په‌رله‌مانی ئه‌وروپا: له‌سه‌ر هه‌ڵه‌بجه‌و ئه‌نفال كۆنگره‌ی نه‌ته‌وه‌یی كورد كۆنفرانسێك ساز ده‌كات
anfalstan – هه‌ڵه‌بجه: كۆنگره‌ی نه‌ته‌وه‌یی كوردو فراكسیۆنی سه‌وزه‌كانی نێو په‌رله‌مانی ئه‌وروپا به هاوكاری په‌رله‌مانی ئه‌وروپاو سه‌نته‌ری ئه‌كادیمیای كوردی له بروكسل، له‌سه‌ر دۆزی كیمیابارانی هه‌ڵه‌بجه‌و مه‌سه‌له‌ی ئه‌نفال كۆنفرانسێكیان سازكرد.
له‌و كۆنفرانسه‌دا چه‌ندین ئه‌ندام په‌رله‌مانی ئه‌وروپی و پسپۆرو چالاكوان‌و ئه‌كادیمیستی جیایای كوردو بیانی به وتار به‌شدارییان كرد، هاوكات ژماره‌یه‌كی به‌رچاو له رۆشنبیران‌و رۆژنامه‌نوسان‌و ئه‌كادیمیستی كوردی هه‌ر چوار پارچه‌ی كوردستان به‌شداریان تیاداكرد.
كۆنفرانسه‌كه بۆ ماوه‌ی یه‌ك رۆژ گفتوگۆی له‌سه‌ر هه‌ردوو دۆزه‌كه كرد، له كۆتایشدا بۆ وتوویژ، راسپارده‌كانی كۆنفرانس خرایه به‌رده‌م به‌شداربوان، كه تێیدا چه‌ندین پرسی چۆنیه‌تی به نێوده‌وله‌تیكردنی كه‌یسی جینۆساید، به‌جۆرێك كه په‌رله‌مانی یه‌كێتی ئه‌وروپا رۆلی گرنگی تێدا بگێرێت، وروژێنرا.
هه‌ر له راگه‌یاندنی كۆتایی كۆنفره‌نسه‌كه‌دا ئاماژه به‌وه كرا كیمیابارانی هه‌ڵه‌بجه بكرێته رۆژی قه‌ده‌غه‌كردنی به‌كارهێنانی چه‌كی كیمیاوی له جیهاندا، هه‌روه‌ها داوا له په‌رله‌مانی ئه‌وروپی و كۆمه‌لگای نیوده‌وله‌تی كرا كه به‌توندی روداوه‌كه‌ی شه‌رناخ، كه 37 هاولاتی سڤیلی كوردی تیدا كوژرا، مه‌حكوم بكات.
ئه‌م كۆنفره‌نسه كه له‌نیَو په‌رله‌مانی یه‌كیتی ئه‌وروپادا ئه‌نجامدرا، له‌لایه‌ن میدیا بیانیه‌كان‌و په‌رله‌مان خۆشیه‌وه گوێزرایه‌وه بۆ رای گشتی.
وابریاره هاوشیَوه‌ی ئه‌م كۆنفره‌نسه، رۆژی 12ی ئازار له په‌رله‌مانی ئه‌وروپا له‌سه‌ر دۆزی كورد له سوریا كۆنگره‌ی نه‌ته‌وه‌یی كورد كۆنفره‌نسیَكی تر ساز بكات.
