نەوال سەعداوی لەهەڵەبجە
نەوال سەعداوی لەهەڵەبجە
عومەر محەمەد
٢٦/١١/٢٠١٤ سلێمانی
هیچ پاساوێک نەبوو نەوال سەعداوی لە مۆنۆمێنتی هەڵەبجە بە لوغزو لاستیکی قسە لەبارەی تاوانی گازبارانی شارەکەوە بکات. من بۆخۆم هەمیشە رێزم لە
خەبات وتێکۆشانی ئەوژنە گرتووەو ئێستاش بەرێزەوە تەماشای دەکەم، بەڵام زۆر زیاترم لێ چاوڕوان دەکرد، بەلای کەمەوە دەبوو ڕونتردەست بۆ تاوانکار ڕاکێشێت، مێژووی عەرەب و ئیسلام پریەتی لە توندوتیژی و خوێنڕشتن .. سەعداویش لە دیوێکی ترەوە دەیەوێت شەریک بۆ ئەو شەرمەزارییەی شۆڤێنیزمی نەتەوەکەی پەیدا بکات، ویستی بڵیت هەردەوڵەتەکانی عەرەب کۆمەڵکوژی ناکەن، بەڵکو ئەوانی تریش دەیکەن، راستە لەکاتی تاوانەکەدا ئەمریکاو ئەنجومەنی ئاسایش لەگەل سەدام هاوسۆز بوون و چاوپۆشییان لەتاوانەکانی کرد، ئەوان تۆمەتبارن بەبێدەنگی تاوانی جینۆسایدو گازبارانی هەڵەبجە، بەلام ئەنجامدەری تاوانەکە دەوڵەتێکی عەرەبییە، پلاندانەرو بڕیار بەدەستەکان عەرەب بوون، فرۆکەوانەکان عەرەب بوون وئێستاش بەبەڵگە زۆربەیان بەرپرس وئەمیری داعشن، دەبێت ئازادیخوازانی عەرەب بەبوێری دان بەوراستییە تاڵەدا بنێن، ئەوەی لە ناو کورددا خەونەکەی سەعداوی دەهێننە دی ئیسلامی سیاسییە . کە کوردو عەرەبی بەناوی ئاینەوە کردووەتە براو بەهۆیەوە شەرمەزارییەکەی لەگەڵدا بەش دەکات . کەچی عەجایەب ! ئیسلامیەکان بەهاتنی نیگەران وکۆمۆنیستەکان پێوەی سەغڵەتن !!
داکۆکی لەنەوال سەعداوی و گەورەکردنی لە قەوارەی خۆی، وەک ئینسان دۆستێک، لەجێیی خۆیدانیە ئەو کورد دۆست نییە، تەنها ناوێکی مەعنەوییەو میوانێکی چەند ڕۆژەی هەرێمی کوردستانەو هیچیتر، هەرگیز نابێتە فریاد رەس و پێموانییە هیچ خێرێک بۆ دۆسێی کوردو ژنی کورد بداتەوە ئەوەی ژنی کورد دەخاتەوە ناومێژوو، ئەوەی ماف و شکۆو کەرامەت بۆ ژنی کورد دەگێرێتەوە ژنان خۆیانن، نەک فریاد ڕەس، وەک یەکینەکانی پاراستنی گەل لەکۆبانی کردیان و دەیکەن، ئەوەشی نەوال سەعداوی و نوسەران و سیاسەتمەدارانی ترو تەنانەت ئەمریکاو هاوپەیمانەکانی هێناوەتە دەنگ، هاوسۆزی نییە، بەڵکو بەرژەوەندییە تەنانەت دڵڕقی و بەدرەفتاریی وتاوانەکانی داعش نیە. بەڵکو بەرەنگاری و ئازایەتی ژنانی کۆبانێ یە لە خۆرئاوا . بەدڵنیاییەوە کەس خێرمان پێناکات، ئەی پێشتر کە هەڵەبجە لەڕق وتوڕەیی عروبەو کەرەسەی جەنگ و گازی کیمیاوی مۆدێرنەدا خنکا بۆ هاوسۆزنەبوون ؟! نەوال سەعداوی بۆ تاوانی ئەنفال و دەنگۆی بڵاوبوونەوەی ١٨ کچی کوردو فرۆشتنیان بە وڵاتەکەی چی کرد ؟ چی ووت ؟ ئەی لەم میواندارییەیدا چی لەبارەیانەوە ووت ؟
پێم سەیرە لەکاتێکدا ئازایەتی ژنانی کورد لە خۆرئاوا سنوری ئەفسانەشی بەزاندووەو بووەتە مایەی سەرسوڕمانی جیهان و کاریگەری بەسەر ناوچەکەو جیهانەوە هەیە، کەچی تازە خەڵکانێک هەبن نەوال سەعداویی بە فریاد رەس بزانن و وابزانن هاتووە بۆ پشتیوانی لە ژنی کورد !! خەڵکێک هەیە لەوەش زیاتر ڕۆیوەو دەڵێ هاتووە بۆ رزگارکردنی ژنی کورد ؟! یاران ئەمە چ لێکدانەوەیەکە ! ئەی بۆ پێجەوانەکەی ڕاست نەبێت ؟ بۆ وای نەبینین کە نەوال سەعداویش پشکی خۆی لەئازایەتی ژنانی کورد دەوێ ! بۆ وای نەبینین کە بڵێت هەقە ژنانی کورد لەم سەرکەوتن و شکۆمەندییە بەشی منیش بدەن ؟ هەرەوەک ئەمریکاو هاوپەیمانەکان دوای ئەوەی زانییان کۆبانێ ناکەوێ ئینجا بە بۆرە هاوکارییەک وتی منیش لەو ئازایەتیە شەریکم .
