ئێمه‌

گومان هەڵنەگرە کە گۆڤاری ئەنفالستان سەرباری ئەوەی ساڵی جارێک چاپ وبلاودەکرێتەوە، جا با تاقەت پروکێنیش بێت بەڵام گرنگ و پێویستە، بۆیە هەمیشە خەونم بوو، کە بەوەندە نەوەستم، بەڵکو ئەوەندەی تاقەتم بەسەریدا دەشکێت بەشێوازیكی نوێ‌ لەگەڵ خوێنەرەکانی ئەنفالستان بمێنمەوەو لە رێگەی تەكنۆلۆژیاو زانیاری نوێ‌ و بەشیوەی ئەلکترۆنیش چالاكییەكان بەردەوام بن و ئەوەی بۆ پرسی “جینۆساید بەگشتی وجینۆسایدی كورد بەتایبەتی”،لەدەستم دێت، بەشێوەیەکی باشترو خێراترو گونجاوتر ئەنجامی بدەم.

بەلام ئەفسوس..! لەبەر نەبوونی و بارگرانی ژیان ئەم خواستەمان نەدەهاتە بەڵام دواجار بریارمدا بەبرێک پارە لە بەشە موچەی شەهیدانەکەی باوکمان (محەمەد قادر) ئەم ماڵپەرە دابمەزرێنم و بەم شێوەیە کە لە بەردیدیەتانە بخەمە خزمەتتانەوە. لە ئێستادا بە هەردوو زمانی“كوردی وعەرەبی”،بابەتەکانی بڵاودەکاتەوەو، لە داهاتوشدا هەوڵدەدەم، ئەگەر هاوکارمان بۆ پەیدا بێت بە شێوەزاری كوردی “كرمانجی” وزمانی “ئینگلیزی و فارسی” ماڵپەڕەكە بخەینە بەردەست.

ئەركی ماڵپەری ئەنفالستان بە شیوەیەکی خێراترو بەربلاوتر بڵاوکردنەوەی بابەتەکانی ناوگۆڤاری ئەنفالستان و دیدارەکان و خوێندنەوەی تاوانەکانی “ئەنفال و جینۆسایدە بەگشتی”و ئەوانەی فریای ژمارەکانی ناکەون، تەواوی دیدارو وتارو بەڵگەنامەو رەهەندە فەلسەفی و فیكری و سیاسی و ئابووری و كۆمەڵایەتی و سایکۆلۆژییەکان و كاریگەرییە جۆراو جۆرەكانی، ئەوتاوانە دەخاتە روو لە سەرئاستی كوردستان . لەمێژە گەلی كوردستان نەک هەر لە باشور بەڵکو لەسەر ئاستی کوردستانی گەرورە “باكوور، باشوور، رۆژهەڵات، رۆژئاوا”، ستەمکاری و تاوانی دەرهەق دەکرێ وکۆمەڵکوژ دەکرێت وڕوبەڕوی دوژمنی دلرەق وتوندرەفتار دەبێتەوە، وەلێ ئەفسوس .. ئەم میللەتە گەلێک خەمساردو بێباکە لە نوسینەوەی مێژووی خۆی. هەر بۆیە مێژووی کورد بەگشتی و تاوانەکانی جینۆساید { فەیلییەکان، بارزانییەکان و ئەنفال و هەلەبجەو شەنگال} بەئەندازەیەک فەرامۆش کراوە هێشتا زۆر لایەنی شاراوەیان لە تاریكیدا ماوەتەوەو كارێکی ئەوتۆی لە بارەیەوە نەكراوە.
بەو هیوایەی ماڵپەڕی “ئەنفالستان ” ئەگەر کەمیش بێت بە ئەرکی خۆی هەستێت و ئەوەندەی دەستی بۆ دەبات بابەتیانە و بەرپرسیارانە مامەڵە لەگەڵ یادەوەری و روداوەکان وکارەکتەرو شایەتحاڵ و دۆکۆمێنتەکاندا بکات. بۆ ئەم مەبەستە دەرگای بۆ هەر کەسولایەنێک کراوەیە کە دەیەوێت پێنوسەکەی بخاتە کارو بێگومان شوێنی شیاو بۆ هەر“وتارو لێكۆڵینەوە،دیدارو، بەڵگەنامەیەک، هەروەها بۆ هەر کارێکی هونەری سینەماو شانۆ فۆتگرافەرو شیوەکارو دەنگ و رەنگ، فۆتۆ، كتێب و بڵاوكراوە”و هەربابەتێكی پەیوەست بەم دۆسێە دەخاتە سەرپشت ولەخزمەتدادەبێت. بێگومان بەتەنگەوە هاتن و هاوكاری و هەماهەنگی ئێوە، جگەلەوەی خۆشحاڵمان دەکات کارەکەشمان پێشدەخات وسەرئەنجام کۆمەڵگەی کوردستان لێی سودمەند دەبێت .

عومەر محەمەد

سەرنوسەرو خاوەنی گۆڤارو ماڵپەری ئەنفالستان .

٢٣//ی ئازاری ٢٠١٥ – سلێمانی