتا‌و بێسەرو شوێنكرا؟ ئیستا تۆ هەست بەچی دەكەیت؟
وەڵا من چەنێ ؟ من خۆم قەیاد لە خۆم ئەكەم، چەنێ صدام حوسێن وە موجریم ئەزانم ئەوەنەیشە كورد خۆمان وە تاوانبار‌و موجرم ئەزانم، وەكو حەق نیوەی میللەتی كورد وە مجرم ئەزانم لەو تاوانەی ئەنفالەیا ؟
بۆچی ؟
قوربانووم، ئەزانی بۆ؟ من لەیەل ڕاوەتانجی‌و ئەو شتانەیا تۆزێ خولقەتم زۆرە، چوومەتە ئەو جەوەڵە ئەمبەرو ئەوبەری رەبایەی ئەسكەری بووە، راوم كردە، تانجیەكانمان بەرداوە، چونكە كوردی لەیەلا نەبوو دەرەقەتمان نە ئەهاتن، بمانگرن بە خوا كوردە خۆفرۆشەكەیان لە تەكابوایە هەربۆ خۆشی سەللەیەكیان پێوەئەناین ئاوایان دەكرد.
ئەو سەروەختە تۆ كە خەریك خەڵك رزگاركردن بوویت جاشەكانت ئەبینی تاڵانی بكەن؟
ئەی بێقەزا بیت؟ هەرتاڵانی ، هەر نەفس نزمی ، بە خوا وەڕان بە باری شەڵت كورە وەكۆڵ، وە تراكتۆر، ماڵ‌و حاڵی ئەو خەڵكە داماوەیان ئەهاورد، بەخوا برا هەرلەم كەلار كۆنەوە هەبوو ئەرۆیشتن ئەو كاتەی خەڵك شتی شاردبووەوە، چالە گەنم، نەووت ئەو جاشانە ئەرۆیشتن ئەیان دزی‌و ئەیانهاوردەوە بۆخۆیان.
ئەی مامە حەمە قەد پێیانت نەئەوت عەیب ناكەن داناوەشێن؟
جا برا ئەیانبیست ؟ گالتەیان پێئەكردین، كورە ئەو كاتە سوڵتەیان بوو، ئەما بۆ خەڵكی فەقیر، ئەینا دەسەڵات ئەسكەرێكیان نەبوو.
مامە یە ك پرسیاری بچوكم ماوە؟
گیانەكەی مامە قسەكەت لەدەما بەشەكربێت چایەك تر نا خۆی؟
نا زۆر مەمنون‌و دەستەكانت خۆش بێت. ویستم بلێم ئەمەی تۆ كردووتە كارێ گەورەیە چۆن واهاتیتە سەرئەوەی ئەم واجبە گەورەیە بگریتە ئەستۆی خۆت؟
قەسەم بە زاتەكەی خوا كەوا ئیستا لەوبان سەرە ئاگادار ئەم قسانەیە، یەك دینارم لە خەڵك نەسەندووە ، قەوم خۆم بوبێت یان غەیرە لەم گیرفان خۆمە پارەم داوەتە جاش‌و (سەیەل)[4] بۆ ئەوەی خەڵك رزگار بكەم، لە هەموو تیرەكان ڕزگارم کردووە.
ئەوسا پارەت بوو؟
بە خوا بووم بەڵام پارەی ئەو ڕۆژە وەك ئەمرۆكە نەوو، كەم بوو ئەمما برا قیمەتی بوو.
زۆر ماندوومان كردیت. سوپاس بۆ ئەم دەرفەتە .
كورە بموە قوربانتان، بەس توو خوا نیوەرۆ لای من بن دەی برا نانیك ئاوێكم لەیەلا ناخۆن؟
ماڵت ئاوابێت کاتمان بەدەستەوە نیەو دەبێت بڕۆین .
دەی من هام لەخزمەتتاندا چی تر بێژن بچوکیتان دەکەم .
تۆ گەورەیت دوبارە سوپاس بەلام قایلیت ئەم دیدارەت بڵاو ببێتەوە ؟
ئەی بێقەزابیت من لەکەیەکەوە بۆچی قسەتان بۆ دەکەم ؟ ئەریوەلا بێدەن وەئێستگەو بابلآوبێتەوە .
[1] مامەیسا (مەبەستی لە حەمەی عیسا)یە مامەیسا واتا مامە عیسا . حەمەی عیسا فەرماندەی فەوجی جاشی خەفیفەی ژمارە ١٠٠ بوو عەلی کلای فەرماندەی سریە بوو لەو فەوجە .
[2] لە دەشتی گەرمیان بە هۆی گلۆپە دورەكانەوە پیادە بە شەوارە دەكەوێت‌و رێی لێتێك دەچێت، بۆیە زۆر جار ریبوارانی شەو بە ئاراستەی پێچەوانەدا رێگە دەبرن) .
[3] تەرخانی و ڕۆغزایی دوو هۆزی سەربەعەشیرەتی جافن بەزۆری لەگەرمیان دەژین . حەمەسور خۆشی سەربە هۆزی ڕۆغزایی جافە .
[4] سەیەل مەبەستی سەگەلە یان گەلە سەگ.
